Atyraýda gasterbaıterlerdi bopsalaǵan 2 polıseı sottaldy

ATYRAÝ. 30 mamyr. Atyraý qalalyq №2 sotynyń úkimimen qalalyq ishki ister basqarmasynyń eki polıseıi 4 jyl merzimge bas bostandyǵynan aıryldy. Bul týraly oblystyq sottyń baspasóz qyzmetine silteme jasaǵan egemen.kz tilshisi habarlady. «Tergeý deregine sáıkes, polısııa qyzmetkerleri 2015 jyldyń shilde aıynan bastap Atyraý qalasynda júrgen О́zbekstan Respýblıkasynyń azamattaryna ózderin kóshi-qon polısııasy qyzmetkerleri retinde tanystyryp, olardy qorqytyp aqshalary men uıaly telefondaryn ashyq tonaǵan. Sóıtip, olar birneshe ret О́zbekstan Respýblıkasynyń 5 azamatyn zańsyz ustap, olardan 800 myń teńgeden astam qarjyny jymqyryp alǵan» dep habarlady Atyraý oblystyq sotynyń baspasóz hatshysy Boranbaı Ǵalıev. Sot úkimimen polısııa qyzmetkerleri Qylmystyq kodekstiń 191- babynyń 2 - bóliginiń 2, 3-tarmaqtarymen, 190-babynyń 3-bóliginiń 2-tarmaǵymen kózdelgen qylmystyq áreketteri úshin kináli dep tanyldy. Sóıtip, olarǵa quqyq qorǵaý organdarynda laýazym atqarý quqyǵynan ómir boıyna, sonymen birge, 4 jyl merzimge bas bostandyqtarynan aıyrý jazasy taǵaıyndaldy. Joldasbek Shópeǵul. Derek: Atyraý oblystyq sotynyń baspasóz qyzmeti. Foto: inform.kz.