ASTANA. 2 shilde. «Egemen Qazaqstan» respýblıkalyq gazeti aksıonerlik qoǵamy daıyndap, shyǵaryp otyrǵan «Prezıdent» atty jınaq gazettiń 2010-2015 jyldar aralyǵyndaǵy nómirlerinde jaryq kórgen Elbasy Nursultan Nazarbaev týraly alýan túrli maqalalardy oqyrman nazaryna usynyp otyr. Osyǵan oraı gazet ǵımaratynda «Prezıdent» jınaǵynyń tusaýkeser rásimi ótedi. Bul týraly egemen.kz habarlady.
«Prezıdent» atty jınaq «Egemen Qazaqstan» respýblıkalyq gazeti aksıonerlik qoǵamnyń buǵan deıingi jyldary shyǵarǵan «Elbasy», «Táýelsizdik», «Saltanat», «Astana» jáne «Dintutqa» jınaqtarymen bir serııany quraıdy. Kitap sonymen qatar Prezıdenttiń alǵashqy 20 jyldaǵy memleket basqarý kezeńin qamtıtyn «Elbasy» toptamasynyń mazmun jaǵynan jalǵasy ispettes.
Jınaqta qamtylǵan árbir jyldyń materıaldary jeke taraýǵa biriktirilgen. Onyń basy Elbasynyń balalyq jáne jastyq shaqtary týraly sóz etiletin maqala-suhbattan bastalady. Budan ári bolashaq Memleket basshysynyń ushqan uıasynan alǵan tárbıesi men ósý joldary, úlken ómirge qaraı basqan alǵashqy qadamdary, osynyń jelisinde Dneprodzerjınskidegi oqyǵan jyldary, Elbasynyń týǵan jerge degen kózqarasy men ol jónindegi tebirenisi sóz etiledi. Kelesi maqalalarda osyndaı ómir ótkelderinen ótken Elbasynyń qazaq tiliniń mártebesin kóterýdegi eren eńbegi, Esildiń boıyna el baıtaǵyn ornalastyrý jolyndaǵy úlken kóregendigi, Qazaqstannyń damý jolyn tańdaýdaǵy kemeńgerligi, syrtqy álemmen qarym-qatynastaǵy syndarly saıasaty, osynyń negizinde jahan jurty sanasatyn tegeýrindi tulǵaǵa aınalýy jaıly tolymdy tolǵam aıtylyp, salıqaly syr shertiledi. Kitapta kóptegen avtorlardyń Prezıdenttiń el basqarý isindegi kredosyna, baǵyty men baǵdaryna ǵylymı, fılosofııalyq jáne áleýmettik turǵydan baǵa berýge qurylǵan taldamaly materıaldary da kóptep oryn alǵan. Munda sondaı-aq, Nursultan Ábishulynyń baýyrlarymen, birge ósken dostarymen júrgizilgen suhbattar da qamtylǵan. Osynda sóz bolatyn jaıttardy Elbasy týraly túsirilgen fılmder boıynsha jazylǵan sholý-resenzııa tııanaqtap beredi.
Kitap negizinen Elbasy men onyń irgeli isteri týraly memleket jáne qoǵam qaıratkerleri, ǵalymdar men jazýshylar, óner jáne eńbek adamdary jazǵan maqalalardan quralǵan. Bulardan bólek, aqyndardyń oda, tolǵaý jáne tilek mazmunynda tolǵaǵan bir top óleńderine de kezek berilgen. Jınaqta sondaı-aq, Prezıdenttiń osy bes jyl ishindegi ártúrli kezdesýlerden túsirilgen sýretteri de jeke toptama túrinde kórinedi. Jalpy, kitaptyń kólemi 804 betti quraıdy.
Atalmysh jınaqtyń tusaýkeser rásimi 3 shilde kúni, saǵat 16:00-de «Egemen Qazaqstan» gazetiniń redaksııasynda ótedi.
Talǵat Raıymbek.
Derek, sýret: egemen.kz.