Astanada Ýnıversıadanyń Alaý estafetasy bastaldy

Astanada QR Prezıdenti Nursultan Nazarbaevtyń qatysýymen Búkilálemdik 28-shi qysqy Ýnıversıadanyń Alaý estafetasy bastaldy. Aldymen Elbasy Ýnıversıadaǵa qatysatyn Qazaqstan quramasynyń kapıtany bıatlonshy Dáýlet Raxymbaevqa elimizdiń Týyn tabystady. О́z kezeginde Raxymbaev Qazaqstan quramasy jarystarǵa tolyǵymen daıyn ekendigin baıandady. Elordadaǵy estafeta eki kezeńge bólingen. Alaýgerler úsh jarym saǵat boıy qalanyń ortalyq kóshelerimen júgirip ótedi. Alǵashqy kezeń «Nazarbaev Ýnıversıtetinen» bastalyp, «Báıterek» monýmentine deıin jalǵasady. Ekinshisi - «Báıterek» monýmentinen qaıta bastaý alyp, oń jaǵalaýdaǵy qalalyq ákimdik alańynda aıaqtalady. Estafetanyń jalpy uzaqtyǵy 12 shaqyrymdy quraıdy. Alaýdy barlyǵy 60 alaýger alyp júredi.  Sportshylardan bólek, 28-shi qysqy Ýnıversıada alaýyn qoǵam qaıratkerleri, belsendi oqý ozattary jáne tanymal qazaqstandyq shahmatshy Dınara Sádýaqasova alyp júrmek. Al Ýnıversıadanyń Almatyda ótetin ashylý saltanatyna elorda  atynan qazaqstandyq hokkeıshi, astanalyq «Barys» klýbynyń qorǵaýshysy Madııar Ybyraıbekov  qatysady. Odan keıingi bes kún ishinde respýblıkanyń barlyq oblys ortalyqtary óz Alaýlaryn jaǵatyn bolady. Sońynda alaý Ýnıversıada astanasy Almaty qalasyna jetkiziledi. Barlyǵy estafetaǵa 1 myńǵa tarta alaýger qatyspaq. Jalpy alaý estafetasy 22 500 shaqyrymdy eńseredi dep josparlanǵan.