Ushý-konstrýktorlyq synaqtar aıasynda zymyrannyń birinshi jáne ekinshi satylary shtattyq rejımde jumys istep, gabarıttik-massalyq maket eseptelgen traektorııaǵa sátti shyǵaryldy. Bul bastama Qazaqstannyń álemdik ǵaryshtyq qyzmet kórsetý naryǵyndaǵy úlesin arttyrý úshin kúrdeli ınjenerlik nysannyń tolyq paıdalanýǵa daıyn ekenin rastady. «Báıterek» jobasy –elimizdiń jeke zamanaýı ushyrý ınfraqurylymyn paıdalanýǵa kóshýine múmkindik beretin strategııalyq jetistik.
Keshendi qurý barysynda jerústi ınfraqurylymyn jańǵyrtý, ushyrý júıelerin, basqarý, janarmaı quıý jáne qaýipsizdik júıelerin salý men beıimdeý boıynsha aýqymdy jumystar júrgizildi. Engizilgen sheshimder ushý aldyndaǵy operasııalardy avtomattandyrýdyń joǵary deńgeıin qamtamasyz etedi jáne halyqaralyq senimdilik standarttaryna tolyq sáıkes keledi.
«Báıterek» ǴZK jobasyn iske asyrý –sońǵy jyldardaǵy eń kúrdeli tehnologııalyq jobalardyń biri. Avtomattandyrý jáne qaýipsizdik talaptaryna tolyq jaýap beretin zamanaýı keshen quryldy. Búgingi ushyrý synaǵy Qazaqstannyń ǵarysh ındýstrııasyna tolyqqandy qatysý úshin barlyq qajetti elementti, sonyń ishinde jeke ushyrý ınfraqurylymyn, ulttyq spýtnıktik jobalardy jáne joǵary bilikti ınjenerlik kadrlardy qalyptastyrǵanyn dáleldeıdi.
«Báıterek» zymyran kesheniniń sátti ushyrylýy ǵaryshty ıgerýde jańa múmkindikterge jol ashady, al jobany júzege asyrý jańa jumys oryndaryn qurýǵa jáne orbıtaǵa ǵarysh apparattarynyń keń jelisin shyǵarý áleýetin keńeıtýge múmkindik beredi. Ushyrýǵa daıyndyq jumystary barlyq torap pen agregattyń minsiz jumys isteýine basymdyq bere otyryp, tehnologııalyq reglamentterge qatań sáıkestikte júrgizildi», dep habarlady Jasandy ıntellekt jáne sıfrlyq damý mınıstrligi.
Jańadan qurylǵan ǵarysh zymyran keshenin paıdalaný úshin 40-tan astam tehnıkalyq júıe jumyldyryldy. Synaqtardyń tolyq sıkli barysynda olardyń tıimdi ózara is-qımyly qamtamasyz etildi.
«Progress» zymyran ǵarysh ortalyǵanda ázirlengen «Soıýz-5/Suńqar» tasyǵyshynyń tehnıkalyq sıpattamalary tómen jer mańy orbıtasyna 17 tonnaǵa deıin paıdaly júkti shyǵarýǵa múmkindik beredi. Zymyran qýatty ári tekserilgen qozǵaltqyshtarmen jabdyqtalǵan: birinshi satyda - RD-171MV jáne ekinshi satyda - RD-0124MS. Fregat kúsheıtkish qondyrǵylar tobyn jáne ártúrli paıdaly júktemeni ornatý opsııalaryn paıdalaný tapsyrmalardyń keń aýqymyn sheshýde ıkemdilikti qamtamasyz etedi. «Báıterek» kesheni men «Soıýz-5/Suńqar» zymyrany kerosın men suıyq ottegi sııaqty ýly emes otyndy qoldana otyryp, ekologııalyq taza kosmonavtıkanyń bolashaǵyn aıqyndaıdy, sondaı-aq ǵylymdy damytý men eldiń ındýstrııalyq áleýetin nyǵaıtý úshin jańa perspektıvalar ashady.
