ASTANA. 2 sáýir. «Qaqpaq» zastavasynyń shekarashylary narıad barysynda О́zbekstannan Qazaqstanǵa zańsyz ótpek bolǵan eki azamatty quryqtady. Bul týraly newtaimes.kz habarlady.
Shekarashylar aınalany barlaý barysynda eki jigitti kórip, olarǵa jaqyndaǵan sátte kúdiktiler qasha jónelgen. Qyraǵy sarbazdar birin tez qolǵa túsirse, ekinshisi sýyq qarýmen olarǵa qarsylyq tanytqan. Degenmen, aǵa serjant N.Aıdarov jekpe-jek tásilin qoldaný arqyly kúdiktini quryqtaǵan.
Qolǵa túsken azamattardyń aǵaıyndy ekeni anyqtaldy. Biri 30 jastaǵy Qazaqstannyń azamaty bolsa, ekinshisi 35 jastaǵy О́zbekstan eliniń týmasy.
Tekserý barysynda olardyń buryn urlyq pen zańsyz qarý saqtaǵany úshin sotty bolǵany belgili boldy.
Aıta keteıik, kúdiktilerdiń ústinen Qazaqstan shekarasyn zańsyz kesip ótpek bolǵany jáne qolǵa túsirý barysynda shekarashylarǵa qarsylyq kórsetkeni úshin qylmystyq is qozǵalady.
Al «Qaqpaq» zastavasynyń qyraǵylyq tanytqan quramy marapatqa usynyldy.
Talǵat Raıymbek.
Derek, sýret: newtaimes.kz.