Keshe Aqordada Memlekettik hatshy, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Gúlshara Ábdiqalyqova men «Astana EKSPO-2017» Ulttyq kompanııasy» AQ-tyń basqarma tóraǵasy Talǵat Ermegııaev yntymaqtastyq týraly memorandýmǵa qol qoıdy. Bul qujat elimizdegi áıelderge EKSPO-2017 halyqaralyq kórmesin ótkizýde óz úlesterin molynan qosýlaryna múmkindik bermek.
Gúlshara Ábdiqalyqova memorandýmǵa qol qoıý rásimi barysynda atalmysh qujattyń bekitilýi elimiz úshin eleýli oqıǵa ekenin aıta kelip, «Halqymyzdyń shamamen 52 paıyzyn áıelder quraıdy. Sondyqtan, Ulttyq komıssııa qazaqstandyq áıelderdiń, sondaı-aq, otandyq jáne halyqaralyq úkimettik emes uıymdardyń orasan zor áleýetin jan-jaqty iske qosýdy óziniń basty mindetteriniń biri sanaıdy. Osy oraıda, áıelder qaýymdastyǵy tarapynan túrli usynystar túsip jatyr. Soǵan baılanysty búgin biz «Astana EKSPO-2017» Ulttyq kompanııasymen arnaıy memorandýmǵa qol qoıýdy jón kórdik», dedi.
Sondaı-aq, ol Memleket basshysy Nursultan Nazarbaevtyń tarapynan EKSPO-2017 kórmesin daıyndaý jáne ótkizý kezinde otandyq ekonomıkanyń, ásirese, shaǵyn jáne orta bıznestiń resýrstaryn barynsha paıdalaný jóninde tapsyrma berilgenin basa aıtty.
Onyń sózine qaraǵanda, qazirgi tańda Ulttyq komıssııa jasyl tehnologııalardy paıdalaný arqyly qanatqaqty jobalardy iske asyrý, ınnovasııalyq energııa jınaqtaýshy tehnologııalarmen shuǵyldanatyn áıelder qaýymdastyǵyn EKSPO-2017 kórmesine qatysýǵa tartý jónindegi jumystardy jandandyra túsken. Máselen, osy baǵytta «Aqbota» qoǵamdyq qory belsendilik kórsetip otyrǵan kórinedi. Bul qor pırolızdik peshterdi, jaryq dıodty shamdardy, bıo-vegetarılerdi jáne tamshylatyp sýarý arqyly tabıǵı resýrstardy únemdeýge baǵyttalǵan ınnovasııalyq tehnologııalardy keń kólemde engizý úshin tájirıbelik-synaqtyq alań qurýda.
Al óz kezeginde Talǵat Ermegııaev Elbasy Nursultan Nazarbaevtyń qaýymdastyqtardy, kásipkerlerdi «EKSPO» kórmesin uıymdastyrý jáne ótkizý sharalaryna tartý baǵytynda bergen tapsyrmasyna oraı kóptegen sharalar atqarylyp jatqanyn atap ótti. Sonymen qatar, ol áıelder uıymdaryn EKSPO-2017 kórmesiniń jumystaryna keńinen qatystyrýdyń mańyzdylyǵyna toqtaldy.
Joldybaı BAZAR,
«Egemen Qazaqstan».