Jumysyn jeli arqyly jandandyrǵan

Elimizde ulttyq naqyshta oıý-órnek toqyp, qazaqtyń tól týyndysyn nasıhattap otyrǵan toptar bar. On saýsaǵynan óneri tamǵan sondaı qolóner sheberleri qatarynda múmkindigi shekteýli azamattar da kezdesedi. Taǵdyrdyń teperishine qarsy turǵan, sondaı sheberlerdiń biri – Jeńiskúl Dáýletova búginde áleýmettik jeli arqyly tapsyrys qabyldap, jumys jasaýdy júzege asyryp keledi. Budan jeti jyl buryn apatqa ushyrap, tósek tartyp jatqanda, ájesi qolyna ıne-jip ustatyp, tiginshilikke baýlyǵan eken. Alǵashynda áýestikpen bastalǵan tiginshilik óneri qazir tabys kózine aınaldy. Búginde ol óz bilgenin ózgege úıretip, jastardy ónerge baýlýda. Jeńiskúldiń feısbýk paraqshasy arqyly alys-jaqyn shetelderden de tapsyrys túsedi eken. Kózdiń jaýyn alatyn túrli buıymdarǵa degen suranys kún saıyn artýda. «Ásirese, sheteldikter bizdiń qoshqar múıizben jasalǵan tuskıiz, jastyq sııaqty  buıymdarymyzǵa tapsyrys beredi», – deıdi ol. Bıylǵy jyly sheber qazaqy qol ónerdiń barlyq túrlerin, ásirese, suranysqa ıe qyz jasaýyn jasaýdy, ádemi naqyshtaǵy oıý-órnekti  kıimder tigýdi qolǵa almaqshy. – Qarjy bolsa, qala ortaly­ǵynan sán úıin ashyp, jastardyń  tól ónerimizge  kelýine óz úle­sim­di qosqym keledi, – deıdi Jeńis­kúl. Ulttyq boıaýy qanyq otan­dyq ónim­derimiz sheteldikter sura­nysyn qanaǵattandyryp, ozyq tanylyp jatsa, qanekı! Aıman MUQYShEVA