“Astana” alǵa asyǵady

О́tken senbi kúni tańerteń Astana qalasynyń Táýelsizdik ala­ńyndaǵy “Qazaq eli” monýmenti janynda qazaqstandyq “Astana” kásipqoı veloklýbyna qoldaý kórsetý men osy komandanyń kapıtany Alberto Kontadordyń halyqaralyq bedeldi “Tour de France” sýper kópkúndigindegi jeńisi qurmetine arnalǵan aksııa boldy. Shara sheńberinde velosıped sporty sheberleri men áýesqoılary Táýel­sizdik alańynan Saraıshyq-Turan-Syǵanaq kósheleri aralyǵyndaǵy 10 shaqyrym jerdi boılaı ótip, qaıtadan atalmysh alańǵa oraldy. Bul sımvoldyq velojúgirýge Astana qalasy basshylyǵynan bastap, dıplomatııalyq korpýstardyń ókilderi, elordanyń jas velosha­bandozdary, sondaı-aq sporttyń osy túriniń barsha áýesqoılary qatysty. Bul sharaǵa qarap-aq bizdiń eli­mizde taıaýda ǵana aqyryna jetken velojarys qorytyndysyna qansha­lyqty mán men mańyz berilip jat­qanyn anyq ańǵarýǵa bolady. Ra­synda birneshe kún boıy búkil jer-jıhanǵa Astana qalasynyń atyn áldeneshe qaıtara tanytý arqyly Qazaq eliniń de dańqyn aspandatyp shyǵaryp turǵan aıtýly alamannyń jóni bizder úshin júdá bólek. Eger munyń jaıy ózgeshe bolmasa, sol velomarafon jelkildep Parıjdiń túbine jetip, toqaılasa toqtaı sa­lysymen Fransııanyń Prezıdenti Nıkola Sarkozı bizdiń Elbasymyz Nursultan Nazarbaevqa jedelhat jiberip, osynaý jeńispen shyn júrekten quttyqtaı qoıar ma edi! Ágárákı, onyń máni men mańyzy erekshe bolmasy Ispanııanyń Pre­mer-Mınıstri Hose Lýıs Sapa­te­ro óz otandasy bolyp tabylatyn “Týr de Franstyń” jeńimpazy jáne “Astana” komandasynyń ka­pı­tany Alberto Kontadordy sol sapardan eline barǵan betinde bir­den shaqyryp alyp, ózinde qa­byl­dar ma! Al bul kezdesýge sportshy da qur qol bara salǵan joq. Ol óńi­rine “Astana” aty jazylǵan je­ńimpazdyń sary jeıdesin jaqsy jo­ralǵy retinde tabys etti. Sodan keıin Madrıd qalasynyń túbindegi ózi týyp-ósken Pınto qalashyǵyna kelgen ony jerlesteri taıly-tuıaǵy qalmaı talasa kútip alyp, úsh kún­niń túndigin jelpildete toılady-aı deısiz!.. Sol toıdyń tolar shaǵynda Alberto ózi atyn jamylyp júrgen “Astana” komandasynyń jeıdesin jalaý etip jelbirete ustap, qorjy­nynda qalǵan artyqtaryn tábárik syndy etip elge taratyp qaıtty. Bile bilgenge, osynyń bári – biz­diń Astanamyz úshin naǵyz na­sıhat. Budan qaldy, bizdiń baıta­ǵy­myz atyn ózimizshe kókke kóterip, myń-san kún madaq jyryn mazdata bergennen góri, onyń alaman jo­lyn­daǵy qym-qıǵash qyrqalar qyl­tasynda habar júrgizýshilerdiń aýzymen oqtyn-oqtyn qaıtalanyp aıtyla túsýi áldeqaıda ótimdi shy­ǵatyny taǵy aqıqat. Mine, Al­ber­to jáne onyń komandasynyń ke­shegi aptanyń jeksenbisiniń keshin­de