Kókiregińde kún tutylmasyn.
***
Dinine berik–
Aınymas serik.
* * *
Túnekti túretin jaryq,
Tarıhty túzetin halyq.
* * *
Baqytty eńbekten,
Shyndyqty jer-kókten izde.
* * *
Sózińniń tosańsýy,
Tilińniń bosańsýy.
* * *
Shákirt bolsań, ustaz bop oıla,
Bas almaı oqy, bilýge toıma.
* * *
Qaımanaǵa aıtqanyń aıdalaǵa.
* * *
Saıysta – qaıyspa,
Kúreste – tires.
* * *
Aralap baq ne túkpirli ǵalamdy,
Sonda tereń uǵynasyń adamdy.
Muzafar ÁLIMBAEV, Qazaqstannyń halyq jazýshysy.
Almaty.
JAQSYLARDYŃ JAZBALARY
Qazynasy mol Qabdolovtyń jeke muraǵatynan taǵy bir qundy málimet tabyldy. Qazaqtyń áıgili aqyny Taıyr Jarokovtyń óz qolymen jazǵan bir aýyz ázil óleńin Zekeń uqyptap saqtap qoıypty. Osydan shırek ǵasyrdaı ýaqyt buryn uzaqqa sozylǵan bir jıynǵa qatysqan aryndy aqyn ábden zerigip, jazýshy inisine óleńmen hat joldaıdy. Qyryq segiz jyl saqtalǵan bul óleńhatqa Z.Qabdolovtyń ózi zamatynda túsinikteme jazyp qoıypty. Uly adamdarynyń tabany tıgen jerden jádigerlik izdeıtin úlgili elderdiń úrdisine salyp, ádebıetimizdiń tarıhynda aıryqsha oryn alatyn osynaý úsh tulǵaǵa (Qajym Jumalıev, Taıyr Jarokov, Zeınolla Qabdolov) qatysty sol óleńdi oqyrmanǵa usynyp otyrmyz.
Amantaı ShÁRIP,
Baýyrjan OMARULY, fılologııa ǵylymdarynyń doktorlary.
* * *
ZEINOLLAǴA!
Qaıraty tal boıynda qajymaǵan,
Qaınaǵan sózdi quıyp qazynadan.
Qolynda qaıyrymy inige mol,
Qasqaıyp otyrǵanda Qajym aǵań,
Aǵaǵa oqta-tekte ini erkeler,
Qoryqpa, qolqalaıtyn bazynadan.
Qolyńdy qaǵa qoımas qapelimde,
Qartaıyp qalmasa eger qajyp aǵań!
Alqynbas alshańkerdiń ózi emes pe,
Ashylsa aı astynda azynaǵan.
T. 14/IV/62.
Z.Qabdolovtyń túsiniktemesi: Qazaqstan Jazýshylar odaǵynda bir úlken jınalys bolyp jatty. Tákeń (Taıyr Jarokov) prezıdıýmda otyrǵan. Men zalda — Qajekeńniń (Qajym Jumalıevtiń) qasynda otyrmyn. Jınalys uzaqqa sozyldy. Tús kezinde de taramady, biz sharshadyq. Sonda Tákeń ekeýimiz alystan ymdasyp, úziliste Qajekeńe erip ketpek boldyq. Tákeń: “Aǵańdy aınaldyra ber, ázirleı ber” dep, erkelep, elbeńdedi de otyrdy. Sonyń bárin maǵan ymmen aıtty, odan qalǵanyn osylaısha óleńdetip, jazyp berdi.
Z.K.