Onyń aıtýynsha, elde neonataldyq ólim kórsetkishi ár 100 myń nárestege shaqqanda 3,9-dy quraıdy. Bul nátıjege densaýlyq saqtaý salasyndaǵy júıeli jumys pen jańa tásilderdiń engizilýi áser etken.
Atap aıtqanda, Qazaqstanda patronajdyq baqylaýdyń ámbebap progressıvti modeli (ÁPPM) damyp keledi. Bul júıe júkti áıelder men jas balasy bar otbasylarǵa medısınalyq qyzmetkerlerdiń úıge baryp, turaqty túrde baqylaý júrgizýin qamtıdy. Sonyń arqasynda dárigerler densaýlyq jaǵdaıyn erte kezeńde qadaǵalap, aýrý qaýpin jáne áleýmettik faktorlardy der kezinde anyqtaı alady. Sonymen qatar ata-analarǵa bala kútimi, durys tamaqtandyrý jáne damý máseleleri boıynsha keńes beriledi.
Otbasynyń jaǵdaıyna qaraı baqylaý deńgeıi ártúrli bolady, bul ásirese halqy sırek qonystanǵan óńirlerde medısınalyq kómektiń qoljetimdiligin arttyrýǵa múmkindik beredi.
Birlesken esepke sáıkes (Dúnıejúzilik densaýlyq saqtaý uıymy, Birikken Ulttar Uıymy jáne basqa da halyqaralyq uıymdar), 2024 jyly Qazaqstandaǵy kórsetkish 3,9 deńgeıinde bolyp, aımaqtaǵy eń tómen nátıje retinde tirkelgen. Bul kórsetkish AQSh deńgeıine (3,7) jaqyn.
Mamandardyń aıtýynsha, ana men bala ólimin azaıtý – ásirese halqy shashyrańqy ornalasqan elder úshin kúrdeli mindet. Degenmen Qazaqstan bul baǵytta turaqty nátıjeler kórsetip, basqa memleketterge úlgi bola alady.
Polısııa qyzmetkeri úsh aılyq nárestesi bar otbasyny óz úıinde panalatty
Aıta keteıik, buǵan deıin IýNISEF álemde balalar ólimin azaıtý qarqyny baıaýlaǵanyn da habarlaǵan bolatyn.