bizge syılaǵan jarqyn jeńisiniń bir qudireti osynda jatyr! Son­dyq­tan kópkúndiktiń kerýenin bas­taǵan saıypqyran men onyń osyndaı tabysqa jetýine járdem jasaǵan jigitterge qandaı qoshemet kórsetseń de jarasar edi. Bul jerde astanalyq komanda­nyń burynnan kele jatqan tur­ǵy­lyqty lıderi Aleksandr Vınoký­rov­tyń aıryqsha eńbegine de ar­naıy toqtalyp ótpeske bolmaıdy. Másele, onyń eki jylǵy dıskva­lı­­fı­­­ka­sııadan keıin úlken sport­qa qaı­ta oralǵanynda ǵana emes. Jurttyń bárine súıkimdi Vıno jaı kelip qoıa salǵan joq, ol óziniń áli álemdegi myqty shabandozdardyń qatarynda ekenin tamasha etip tanytyp berdi. Biz biletin Vıno­ký­rov – eń aldymen komandanyń ortaq tabysy úshin óziniń jeke múddesin qurban etýge qaıyl tura­tyn kóshbasshy. Ol osy joly da sol maqsattyń údesinen tabylýǵa umtylyp baqty. Bıyl “Týr de Frans” báıgesine jetinshi márte qatysyp qaıtqan Sashanyń ózimiz sóz etip otyrǵan týrnedegi taǵy bir tabysy, jalpy esepte Alberto­nyń jeńiske jetýine jol ashyp be­r­ip qana qoımaı, ózi de eki kezeńniń máresi basynan tabyla bildi. Jal­py, Vınokýrovtyń osy ýaqytqa deıin “Astana” komandasyna si­ńir­gen eńbegi ushan-teńiz. Ol bul ko­mandanyń sapynda úlken ótkelekti joldardan ótýmen birge, onyń talaı tolaǵaı toıynyń kýási de boldy. Basynda velosporttaǵy qyzmetin komandanyń qolbalasy taqylettes gregarıı bolyp basta­­ǵan ol keıin kele biraz ýaqyt onyń kapıtandyǵynyń da tizginin ustady. Al qazir oıynshy-jattyqtyrýshy mindetin atqaryp júr. Endi birer sóz bas keıipker – Al­berto Kontador Velaskastyń ózi jóninde. Osymen úshinshi ret “Týrdy” jeńip alyp otyrǵan onyń 2007 jyly bul ataqqa alǵash qol jetkizgenin budan buryn aıtqan­byz. Ol osy jetistigimen 1991-1995 jyl­dar aralyǵynda qatarynan 5 ret jeńiske jetken Mıgel Indý­raın­­nan keıin sol “Úlken tuzaq­tyń” tuǵyryna qonǵan birinshi ıspandyq atandy. Sonymen birge 97 jyldyq tarıhy bar “Týrdyń” jylnama­synda Alberto onyń bir­de-bir kezeńinde jeńiske jetpeı-aq jalpy esepte birinshi orynǵa shyq­­qan al­tynshy veloshabandoz boldy. Osy­nyń aldynda mundaı kórset­kish­ti taǵy bir ıspandyq Oskar Pe­reıro 2006 jyly kórsetip edi. Bi­raq ol bul jolǵy alamanǵa kelmeı qaldy. Qazir belgili bolǵany, endi Al­berto Kontador ózine eki ret “Týr de Fransty”, bir-birden “Djıro” men “Výeltany” jeńip alýǵa kó­mektesken “Astana” komandasymen kelisim-shartty maýsym sońyna qa­raı úzetinin málimdep otyr. Ol jyldyń aqyrynda Lıýksembýrgtiń “Saxo Bank” komandasynyń sapy­­nan tabylyp qalýy ábden yqtımal. Al bul komandadaǵy aǵaıyndy Frenk jáne Endı Shlekter Lıýk­sem­býrgte ózderiniń jeke koman­da­syn quryp