Keshe Elbasy Nursultan Nazarbaev «Astana» fýtbol klýbynyń ÝEFA chempıondar lıgasy toptyq kezeńine ótýine baılanysty quttyqtaý joldady, dep habarlady Prezıdenttiń baspasóz qyzmeti.
Bul bir shyn máninde de Qazaqstan fýtboly úshin naǵyz aq túıeniń qarny jarylǵan aqjarylqap kún boldy. Burnaǵy kúni túnde Kıprdiń ortalyǵy – Nıkosııada jergilikti APOEL klýbymen Chempıondar lıgasy irikteý kezeńi pleı-off oıyndarynyń qarymta kezdesýin ótkizgen «Astana» komandasy 1:1 esebimen teń túsip, eki matchtyń qorytyndysy boıynsha qurlyqtaǵy eń bedeldi kýbok jarystarynyń toptyq kezeńine joldama aldy. Buǵan bizdiń jerlesterimizdiń sońǵy oıyndy teń aıaqtaı bilýlerimen birge, budan bir apta buryn atalǵan qarsylasyn óz alańynda 1:0 etip jeńip kelgeni jol ashyp berdi.
Sóıtip, «Astana» fýtbol klýby óziniń qysqa tarıhynda ǵana emes, jalpy Qazaqstan komandalary arasynda birinshi bolyp Eýropa kýboktarynyń toptyq kezeńinde oınaıtyn alǵashqy jasaq atandy. Komandany osynaý orasan zor tabysymen Elbasy Nursultan Nazarbaevtyń ózi arnaıy quttyqtady. Shyn júrekten aıtylǵan jáne laıyqty oqıǵaǵa baılanysty jetkizilgen sol quttyqtaýǵa biz de qosylamyz.
Qazir astanalyqtardyń osy jaýapty oıynda aıbyndary asyp túsetinin ishteı bildik desek, bálkı, munymyz bolary bolyp qoıǵannan keıin aıtyla salǵan arzanqoldaý sáýegeılik bolyp kóriner, biraq, shynynda da, nege ekeni belgisiz, oıyndy onlaın-jeliden kórip otyrǵan kezimizde onyń qorytyndysy ózimiz úshin qolaıly bolatynyna degen bir senim boıymyzdan úıirilip shyqpaı qoıyp edi. Tipti, ekinshi taımnyń bel ortasyna qaraı alań ıeleri kútpegen jerden keremet gol soǵyp ketip, bizdiń qaqpanyń baǵanyn qaqyratyp ótkende de sol sezimnen ajyraı qoımaǵanbyz.
Buǵan, shamasy, alańdaǵy ýaqyttarynyń basym bóligin qorǵanysta ótkizgenderimen, jigitterimizdiń jeme-jemge kelgende, qarǵa boıly qarsylastarynan tómen túse qoımaǵandary, ara-tura jasaǵan qarsy joryqtary kóp jaǵdaıda qaýiptirek bolyp shyǵyp jatqandary áser etse kerek.
Ne degende de, astanalyqtardyń syrt alańdaǵy bul oıynynan kóńilge kúdik ala qoıatyndaı eshteńe tappaǵanbyz. Kerek deseńiz, munyń ózi olardyń ózindik bir taktıkalyq oıyn júıesi ispetti bolyp kóringen. Olaı deıtinimiz, munyń aldynda Astanada ótken birinshi kezdesýde de bizdiń jigitter kerekti kezinde ǵana qaýyrt shabýyldarǵa kóship, qalǵan ýaqyttyń kóbinde dopty qarsylastaryna berip qoıǵan bolatyn. «Astana» óziniń osy oıyn órneginen tipti birinshi aınalymda-aq ádemi nátıje shyǵarýǵa shaq qalǵan. Budan buryn fınniń HIK komandasymen ótken matchta alystan óte ádemi gol soǵyp, kórermen qaýymnyń kózaıymyna aınalǵan Dmıtrıı Shomko munda da sol erligin qaıtalaı sala jazdady. Alaıda, bul joly ótkendegideı áýeletip emes, beldeý boılatyp urǵan onyń dobyn kıprlikter qaqpashysy Boı Vaterman sońǵy mezette qaıtaryp úlgerip, darbazasyn dabyldap kelgen goldan saqtap qaldy.
