Pavlodar oblysynyń ortalyq jaǵalaýynda jastardyń basyn qosqan sharanyń negizgi maqsaty – jastar arasynda quqyqtyq mádenıetti nasıhattaý jáne zamanaýı kommýnıkasııalyq formattar arqyly quqyq buzýshylyqtardyń aldyn alý.
Ashyq mıkrofon barysynda jastar «Zań men tártip» ıdeologııasynyń mańyzdylyǵy týraly óz pikirlerimen bólisti. Qatysýshylar «Zań men tártip – qaýipsiz ári turaqty qoǵamnyń negizi» ekenin atap ótip, zań talaptaryn saqtaý azamattardyń qaýipsizdigi men erteńgi kúnge degen senimdiligin qamtamasyz etetinin jetkizdi. Sondaı-aq jastar quqyqtyq mádenıettiń, azamattyq jaýapkershiliktiń jáne zańǵa qurmetpen qaraýdyń mańyzdylyǵyna erekshe toqtaldy.
Is-shara aıasynda qatysýshylar úshin qolóner jáne sýret salý alańdary, quqyqtyq saýattylyq pen azamattyq jaýapkershilikti arttyrýǵa baǵyttalǵan ınteraktıvti oıyndar men túrli belsendilikter uıymdastyryldy. Sonymen qatar quqyq qorǵaý organdary ókilderiniń ashyq qabyldaý alańy jumys istep, turǵyndar ózderin tolǵandyrǵan suraqtaryna jaýap alyp, quqyqtyq máseleler boıynsha keńes alý múmkindigine ıe boldy.
Is-shara ashyq ári ınteraktıvti formatta ótip, jastardy, memlekettik organdar ókilderin jáne qala turǵyndaryn bir alańda toǵystyryp, syndarly dıalog alańyna aınaldy.
Oblystyq aqparat jáne qoǵamdyq damý basqarmasynyń jastar jáne otbasy bóliminiń basshysy Jannur Ahmetjaǵovanyń aıtýynsha, jazǵy maýsymda jastar men turǵyndardyń bos ýaqytyn tıimdi uıymdastyrýǵa baǵyttalǵan «Ertis tolqyny» jobasy aıasyndaǵy árbir sársenbilik shara «Zań men tártip» ıdeologııasyn ilgeriletýge arnalatyn bolady. Bul rette oblystyń árbir qalasy men aýdany ózderiniń úzdik ári qyzyqty bastamalaryn usynady. Máselen, «Zańdy Talk» is-sharasynyń belsendi uıymdastyrýshylary Pavlodar aýdanynyń jastary boldy.
