Fırýza Sháripova Avstralııada jekpe-jek ótkizýi múmkin

Qazaqstandyq boksshy qyz Fırýza Sháripovanyń menedjeri Sergeı Zavıleıskıı Avstralııada jekpe-jek ótkizý usynysy jaıynda aıtyp berdi. Bul týraly vesti.kz habarlady. «Bizge 26 naýryzda Avstralııada Deanna Hobbspen judyryqtasý týraly usynys túskeni ras. Ol BoxRec reıtıngi boıynsha segizinshi orynda tur. Eki jekpe-jek ótkizgen jáne ekeýin de ýaqytynan buryn aıaqtaǵan. Bizge myqty qarsylas bolaıyn dep tur. Eger Reseı nemese Qazaqstanda jekpe-jek ótkizý usynylǵanda esh qıyndyq bolmaıtyn edi. Biraq Avstralııaǵa barý jáne ol jaqqa úırenýdiń ózi biraz ýaqytymyzdy alady. Osyǵan baılanysty biz áli naqty sheshimge kelmedik. Onyń ústine gonorar kólemi azdaý, ony arttyrýyn suradyq. Al ekinshi jaq bul týraly oılanyp jatyr. Negizi budan ózge de usynystar bar», – dedi Zavıleıskıı «Jalpy, bizge osy deńgeıdegi qarsylastar kerek. Fırýzany Eýropada, Avstralııada, Amerıkada jaqsy tanıdy. Biraq ózi osy jekpe-jeke qulshynyp otyr. Sondyqtan jaqyn arada jan-jaqty oılap, bir sheshimge kelemiz», – dedi menedjer. Aıta keteıik, Fırýza Sháripovanyń kóktemde chempıondyq ataqqa talasýdy josparlap júrgeni habarlanǵan.