ketpekshi. Sondyqtan komandanyń bas menedjeri Bıarne Rııs ózi kópten kózin qadap júrgen Kontadordy solardyń ornyn basý úshin almaqshy kórinedi. Ol bizdiń kapıtanmen “Týrdyń” sońǵy kún­deri-aq bir mámilege kelip qoıǵan sııaqty. Al Fransııa joldarynda jan alysyp, jan berisken shaıqas júrip jatqan kúnderi Alberto ózi­niń kontraktini tek “Astanamen” jasasatynyn áldeneshe márte qaı­talap aıtqan da edi-aý! Degenmen, endigi jerde myna kelisimniń bir bóligi retinde “Astana” komanda­syn­daǵy basqa ıspandar – Bend­jamın Noval, Danıel Navarro, Devıd de la Fýente jáne Hesýs Er­nandes – barlyǵy birdeı Kon­ta­dor-Rııs tandemi qataryna ótip qalatyn túrleri bar. Sholýshylar qazirgi kúnderi sonymen birge Shveısarııa komandasyndaǵy taǵy bir ıspandyq – Fabıan Kanchel­la­ranyń da osy saptan tabylyp qa­lýy múmkin ekenin aıtyp otyr. Onda bul komanda áp-sátte birden Dream Team komandaǵa, ıaǵnı juldyzdar shoǵyryna aınalyp shyǵa kelmek! Jasyratyn nesi bar, Qazaqstan velosport federasııasy Alberto Kontadordyń kelisim-shartty so­zýdan bas tartatyny týraly habar­dy basynda onshalyqty jaıly qabyldaı alǵan joq. “Bizdiń ke­lisim-shart boıynsha oǵan usynyp otyrǵan somamyz, qazirgi velosport ólshemi boıynsha, aıtarlyqtaı kó­lemdi”, – deıdi osy rette federa­sııanyń bas hatshysy Valentın Re­hert. Al bizge jetken keıbir derek­kózderge qaraǵanda, Kontadordyń “Astanadaǵy” jyldyq jalaqysy 5 mln. eýrony quraıdy eken. Demek, “Saxo Bank” komandasynyń usy­nyp otyrǵan jalaqysy budan da joǵary bolýy tıis. Osy rette me­nedjer Rııs óz komandasy úshin ja­ńa demeýshilerdi tapqanyn ja­syryp otyrǵan joq. “Bul kelisim-sharttyń materıaldyq jaǵy Al­bertonyń menedjeri bolyp taby­latyn týǵan baýyryn da qanaǵat­tandyryp otyrǵan bolýy kádik. Biz muny tolyǵynan túsinemiz”, – deıdi kelesi kezekte “Astana” ko­man­dasynyń dırektory Dmıtrıı Sedýn. Al jańa shabandozdarmen tolyqqannan keıin “Saxo Bank” óziniń ataýyn ózgertetinge uqsaıdy. Osy kúnderi “Astana” koman­dasynyń 2011 jylǵy quramyndaǵy sportshylar sany birshama qysqar­ǵaly turǵany da belgili bolyp qal­dy. Federasııanyń bas hatshysy komandanyń bıylǵy sapyndaǵy veloshabandozdardyń 50 paıyzyn qazaqstandyqtar quraǵanyn, ıaǵnı 27 sportshynyń 13-i jergilikti jastar bolǵanyn aıta kelip, kelesi jyly bul mólsherdiń budan da azaıa túspegin málim etti. Sebebi, syrttan taǵy 2-3 sportshy alynbaqshy eken. Sonymen birge ol elimizden ke­tip jatqan tarlandardyń oryn­daryn basa alatyndaı perspek­tıvaly jastardyń ósip kele jat­qanyn da aýyzǵa aldy. “Biraq bı­yl­ǵy jyly olardy komanda qur­a­myna tartý josparǵa enbegen, – dedi V.Rehert osy oraıda. – Sha­masy, bul