Aqtóbe qalasynyń ákimi Erhan Omarov Uly Jeńistiń 70 jyldyǵyna oraı kelgen Sankt-Peterbýrg qalasy Neva aýdanynyń ardagerler keńesiniń delegasııasyn qabyldady. Delegasııanyń kelý maqsaty – qazaqstandyq ardagerlermen kezdesý, baýyrlas qazaq halqynyń tarıhymen jáne mádenıetimen tanysý, patrıottyq tárbıe berý sharalaryna qatysý.
Peterbýrgtik qonaqtardy qabyldaý saltanatynda shahar basshysy sóz alyp, eki el arasyndaǵy yntymaqtastyqtyń kókjıegi keńeıip otyrǵanyn jetkizdi. Uly Jeńistiń 70 jyldyǵy óńirde óte keń kólemde atalyp ótkenin, mundaı izgilikti kezdesýlerdiń soǵys kezindegi aǵa urpaqtyń erlik isteri men janqııarlyq eńbegin jastardyń jadynda jańǵyrtyp, olardyń boıynda otansúıgishtik qasıetti qalyptastyrýǵa yqpal etetinin atap ótti.
– Uly Otan soǵysyna 122 myńnan astam aqtóbelik qatysyp, sonyń 36 myńnan astamy týǵan jerge oralmady. Kóptegen aqtóbelikter Aqtóbede qurylǵan №316 atqyshtar dıvızııasy men №101 derbes ulttyq atqyshtar brıgadasynyń quramynda Máskeýdi qorǵaýǵa qatysty, odan ári maıdan joldarynan ótti. Aqtóbelik jaýyngerler sol kezdegi Lenıngradty – qazirgi Sankt-Peterbýrgti jaýdan qorǵaý jáne azat etý shaıqastarynda erlikpen soǵysty. Aǵa urpaqtyń erlik isteri eshqashan umytylmaıdy. Saparlaryńyzǵa sáttilik tileımin. Qalada Uly Jeńistiń 70 jyldyǵyna oraı jasalǵan jumystardy óz kózderińizben kórýge barlyq jaǵdaı jasaımyz. Jalpy, eki qalanyń barlyq salada ynymaqtastyq baılanysyn nyǵaıtýǵa berik negiz bar, – dedi E.Omarov. Sankt-Peterbýrgtiń Neva aýdany ardagerler keńesiniń tóraǵasy Mıhaıl Shevchýk aqtóbelikterdiń aıaq-qoldaryn jerge tıgizbeı jyly qarsy alýlaryna rızashylyǵyn bildirip, yntymaqtastyq saparlarynyń alda da jalǵasa beretinin, óz úılerine kelgendeı sezimde ekendikterin jetkizse, Neva aýdany ákimshiliginiń jastar saıasaty jáne qoǵamdyq uıymdarmen baılanys bóliminiń bastyǵy Andreı Lıabın Aqtóbe qalasynda jasaqtalǵan №74 derbes teńiz atqyshtar brıgadasynyń jáne myńdaǵan qazaqstandyqtardyń Lenıngrad qalasyn qorǵaýǵa jáne jaýdan bosatýǵa qatysqanyn, Qazaqstannyń qorshaýdaǵy qalaǵa azyq-túlik, qarý-jaraq, jyly kıim jetkizip turǵanyn tilge tıek ete kelip, soǵys jyldarynda tankige oq ótkizbeýge paıdalanylǵan ferrohromdy Aqtóbe ferroqorytpa zaýyty bergenin atap ótti. Ol sodan keıin bir top aqtóbelik soǵys ardagerlerine «1941-1945 jyldardaǵy Uly Otan soǵysyndaǵy Jeńiske 70 jyl» merekelik medalin jáne eskertkish syılyqty saltanatty jaǵdaıda tapsyrdy. О́z kezeginde aqtóbelikter tarapynan da eskertkish syılyqtar usynyldy. Qonaqtar «Máńgilik alaý» Dańq memorıaly janyndaǵy «Sol jyldarǵa bas ıemiz» aksııasyna qatysty. Keńes Odaǵynyń Batyry Álııa Moldaǵulovanyń memorıaldyq keshenine jáne Batyrlar alleıasyna gúl shoqtaryn qoıdy, qalanyń birqatar kásiporyndary men mýzeılerinde, joǵary jáne arnaýly orta oqý oryndarynda bolyp, eńbek ujymdarymen jáne stýdent-jastarmen kezdesti. Jyly júzdesýler men qyzyqty kezdesýlerdegi pikir alysýlarǵa eki qalanyń yntymaqtastyǵy jáne Uly Jeńistiń 70 jyldyǵy arqaý boldy.
Satybaldy SÁÝIRBAI, «Egemen Qazaqstan».
Aqtóbe oblysy.