Elordada ótip jatqan VIII Astana ekonomıkalyq forýmy barysynda elimizde BUU tarapynan belgilengen Myńjyldyq damýdyń maqsattaryn (MDM) oryndaý baǵytynda kóptegen jumystar atqarylyp, sonyń nátıjesinde naqty tabystarǵa merziminen buryn qol jetkizilgeni aıtyldy.
Forýmda sóz alǵan Densaýlyq saqtaý jáne áleýmettik damý mınıstri Tamara Dúısenova Qazaqstanda atalǵan salada irgeli jobalar júzege asyrylyp, alǵa qoıylǵan mindetter óz deńgeıinde atqarylǵanyn jáne bul baǵyttaǵy jumystar odan ary júıeli túrde júrgizile beretinin jetkizdi.
– Qazaqstan Birikken Ulttar Uıymy belgilegen Myńjyldyq maqsattardyń 8 baǵyty boıynsha aýqymdy jumystar atqaryp, nátıjesinde TMD eliniń arasynda kósh bastap keledi. Biz halyqaralyq reıtıngte 144 eldiń arasynda 43-orynda turmyz. Kedeıshilikti tómendetýde, ana men bala ólimin azaıtýda jáne bilim berý isinde elimizde qyrýar sharýalar zaman talabyna saı júıelendi, – dedi mınıstr.
Al Bilim jáne ǵylym vıse-mınıstri Tahır Balyqbaev Myńjyldyq damýdyń úshinshi maqsaty, ıaǵnı balalardy bastaýysh bilimmen qamtý isi Qazaqstanda merziminen buryn oryndalǵanyn málimdedi.
– Elimiz bilim salasynda belgili bir maqsatqa qol jetkizdi. Mysaly, úshinshi maqsat – (MDM – red.) kózdelgen ýaqytqa jetkizilmeı eńserildi, – dedi ol.
Sondaı-aq, ol Bilim jáne ǵylym mınıstrligi men BUU Damý baǵdarlamasy birlesken jobalardy iske asyrý ústinde ekenin, búgingi forýmda bul máselelerge erekshe kóńil bólingenin aıtty.
Joldybaı BAZAR,
«Egemen Qazaqstan».