jumys 2012 jyly qolǵa alynyp qalatyn shyǵar. Ázirge bul jastar áli jetilip-pisken joq”. Alaıda, bizge bas hatshynyń endi kimderge quda túspek oılary bar ekeni belgisiz. Aıtatyny joq, Parıjdiń Elı­seı alańynda attyń basyn irikken alaman onyń jeńimpazdary men júldegerine de aıtarlyqtaı kólem­de qarjylaı tabystar da alyp kel­di. Osy kúnderi Halyqaralyq ve­losıpedshiler odaǵynyń basshy­ly­ǵy “Úlken tuzaq-2010” jarysynyń qorytyndysy boıynsha komanda­lardyń “Týrdy” uıymdasty­rý­shy­lardan qanshalyqty mólsherde syıaqy alatyndaryn jarııa etti. Munda bárinen de kóp tabys tap­qany “Astana” komandasy boldy. Onyń ujymy osy jetistigi úshin 488 886 eýro aqsha alady. Budan ári úshtikti túzgen “Saxo Bank” jáne “Rabobank” komandalaryna tıi­sin­she 292 392 jáne 192 978 eýro mól­she­rinde syıaqy tapsyrylady. Ko­mandalar arasynda osy báıgeden keıin reıtıngisi eń joǵary bol­ǵany da “Astana” bolyp otyr. Ol týr bitken boıda shyǵarylǵan esep boı­ynsha 884 upaıǵa ıe bolyp, óziniń kóshbasylyq qalpyn saqtap qaldy. Alǵy kúnderge asyqqan “Asta­nanyń” dál qazirgi tańdaǵy ahýaly osyndaı. Serik PIRNAZAR, Astana. Elordalyqtar ázirshe alda Osy jazdan bas­tap elimizde al­ǵash ret Qazaqstan boks federa­sııa­sy­nyń kýbogy jo­lyndaǵy báse­ke­ler­diń ótkizile bastaǵany belgili. Qazir atalmysh kýbok jolyndaǵy jekpe-jekter “Ba­tys”, “Shy­­ǵys”, “Soltústik” jáne “Ońtústik” dıvızıony bolyp bólingen 14 oblys pen Astana jáne Almaty qalalarynyń boksshylary arasynda ótip jatyr. Bul aıqas­tar­dyń alǵashqysy 17 shilde kúni Aq­taýda, odan keıingisi Atyraý qalasynda ótkeni málim. Endi kezek “Shyǵys” dıvızıonyna kiretin komandalarǵa kelip otyr. Senbi kúni sonyń alǵashqysy Astanada jergilikti boksshylar men Pavlodar oblysynyń komandalary arasynda ótti. Bul jekpe-jekte as­tanalyqtar Kereký óńiriniń boks­shylarynan 6:4 esebimen basym tústi. Qorytyndy esep, elordalyq komanda úshin kóńil kónshiterlik dese bolady. Degenmen, komanda sa­pynda Londonǵa tájirıbe jı­naqtaý úshin ketken biraz boks­shylar bolǵanynda astanalyqtar qarsylastaryn budan da iri eseppen jeńetin múmkindigi bolatyn edi. Al jalpy, osylaı desek te bul jekpe-jekte Pavlodar oblysy­nyń komandasy jaqsy qyrynan kórinip, Astana komandasymen ıyq teńes­tirip básekelese alatynyn kórsetip berdi. Munda asa aýyr salmaq­taǵy kópten beri kózge túspeı júrgen Dmıtrıı Gotfrıd astana­lyq Er­mek Úsenovti 10:3 esebi­men usta, 91 kılo sal­maqtaǵy sport sheberi, bıyl Aqtóbede S.Qonaq­baev atyndaǵy halyq­ara­lyq týrnırde ekinshi oryn alǵan Sergeı Gon­charov Iýrıı Zadoroj­nyıdy bi­rin­shi raýndta-aq qulatyp sala jaz­dady. Esep – 5:0. Sol sııaqty 71 kılo sal­maq­taǵy 82 kezdesý ótkizip, sonyń 65-de jeńiske jet­ken taǵy bir kerekýlik sport sheberliginen úmitker Danat Iman­bekov astanalyq Qaırat Ersulta­novty 7:5, osy kezge deıin 200 ret jekpe-jekke shyǵyp, sonyń 160 kezdesýinde mereıi ústem bolǵan halyqaralyq dárejedegi sport sheberi Azamat Smaǵulov (64 kg.) ózinen tájirıbesi azdaý Almat­bek Aǵybaevty 5:3 esebimen jeń­genin atap ótkenimiz jón. Degen­men, bul kezdesý Azamat sııaqty 2006 jyly Marokkoda ótken álem chempıona­ty­nyń fınalısi úshin oń bolǵan joq. Qarsylasynan tájirı­besi azdaý bolsa da Almatbek shar­shy alań­da kerekýlik boksshymen baryn salyp qolǵap túıistirdi. Bi­raq tájirıbe degen ózin kórsetpeı qoımaıdy eken. Sońǵy raýndta osyny paıdalanyp, Azamat qarsy­la­syn soqqyǵa alyp, aqyry de­genine jetti. Osy kúni 56 kılo salmaqta óner kórsetken Qanat Ábýtálipov te (56 kg.) óziniń tájirıbesin paıdalanyp, kerekýlik Farhat Dúısebekovti utsa, taǵy bir astanalyq boksshy Baqytjan Qojabekov (69 kg.) Sergeı Skakýndy 8:3 esebimen ádemi jeńdi. Sonymen birge osy kúni Astana komandasynyń múshe­leri Ilııas Súleımenov (49 kg.), Azat Mahmetov (52 kg.), Dýman Áli­mov (60 kg.), Azamat Belgibaev (81 kg.) óz salmaqtarynda basymdylyq tanyt­ty. Al jarystyń sońynda ekinshi raýndta qarsylasynyń qabaǵyn jara jazdaǵan Dýman Álimov tehnıka jaǵynan eń úzdik boksshy atansa, kerekýlik Dmıtrıı Gotfrıd quramalyq jekpe-jekterdiń eń úzdiń boksshy ataǵyna ıe boldy. Jarys kezinde Qazaqstan Boks federasııasynyń úılestirýshileri Bolat Abdrahmanov pen Bolat Mankenov jekpe-jekke shyqqan boksshylardyń bárin marapattap, syı-syıapat kórsetti. Dastan KENJALIN. Jarystar kúndeligi Sambo. Qazaqstan quramasy Reseı Federasııasy Prezıden­ti­niń Kýbogy úshin týrnırde úsh­tiktiń quramyna kirdi. Fınalda Belarýs eli samboshy­laryn 7:2 esebimen utqan Reseı komandasy osymen tórtinshi ret Kýbokty ózderinde qaldyrdy. Al bizdiń jigitter úshinshi oryn úshin bol­ǵan talasta ýkraın balýandaryn tize búktirdi. Grek-rım kúresi. Taıland as­tanasy Bankgok qala­synda jasóspirimder arasynda ótken Azııa chempıo­natynan Qazaqstan quramasy 2 altyn, 1 kúmis jáne 3 qola medal alyp qaıtty. Birinshi orynǵa Aıbek Mardanov (42 kg) pen Rashıd Kochıev (76 kg), ekinshi orynǵa Azamat Dúmbırov (69 kg), úshinshi orynǵa Meıram­bek Aınaǵulov (46 kg), Maqsat Aıtbekov (54 kg) jáne Jaıdar Dýashtegi (100 kg) kóterildi. Balýandar munda on salmaq dárejesi boıynsha júldeli oryndardy sarapqa saldy. Voleıbol. Qazaqstannyń erler qurama komandasy Irannyń Ýrýmı qalasynda 7 tamyzda bastalǵan II Azııa Kýbogy úshin týrnırge qatysyp jatyr. 