Ortaq nátıje úshin ter tógemiz

Jaqynda Aleksandr Koreshkov «Barys» hokkeı klýbynyń prezıdenti bolyp taǵaıyndaldy. Ol – Qazaqstanǵa ǵana emes, shetelge de tanymal ári bedeldi sportshy. A.Koreshkov Qazaqstan quramasynyń sapynda álem chempıonattary men Olımpııa oıyndaryna da qatysty. Sońǵy jyldary Qazaqstan Hokkeı federasııasynda otandyq komandalardy halyqaralyq jarystarǵa qatysýǵa ázirledi. Qazaqstannyń eresekter men jasóspirimder qurama komandalarynyń bas menedjeri bolyp tabylady. – Aleksandr Gennadevıch, sizdi jańa qyzmetińizben – «Barys» hokkeı klýbynyń prezıdenti bolyp taǵaıyndalýyńyzben qut­tyq­taımyn! – Rahmet. Bul klýbty basqarý asa zor jaýapkershilik júkteıdi. Men Qamqorshylar keńesine osyndaı senim bildirgeni úshin alǵysymdy aıtamyn jáne olardyń senimin aqtaýǵa bar kúshimdi salamyn. – Sizdiń Qazaqstan qurama koman­­dasynyń bas menedjeri min­detińiz sol kúıinde qala ma? – Iá. Aldaǵy álem chempıonatyna daıyndyq birazdan beri júrip jatyr. 4 sáýirden bastap, hokkeıshiler oqý jattyǵýlaryna kirisedi. Qazir bizdiń aldymyzda keńeıtilgen qurama jasaqtaý tapsyrmasy tur. Bapkerler shtabynyń negizgi quramaǵa kimderdi qabyldaý kerektigin naqty tańdaı alatyn múmkindigi bolýy kerek. Bizdiń josparymyzsha, quramaǵa «Barys» hokkeıshilerinen basqa, О́skemennen bes adam, Pavlodardan tórt oıynshy, Qaraǵandydan bes, Rýdnyıdan bir oıynshy qosylatyn syńaıly. – Sońǵy kezderi BAQ-tarda «Ba­ryspen» jańa kelisim­shart­tardyń jasalmaýy­na baılanysty barlyq qazaq­standyq hokkeı­shiler qurama komanda sapy­na qosyla almaıdy degen qaýe­set tarady. Bul jóninde ne deısiz? – Hokkeıshilerdiń kelisim­shart­tary sáýirdiń 30-yna deıin jaramdy. Sondyqtan da, «Barys» aldymen Qazaqstan qurama komandasyna kiretin oıynshylardyń jaıyn qaraıdy. Osyǵan baılanysty, men qazaqstandyq oıynshylarmen kelisimshartty álem chempıonatynan keıin jasaý kerek degen pikirdi ustanamyn. Al chempıonat sáýirdiń 25-inde aıaqtalady. Onyń syrtynda, oıynshy elimizdiń hokkeı quramasynda oınaǵandy úlken dáreje dep sanap, saýdalaspaýy tıis. – Birinshi basshynyń aýysýyna baılanysty klýbta túbegeıli ózgerister bola ma? – Túbegeıli ózgerister bolmaıdy. Áýeli men «Barys» klýbynyń ujymymen tanysamyn. Kimniń ári qaraı jumys jasaǵysy keletinin anyqtaımyn. Maǵan klýbtyń jumysyn barynsha nátıjeli etip uıymdastyrý men kommersııalyq múmkindigin kóterý tapsyryldy. Oǵan qosa jańa maýsymda klýb 12 myń adamdyq jańa muz aıdynynda óner kórsetetin bolady. – Jankúıerler Qazaqstan qurama komandasy sapyna kir­meıtin eki hokkeıshiniń jaıyna alańdaıdy. Olar – Naıdjel Doýs pen Iаn Laso. Bul ekeýi týraly ne aıta alasyz? – Taǵy da qaıtalap aıtamyn, maǵan barlyq jumysty qabyldap alýǵa ýaqyt kerek. Ázirge bul máseleniń basy ashyq. Barlyǵy meniń ǵana pikirime baılanys­ty emes. Ulttyq sporttyq joba retinde «Barys» týraly sheshim alqaly túrde, ashyq sheshilýi tıis. Bapkerlik shtabtyń pikiri eskeriledi, árıne. – Siz endi Qazaqstan qurama­sy­nyń bas menedjeri retinde ulttyq komandanyń bas bapkeri Andreı Naza­rovpen birge jumys jasaısyz. Ol týraly pikirińiz qandaı? – Andreı Nazarov – óte tájirıbeli maman. Meniń oıymsha, barlyǵymyz nátıjege jetý úshin tabandy túrde birlesip ter tógetin bolamyz. – Jankúıerler Qazaqstan qura­masyn jas oıynshylarmen tolyqtyrý týraly kóp aıtady. Buǵan ne deısiz? – Qazaqstan qurama komandasy aldyna óte joǵary meje qoıyp otyr. Ol –tek jeńiske jetý. Árıne, komandany jastarmen tolyqtyrý máselesi kún tártibinde tur. Biraq bul birden júzege asyrylatyn ońaı sharýa emes. Eń bastysy – bizde rezerv bar. – Áńgimeńizge rahmet. Jumy­syńyzǵa tabys tileımin. Áńgimelesken Dastan KENJALIN, «Egemen Qazaqstan».