ASTANA. 27 qańtar. Japonııanyń Toyota avtokonserni 2015 jyly álem boıynsha eń kóp kólik satqan kompanııa atandy. Bul týraly interfax.ru saıtyna silteme jasaǵan egemen.kz tilshisi habarlady.
Kompanııa basshylyǵynyń aıtýynsha ótken jyly álemniń túkpir-túkpirine 10,15 mıllıon mashına satqan. Onyń qataryna Daihatsu Motor Co jáne Hino Motors Ltd bóliminiń kólikteri de kiredi. Alaıda, bul kórsetkish 2014 jylmen salystyrǵanda 0,8 paıyzǵa quldyraǵan.
Toyota kompanııasy kólik satý boıynsha, álemdik deńgeıde sońǵy 8 jyldyń jeteýinde kósh bastap keledi. Tek 2011 jyly joıqyn jer silkinisi men topan sýdyń saldarynan der kezinde óz qalyptaryna kelip, kólik satýdy jalǵastyra alǵan joq. Japonııa avtokonserniniń báskelesteri retinde sanalatyn nemistiń Volkswagen AG kompanııasy ótken jyly 9,9 mıllıon kólik satyp, kórsetkish boıynsha ekinshi orynǵa jaıǵasty. Al AQSh-tyń General Motors korporasııasy 9,8 mıllıon sanymen úshinshi oryndy ıelendi.
Aıta keteıik, Volkswagen AG avtokonserni sońǵy kezderi daýdan aryla almaı keledi. AQSh pen Ońtústik Koreıa memleketteri kólik ishinde qorshaǵan ortaǵa taraıtyn qaldyqtardy azaıtyp kórsetetin qurylǵy ornatylǵanyn anyqtady. Osyǵan baılanysty ekologııalyq talaptardy oryndamady degen aıyppen birneshe mıllıon dollar kóleminde aıyppul salynýy múmkin.
Aıan Ábdýálı.
Derek: interfax.ru.
Sýret: ftimes.ru.