7 tamyzda márege jetetin jarysqa qatysýshy 8 koman­da eki topqa bólinip oınaýda. “V” tobyna tús­ken bizdiń jigitterdiń qarsylas­tary – Japonııa, Koreıa jáne Avstralııa voleıbolshylary. Toptan ozǵan eki komanda 5 tamyz kúni shırek fınaldyq, 6 tamyzda jartylaı fınaldyq kezdesýler ótkizedi. Velosport. Qytaıda márege jetken “Sınhaı kóli týrnıriniń” qorytyndysynda úndistandyq Hoseın Askerı bas báıgege qol jet­kizdi. Ekinshi orynǵa hor­vat Radoslav Rogına shyqsa, úshinshi oryn amerı­kalyq Kel Reınenge buıyrdy. Al qazaqstandyqtar ishi­nen alda bolǵan Aleksandr Shý­shemoın 15-shi, Rýslan Tileý­baev 24-shi oryndarǵa taban tiredi. Myltyq atý. Pavlodarlyq Vıacheslav Podlesnyı myltyq atýdan Mıýnhende (Germanııa) ótip jatqan álem chempıonatynda sensasııa jasady. Ol shaǵyn kalıbrli pıstoletten 50 metr qashyqtyqta nysana kózdeýden japon Tomoıýkı Masýda men koreı Dae Mýn Lıden keıingi úshinshi orynǵa ornalasty. Tórt jylda bir ret ótetin bul álemdik básekeniń júldegerleri sonymen birge 2012 jylǵy London Olımpıadasynyń lısenzııasyna da ıe boldy. Fýtbol. О́tken senbi-jeksenbi kúnderi elimiz Premer-lıgasy 21 týrynyń oıyndary ótti. Olar mynadaı nátıjeler ákeldi: 31 shilde. “Aqtóbe” – “Taraz” 2:1, “Tobyl” (Qostanaı) - “Ertis” (Pav­lo­dar) 4:1. 1 tamyz. “Lokomotıv” (Astana) - “Jetisý” (Tal­dyqorǵan) 1:0, “Ordabasy” (Shymkent) – “Qaı­rat” (Almaty) 1:0, “Shahter” (Qaraǵandy) – “Aty­raý” 0:1, “Aqjaıyq” (Oral) – “Oqjetpes” (Kók­she­taý) 2:0. Munyń aldyndaǵy 20 týrdyń 26 shilde kúni oınalǵan “Lokomotıv” (Astana) – “Ordabasy” (Shym­kent) arasyndaǵy matchynda alań ıeleri 1:0 ese­bimen utty. Sol sııaqty “Taraz” - “Shahter” (Qa­raǵandy) komandalary kezdesýi, buryn habarlaǵany­myzdaı, 1:1 emes, 1:5 esebimen aıaqtaldy. Chempıonattaǵy mergender kóshin myna oıynshylar bastap keledi: Nurbol Jumasqalıev (Tobyl) – 10, Ulyqbek Baqaev (Tobyl) – 10 (3), Georgıı Das­kalov (Ertis) – 9 (1), Igor Bý­gaev (Lokomotıv) – 9 (2), Gleb Mal­sev (Ertis) – 8, Murat Tile­shov (Aqtóbe) - 7, Mozes Sakı (Aqjaıyq) – 7 (2). Aýyr atletıka. Taldyqor­ǵan­da elimizdiń erler men áıelder arasyndaǵy kezekti chempıonaty bas­taldy. Qyrkúıekte ótetin álem birinshiligi aldyndaǵy basty emtıhan bolyp tabylatyn bul dodaǵa barlyq aımaqtardan 200-den astam kúshti atlet qatysýda. Birinshiliktiń birinshi kúni 56 kıloǵa deıingi salmaqta erler júldegerlerdi anyqtady. Munda qossaıysta 247 kg salmaq kóter­gen Almaty oblysynyń ókili Vı­talıı Son chempıon atandy. Kú­mis medaldy al­mat­ylyq Shyń­­­ǵys Júsipbaev, qola medal­dy Aq­mola oblysynyń atleti Dmıt­rıı Shýbaba enshiledi. “Egemen-aqparat”.