«Egemenniń» ústimizdegi jylǵy 8 qańtardaǵy «Parlament» arnaýly betinde Májilis depýtaty Gúlnár Seıitmaǵambetovanyń «KaspııBank» AQ Aqtaý fılıalynyń qyzmetkeri N.Abdollaevanyń zańsyz áreketterge baryp, azamat M.Mahanovanyń syrtynan jalǵan qujat jasaý arqyly onyń atynan 3 mln. teńge nesıe alǵany týraly, mundaı oqıǵa bir bul emes ekeni týraly dabyly jaryq kórgen bolatyn.
M.Mahanovanyń aryzy boıynsha qozǵalǵan qylmysty istiń barysynda Ekonomıkalyq jáne sybaılas jemqorlyqqa qarsy kúres departamenti bank qyzmetkerleri tarapynan shyn máninde jalǵyz Mahanova emes, odan basqa da 40-qa jýyq adamnyń syrtynan osyndaı jalǵan nesıelik shart jasaý jolymen qarajat qymqyrylǵanyn anyqtaǵan. Sóıtip, N.Abdollaeva Aqtaý qalalyq sotynyń sanksııasy boıynsha qamaýǵa alynǵan eken. Alaıda onyń «qashyp ketýine» baılanysty qylmystyq isti júrgizý toqtatylǵan, al qymqyrylǵan qarjyny bank qyzmetkerleri M.Mahanovadan óndirý nıetinen qaıtpaı, oǵan áli kúnge eskertpeler men hattar jazýlaryn qoıar emes kórinedi. Osy jáıtterdi aıta kelip, depýtat Bas prokýratýradan «Kaspıı Banktiń» Aqtaý fılıaly qyzmetkerlerinen zardap shegýshilerdiń quqyǵyn qorǵaý qajettigin suraǵan edi.
Jýyrda osy dabylǵa baılanysty «Egemenge» Bas prokýratýranyń apparat basshysy J.Shámshıevten jaýap kelip, onda G.Seıitmaǵambetovanyń kótergen máselesi boıynsha sharalar qoldaný úshin tekseris jumystarynyń bastalǵany jáne ol Bas Prokýrordyń baqylaýyna alynǵany habarlanypty.
«Egemen aqparat».