Munyń janynda oıynnyń óne boıynda bizdiń jaqqa qaraı janushyra umtylýmen bolǵan APOEL fýtbolshylarynyń múltteri asa bir kóp bola qoımaǵan sııaqty. Olar mundaı máýritterdiń bir-ekeýin matchtyń ekinshi taımynda jiberip alǵany bolmasa, tutastaı alǵanda, tapap tastaıtyndaı artyqshylyqqa qol jetkize alǵan joq. Bul, árıne, oıyn barysynda básekelesteriniń alys-jaqynnan urǵan, buryshtamadan jibergen doptaryn álsin-álsin qaǵyp alyp, qaýiptiń betin sol boıda qaıtaryp turǵan qaqpashymyz Nenad Erıchtiń erlikke para-par eńbegin áste joqqa shyǵarý emes. Kezdesýde sondaı-aq astanalyqtar sapynan soǵylǵan goldyń uıymdastyrýshysy Baýyrjan Jolshıev pen onyń bergen pasyn ashyq qaqpaǵa súńgite salǵan Nemanıa Maksımovıch, sondaı-aq joǵaryda aıtylǵan Dmıtrıı Shomko men Georgıı Jýkov ózderin óte jaqsy qyrlarynan tanytty.
Bizdiń jigitter tipti matchtyń aıaqtalýyna sanaýly mınýttar qalǵan kezde, dáliregi, tóreshiniń qosqan ýaqytynyń eń aqyrǵy sátterinde kıprlikterdiń qaqpasyna taǵy bir gol soǵyp, jeńip te kete jazdady. Matchtyń ózderi úshin utylysqa bet aldyryp bara jatqanyn bilgen alań ıeleri sońǵy mınýttarda júdá va-bankke barǵandaı qalyp tanytyp, alǵa taıly-taıaǵy qalmaı, túgel umtylǵan. Sondaı kezderde astanalyqtar keminde úsh ret óte jaqsy qarsy shabýyl uıymdastyra bildi. Bulardyń sońǵysy sonyń aldynda alańǵa shyqqan Alekseı Shetkınniń orasholaqtyǵy arqasynda ǵana naqty golǵa aınalmaı qalǵandaı kórindi. Kıprlikter qaqpasy mańyna jaqyn jerde dop alǵan ol muny aldyńǵy jaqta jalǵyz qorǵaýshynyń janynda júrgen úsh komandalasynyń birine tez asyra qoıǵanda, bári basqasha bolar ma edi, kim bilsin!
Degenmen, qanaǵat! Biz úshin osynyń ózi jeńis. «Astana» osylaı syrt alańda jeńiske bergisiz teń oıynǵa qol jetkizdi. Alańdaǵy Londonnan shaqyrylǵan arbıtr Martın Atkınson matchtyń sońǵy ysqyryǵyn bergen kezde, osynyń bári bizdiń júregimizge qýanysh bolyp quıyldy, shattyq bolyp tasydy. Bul rasynda da naǵyz úlken jeńis edi. Qazaq fýtboly osylaı jyl sanap bir qadam bolsa, alǵa attap, birtindep ilgeri jyljyp keledi. Byltyr Qaraǵandy «Shahteriniń» Chempıondar lıgasy irikteý týrnırinde jaqsy óner kórsetip, osyndaı pleı-off kezeńinde eki oıynnyń qorytyndysymen Shotlandııanyń «Seltıgine» jol berip alǵanynyń ózin edáýir jetistik sanaǵanbyz.
Keshe túnde Chempıondar lıgasynyń toptyq kezeńine shyqqan 32 komandanyń arasynda jerebe tastaý rásimi bolyp ótti. Ol «Astananyń» endi kimdermen oınaıtynyn anyqtap beredi. Buǵan qosatynymyz, 15-16 qyrkúıekte oıyndary bastalatyn bul kezeń 8-9 jeltoqsanda aıaqtalady. Soǵan deıin komandalar 6 týrdyń kezdesýlerin ótkizip, óz tobyndaǵy qarsylastarymen eki retten oınap úlgeredi. Biz astanalyqtarǵa týrnırdiń bul tusynda da sátti oınaýdy tileımiz.
Sosynǵy aıtarymyz: keshe túnde Eýropa lıgasynyń pleı-off kezeńine shyqqan Almatynyń «Qaıraty» óz alańynda fransýzdyń «Bordosyn» qabyldady. Qarymta match retinde oınalǵan bul kezdesýde qaırattyqtar qarsylastaryn eki dop aıyrymymen utsa, toptyq kezeńge shyǵady. Komandalardyń budan bir apta buryn Bordoda ótken oıynynda alań ıeleri 1:0 etip utqan edi.
Serik PIRNAZAR,
«Egemen Qazaqstan».