ALMATY. 27 qańtar. Shymbulaq týrıstik kesheniniń aýmaǵynda serýenge shyqqan polshalyq týrıstiń máıiti tabyldy. Bul týraly Almaty qalalyq tótenshe jaǵdaı departamentiniń baspasóz qyzmetine silteme jasaǵan egemen.kz tilshisi habarlady.
«112» nómirine serýenge shyqqan týrıstiń iz-túzsiz ketkeni týraly habar túsken boıda izdeý salyndy. Kóp keshikpeı týrıstiń polshalyq ekeni, onyń saparǵa shyǵatyn kezde áriptesterimen aqyldaspaǵany, qaı baǵytta júretini týraly eshkimge eshqandaı málimet qaldyrmaǵany da anyqtaldy.
Izdeý sharalaryna barlyǵy 21 qutqarýshy, 6 tehnıka jumyldyryldy. Sondaı-aq, arnaıy topqa Shymbulaq taý-shańǵy kesheniniń 4 shańǵyly patrýli, 1 tikushaq qatysty. Úsik shalyp qatyp qalǵan týrıstiń máıiti Talǵar shatqalynyń sol qaptalynan tabyldy.
Talǵat Súıinbaı.
Derek, sýret: Almaty qalalyq tótenshe jaǵdaı departamentiniń baspasóz qyzmeti.