Úsh kúndik baǵdarlama barysynda qatysýshylar Astana qalasyndaǵy 11 jetekshi medısınalyq uıymdy aralady. Olardyń qatarynda joǵarytehnologııaly ulttyq ortalyqtarmen birge zamanaýıjeke klınıkalar da bar. Atap aıtqanda, UMC Júrek ortalyǵy, Ulttyq balalardy ońaltý ortalyǵy, Ulttyq neırohırýrgııa ortalyǵy, Ulttyq ǵylymı onkologııa ortalyǵy, QR Prezıdenti Is basqarmasy Medısınalyq ortalyǵynyń aýrýhanasy, sondaı-aq «Green Clinic», «PRIME Green Clinic» jáne «AlandaClinic» kópsalaly medısınalyq ortalyqtary tanystyryldy.
«Baǵdarlamanyń negizgi maqsaty – elordanyń medısınalyq týrızmdegi áleýetin tanystyrý. Qonaqtarǵa klınıkalardyń materıaldyq-tehnıkalyq bazasy, qyzmet kórsetý deńgeıi, dárigerlerdiń kásibı biliktiligi jáne sheteldik pasıenttermen jumys isteý tájirıbesi kórsetildi», dedi «Astana Tourism» týrızmdi damytý ortalyǵynyń Medısınalyq týrızm departamentiniń dırektory Bazarbek Qamysbaev.
Sonymen qatar, «Tulip Medicine» plastıkalyq hırýrgııa klınıkasy, «Astana Vision» kóz klınıkalar jelisi jáne «Ecomed» reprodýktıvtik medısına ortalyǵy sekildi beıindi medısınalyq qyzmet kórsetetin mekemeler de nazardan tys qalmady. Qatysýshylar dıagnostıkadan bastap kúrdeli operasııalarǵa deıingi medısınalyq qyzmettiń tolyq spektrin kórýge múmkindik aldy.
Buǵan qosa, is-shara aıasynda B2B formatyndaǵy kezdesýler uıymdastyrylyp, medısınalyq uıymdar men sheteldik seriktester arasynda kelissózder júrgizilgen. B.Qamysbaevtyń aıtýynsha,kelissózderden soń birqatar agenttikpen kelisimderge qol qoıylǵan. Bul qujattar sheteldik pasıentterdi tartý jumystaryn júıelep, olardy emdeýdiń barlyq kezeńinde súıemeldeýge múmkindik bermek.
Saladaǵy statıstıkaǵa súıensek, 2024 jyly Astanaǵa shamamen 4,5 myń medısınalyq týrıst kelgen bolsa, 2025 jyly kelýshiler sany 6100 pasıentten asqan. Sheteldik pasıentter arasynda ásirese kardıohırýrgııa men neırohırýrgııa qyzmetterine suranys joǵary. Sonymen qatar, stomatologııa, ortopedııa, reprodýktıvtik medısına men qysqa ýaqyt ishinde tolyq tekserýden ótýge múmkindik beretin check-up baǵdarlamalary da suranysqa ıe.
Uıymdastyrýshylardyń aıtýynsha, aqparattyq týr tek medısınamen shektelmeı, qalanyń týrıstik múmkindikterin de qamtyǵan. Qonaqtar úshin arnaıy ekskýrsııalar uıymdastyrylyp, olar Astananyń zamanaýı kelbetimen, mádenıetimen jáne jaıly ınfraqurylymymen tanysty. Bul medısınalyq týrızmniń búgingi kúni keshendi týrıstik ónimformatyna aınalyp kele jatqanyn kórsetedi.
Medısınalyq týrızmniń damýy qalaekonomıkasyna da oń áserin tıgizip jatyr. Máselen, qazir klınıkalarǵa júkteme artyp, qyzmet kórsetýsalasy jandanyp, qonaqúı bıznesi men kólik, ekskýrsııa qyzmetterine suranys kóbeıip otyr. Bul bir jaǵynan joǵary sapa men qoljetimdi baǵanyńúılesimin kórsetedi.
«Astanadaǵy klınıkalardyń materıaldyq-tehnıkalyq bazasy men dárigerlerdiń kásibı deńgeıi joǵary ekenine kóz jetkizdik. Ásirese, joǵary tehnologııaly operasııalar men pasıentke kórsetiletin qyzmet sapasy kóńilden shyqty. PET/KT, gamma-pyshaq, protondyq terapııa sekildi ozyq tehnologııalar qoljetimdi, bul úlken artyqshylyq. Munda sheteldik pasıentter úshin barlyq jaǵdaı jasalǵan. Bolashaqta áriptestik ornatyp, naýqastardy osy jerge baǵyttamaq josparymyz bar», dedi Tájikstannan kelgen hırýrg, flebologmaman Bahodýr Kobılbekov.
Jalpy, ótkizilgen aqparattyq týr elimizdińmedısınalyq týrızm naryǵyndaǵy ornyn nyǵaıtýǵa baǵyttalǵan. Mundaı bastamalar halyqaralyq áriptestikti keńeıtip, eldiń bedelin arttyrýǵa yqpal etedi.
