On bes jylǵa jýyq «Aq joldy» basqarǵan Azat Perýashev óz ókilettigin toqtatty. Endi saıası qozǵaýshy kúshke Májilis tóraǵasynyń orynbasary qyzmetin atqaryp júrgen Danııa Espaeva jetekshilik etedi. Osylaısha, ol táýelsiz el tarıhynda partııanyń tizginin ustaǵan alǵashqy áıel tóraǵa atandy. Bul aýys-túıis uıymnyń kezekten tys sezinde sheshildi.
«Aq jol» demokratııalyq partııasynyń Ortalyq keńsesinde ótken jıynǵa saılanǵan 170 delegattyń 165-i qatysty. Onyń ishinde 50-i oflaın, al 115-i onlaın formatta qosyldy. Jıyn barysynda partııa Jarǵysyna ózgerister engizý, «Aq joldyń» saıası baǵdarlamasyn jańartý jáne birqatar uıymdastyrýshylyq másele qaraldy.
Sezd biraýyzdan Berik Dúısembınov tóraǵalyq etetin mandat komıssııasynyń quramyn bekitti. Komıssııa quramyna partııanyń Ortalyq apparatynyń basshysy Asylhan Qojahmetov pen partııanyń zań qyzmetiniń jetekshisi Rýstam Jumaǵalıev endi.
«Aq jol» demokratııalyq partııasynyń tóraǵasy Azat Perýashev jańartylǵan Konstıtýsııanyń talaptaryna sáıkes partııanyń ishki normalary men termınologııasyn úılestirýge baǵyttalǵan Jarǵyǵa túzetýler paketi daıyndalǵanyn habarlady.
Talqylaý barysynda partııa Quryltaıda da, halyqpen tikeleı jumys isteıtin jergilikti máslıhattarda da ókilettiligin kúsheıtý baǵytynda jumysyn jalǵastyratyny atalyp ótti. Al partııa tóraǵasynyń orynbasary, Parlament Májilisiniń vıse-spıkeri Danııa Espaeva saıası uıym baǵdarlamasyndaǵy óńirlik kásipkerlikti qoldaý sharalaryn kúsheıtýdi usyndy.
– О́ńirlerde kásipkerlikti qorǵaý máselesine qatysty jıi kezdesetin túıtkil bar. Olardyń keıbirin zańnamalyq deńgeıde sheshýge bolady, alaıda kóptegen jaǵdaıda másele zańda emes, onyń ár aımaqta ártúrli qoldanylýynda. Bul kásipkerlik belsendilik pen ınvestısııalyq ahýalǵa keri áserin tıgizip jatyr. Ekinshiden, áıel kásipkerlerdi qoldaý baǵytyn kúsheıtken jón. Elde qyz-kelinshekterge, ásirese aýyldyq jerlerde bıznes bastaý áldeqaıda qıyn. Olardy qoldaýdyń tıimdi tetikterin qalyptastyrý qajet. Úshinshiden, áleýmettik kásipkerlerge de erekshe nazar aýdarý kerek. Buǵan qatysty zań qabyldanǵanymen, ony iske asyrýǵa arnalǵan naqty baǵdarlamalyq yntalandyrý jetkiliksiz, – deı kele ol aqjoldyqtardy aldaǵy eki apta ishinde óńirlerdegi bıznes úshin eń ózekti máseleler jóninen naqty usynystar daıyndaýǵa shaqyrdy.
Sezdiń negizgi máselesi «Aq jol» demokratııalyq partııasynyń tóraǵasy Azat Perýashevtiń ókilettigin toqtatý týraly málimdemesi boldy. Delegattar aldynda sóılegen sózinde ol qoǵamda bolyp jatqan úderisterdiń qarqyny joǵary, mundaı jaǵdaıda uzaq ýaqyt bir adamnyń basshylyqta otyrýy belgili bir dárejede tejegish faktorǵa aınalýy múmkin ekenin jetkizdi. Saıasatkerdiń aıtýynsha, kez kelgen «monopolııanyń» aldyn alýdyń tıimdi joly – basshylyqtyń kezeń-kezeńimen aýysyp otyrýy. Osylaısha, óziniń ornyna Danııa Espaevanyń kandıdatýrasyn usyndy.
– Danııa Espaeva Parlamentke kelgenge deıin bank júıesinde qyzmet atqardy. Salada 34 jyl jumys istese, sonyń 17 jylynda basshylyq laýazymda otyrǵan. Eki ret Aqtóbe oblystyq máslıhatynyń depýtaty boldy. Ol alǵash ret 2016 jyly «Aq jol» partııasynan Májiliske ótti, Qarjy jáne bıýdjet komıtetinde jumys istedi, al 2023 jyldyń naýryzynda Májilis tóraǵasynyń orynbasary qyzmetine taǵaıyndaldy. Osy aralyqta Parlamenttik oppozısııa týraly, zańsyz shyǵarylǵan aktıvterdi qaıtarý týraly, jeke tulǵalardyń bankrottyǵy týraly zańdardy qosa alǵanda, birqatar mańyzdy zańnamalyq bastamanyń avtory ári teń avtory boldy, sondaı-aq Konstıtýsııalyq komıssııa jumysyna qatysty. Aıta keteıin, ol – 2019 jylǵy prezıdenttik saılaýǵa usynylǵan tuńǵysh áıel kandıdat. Danııa Mádıqyzynyń tájirıbesi, kásibı bilimi men batyl sheshim qabyldaı alý qabileti partııaǵa jańa serpin beredi, – dedi A.Perýashev.
Balama kandıdat retinde Qaraǵandy oblysynyń delegattary «Aq jol» demokratııalyq partııasynyń Qaraǵandy oblystyq fılıalynyń jetekshisi, Qazaqstan qyzmet kórsetý salasy kásipkerleri qaýymdastyǵynyń tóraǵasy Ermek Ábdildın kandıdatýrasyn usyndy. Daýys berý rásimine 165 delegat qatysty. D.Espaevanyń kandıdatýrasyn 152 delegat qoldady, E.Ábdildınge 8 delegat daýys berdi, al 5 delegat qalys qaldy. Osylaısha, kezekten tys sezdiń sheshimimen D.Espaeva «Aq jol» demokratııalyq partııasynyń tóraǵasy bolyp saılandy.
– On bes jyl osy partııadamyn. Ishki jumysyn, qaǵıdattaryn jáne ustanymdaryn bilemin. Komandamen tyńǵylyqty jumys istep, bıylǵy saılaýǵa daıyndalamyz. Ázirge jobamyzdy rettep alý kerek. Basty nazardy óńirlerge burý kerek, – dedi D.Espaeva.