Kollajdy jasaǵan – Záýresh SMAǴUL ,«EQ»
Jas ónertapqysh óz jobasyn ázirleý barysynda zamanaýı tehnologııanyń múmkindigin tıimdi paıdalanǵan. Atap aıtqanda, jasandy ıntellekt kómegine júginip, túrli ǵylymı derekterdi saralaǵan, ekologııaǵa qaýipsiz ári tabıǵı quramdardy anyqtaǵan. Sonyń nátıjesinde tolyqtaı tabıǵı zattardan turatyn, qorshaǵan ortaǵa zalal keltirmeıtin bıopaket jasalyp shyqqan.
Móldirdiń aıtýynsha, oılap tapqan bıopaket nebári 45–50 mınýttyń ishinde tolyqtaı erip ketedi. Al bul – polıetılen pakettermen salystyrǵanda orasan zor aıyrmashylyq. Ǵalymdardyń deregine súıensek, kádimgi polıetılen qaldyqtary tabıǵatta 500 jylǵa deıin ydyramaı jatady. Osy ýaqyt aralyǵynda topyraqty, sýdy jáne tiri aǵzalardy ýlap, ekojúıege aıtarlyqtaı zııan keltiredi.
«Tabıǵatty aıalaý bárimizge ortaq mindet. Qorshaǵan ortamyzdyń taza bolýy bizdiń bolashaǵymyzǵa áser etedi. Bul isti árkim óz basynan bastasa, tabıǵat taza bolar edi», deıdi Móldir Kenjebaı.
Elimizde ekologııa máselesiniń ózektiligi kún ótken saıyn artyp keledi. Resmı málimetterge súıensek, elimizde jyl saıyn 5 mıllıon tonnadan astam turmystyq qoqys shyǵarylady. Onyń basym bóligi – plastık pen polıetılen qaldyqtary. Bul jaǵdaı qorshaǵan ortaǵa úlken qaýip tóndirip qana qoımaı, bolashaq urpaqtyń densaýlyǵyna da keri áser etýi múmkin.
Osy turǵyda Móldir Kenjebaıdyń bastamasy – qoǵamǵa oı salatyn, mańyzy zor joba. Jasandy ıntellekt pen ǵylymdy ushtastyra otyryp jasalǵan bıopaket óndiriste qoldanysqa engizilse, ekologııalyq ahýaldy jaqsartýǵa úlken úles qosa alatyny sózsiz. Sonymen qatar bul joba jasóspirimderdiń ǵylymǵa, ınnovasııaǵa degen qyzyǵýshylyǵyn arttyryp, el bolashaǵyna beıjaı qaramaıtyn sanaly urpaq qalyptastyrýǵa jol ashady.
Jas ónertapqyshtyń tabandy eńbegi men izdenisi – «tabıǵatty qorǵaý jasqa qaramaıdy» degen oıdyń aıqyn dáleli. Eger osyndaı bastamalar qoldaý taýyp, keńinen júzege assa, ekologııalyq taza Qazaqstan qurýǵa bir qadam jaqyndaı túserimiz anyq.
Almaty
