Dollarsyzdandyrý saıasaty depozıt naryǵyna qalaı áser etti?

Ekinshi deńgeıdegi bankterdegi depozıtterdiń valıýtalyq qurylymy tepe-teńdikke umtylýda. Ulttyq banktiń habarlaýynsha, 2016 jyldyń qorytyndylary boıynsha ekinshi deńgeıdegi bankterdegi depozıtterdiń dollarlandyrý deńgeıi (depozıtterdiń jalpy kólemindegi shetel valıýtasyndaǵy depozıtterdiń úlesi) 2016 jylǵy qańtardaǵy eń kóp 69,9%-dan tómendeı otyryp, 54,6%-dy qurady. Zańdy tulǵalardyń depozıtteriniń qurylymynda tómendeý 62%-dan 49%-ǵa deıin, jeke tulǵalardiki 80%-dan 62%-ǵa deıin boldy. 2016 jyly teńgedegi depozıtter 66,4%-ǵa nemese 3,3 trln. teńgege ulǵaıdy, al shetel valıýtasyndaǵy depozıtter 9,9%-ǵa nemese 1,1 trln. teńgege tómendedi. Teńgedegi depozıtter kóleminiń ósýine ulttyq valıýtadaǵy jınaq aqshanyń tartymdylyǵyn arttyrý jónindegi sharalar, sondaı-aq ishki valıýta naryǵyndaǵy ahýaldyń turaqtanýy yqpal etti. Dollarsyzdaný sheńberindegi barynsha tıimdi shara halyqtyń depozıtteri boıynsha mólsherlemelerdiń eń kóp deńgeıin ózgertý boldy. 2016 jylǵy 1 aqpannan bastap Ulttyq Bank jeke tulǵalardyń teńgedegi depozıtteri boıynsha eń kóp usynylǵan mólsherlemeni 10%-dan 14%-ǵa deıin kóterdi jáne shetel valıýtasyndaǵy depozıtter boıynsha 3%-dan 2%-ǵa deıin tómendetti. 2016 jyly AQSh dollaryna qatysty teńgeniń nyǵaıýy 2,0%, eýroǵa qatysty – 5,1% boldy,bul shetel valıýtasyndaǵy depozıtter boıynsha eń kóp mólsherlemeni shekteýdi eskere otyryp shetel valıýtasyndaǵy jınaq aqshanyń ekonomıkalyq oryndylyǵyn tómendetti. Ulttyq Banktiń saıasaty odan ári de ulttyq valıýtanyń tartymdylyǵyn arttyrýǵa jáne teńgedegi quraldardyń barynsha joǵary kiristiligin qamtamasyz etýge baǵyttalatyn bolady.