«Jaǵdaı jasalmaı, qysqy sport damymaıdy»

– deıdi ataqty shańǵyshy Ivan Garanın HHVIII Dúnıejúzilik qysqy Ýnıversıada qarsańynda Qostanaıdaǵy óńirlik  estafetanyń alaýyn aty ańyzǵa aınalǵan shańǵyshy, 1976 jylǵy Insbrýkte ótken qysqy Olımpıadanyń  qola júldegeri Ivan Garanın  tutatty. Muny jurtshylyq  jastarǵa, Ýnıversıadaǵa qatysatyn  qostanaılyq, qazaqstandyq sportshylarǵa ataqty  shańǵyshynyń bergen batasyndaı qabyldady. Biz osy saltanatty kórinisten keıin ataqty shańǵyshyǵa birneshe suraq qoıǵan edik. – Ivan Ivanovıch, Ýnı­ver­sıada alaýynyń óńirlik esta­fetasynan sizdi kórgenine jastar óte qýanyshty eke­nin bildirdi, olardyń ys­tyq yqylasynan, qol shapa­laq­taǵan kóńil-kúıinen muny sezgen bolarsyz? – Árıne, meniń de búgingi qýanyshym jastardan kem emes. Bul – úlken mereke. Qysqy Ýnıversıada Qazaqstanda ótedi degen oı buryn eshkimniń túsine de kirmes edi. Búkil TMD elderi tóńireginde Qazaqstan osyndaı dúnıejúzilik sport sharasyn ózinde ótkizý qurmetine ıe bo­lyp otyr. Prezıdent Nursultan Nazarbaevqa, osy sharaǵa atsa­lysqan barlyǵyna alǵysym sheksiz! Mundaı álemdik sport dodasy bizdiń jastardyń qys­qy sport túrlerine, jalpy sport­qa yntasyn oıatady. Pre­zı­dentimiz 2020 jyly halyq­tyń 30 paıyzy buqaralyq sport­pen aınalysatynyn aıt­qan joq pa edi? Biz sol meje­den kórinýimiz kerek. Son­da Qazaqstanda ár úshinshi adam deneshynyqtyrýmen, sport­pen aınalysatyn bolady. О́ıt­keni, sport – ómir, sport – beıbitshilik, sport – jiger, densaýlyq. – Sizdiń jankúıer­leri­­ńizdiń «Ivan Garanın búgin­de qaıda júr, nemen aına­ly­sady eken?» dep izdeýi zań­dylyq qoı? – Oǵan rahmet! Meniń jasym bıyl 71-ge ketti. Biraq qarap otyrǵanym joq, aýyryp kórgen adam emespin. Sport­tyń arqasy ǵoı. Qazir Rýdnyı qala­synda shańǵy sport klýbyn basqaramyn. Oǵan negi­zi­nen sport ardagerleri qaty­sady, osy kezge deıin túrli deńgeıdegi 22 medaldy qan­j­y­ǵa­ladyq. Klýbta arda­­ger­ler arasyndaǵy úsh álem chem­pıony bar: Svetlana Parı­seeva, Marına Osıpova jáne men. Qalada qysqy sport túr­leri­nen, árıne, negizinen shańǵy sportynan túrli jarystar ótkizýge muryndyq bolamyz, kómektesemiz. Balalar jarys­taryn uıymdastyryp, odan qalmaımyz. Osynyń barlyǵy da men úshin mańyzdy is bolyp sanalady. – Jalpy, oblysta qys­qy sport túrleriniń, onyń ishinde shańǵy sportynyń óris alýyna kóńilińiz tola ma? – Tolmaıdy. Qysqy sport túrleri buqaralyq kúsh ala almaı tur. Onyń sebep­teri bar. Oǵan eń aldymen, jaǵ­daı kerek. Mysaly, shańǵy sporty úshin shańǵy joly bizde joqtyń qasy. Sáýirden bas­tap, qarashaǵa, ıaǵnı qar jaý­ǵanǵa deıin shańǵyshy qaıda daıyndalady? Myna turǵan Aqmola oblysynda 4 shańǵy joly, Pavlodarda eki shańǵy joly bar. Sport damýy úshin oǵan jaǵdaı jasalýy kerek. Biraq men úmitimdi úzbeımin, ekonomıka damyp, áleýmettik máseleler birtindep sheshimin taýyp jatyr ǵoı, oblysta shańǵy joly jasalady dep oılaımyn. Ekinshiden, bizdiń óńirdiń tabıǵaty qatal, qysy sýyq, jeli kúshti. Munyń ózi eki­niń biri­niń shańǵyǵa degen yqyla­syn oıata qoımaıdy. Shańǵy na­­ǵyz jigerlilerdiń, qaıtpas qaı­­sar­lardyń sporty. Rýdnyı qala­synda shańǵy sportyna ata-analar úshinshi synyptan bastap balalardy ákelip jatady, biraq keıin iriktele kele naǵyz tózimdiler ǵana qalady. Shańǵy sporty halyqaralyq sport jarystarynda eń negizgi qysqy sport túri bolyp tabyla­dy. Sondyqtan ony damytý kerek, ol úshin tek jaǵdaı jasalýy qajet. – Ýnıversıadada elimiz shańǵyshylarynan qandaı úmit kútesiz? – Men boljam jasamaımyn. Jastardyń ter tókken kún­deri artta qaldy. Qansha da­ıyn­dalǵanymen keıde onyń taǵdyryn jarystyń sáti de sheship ketedi. Bizdiń shańǵy­shylar daıyndyǵynyń osal emestigine senemin. Sondyqtan men de jankúıer retinde me­dal­dar kútemin. Bul ja­rys­ta jastarymyz jeńiske je­tip jatsa, elimizdiń dańqyn taǵy da aspandatady. Sport kere­meti­niń biri de osy emes pe? – Áńgimeńizge rahmet. Qa­shan da qatarda júre berińiz! Áńgimelesken Názıra Járimbetova, «Egemen Qazaqstan»   Qostanaı