Attestattaý – asa kúrdeli naýqan

Bıyl kásibı memlekettik apparatty qalyptastyrý baǵytynda birqatar mańyzdy sharalar júzege asyp jatyr. Onyń biri – is basyndaǵy memlekettik qyzmetkerlerdi keshendi attestattaýdan ótkizý. Meniń oıymsha, Ult josparyn júzege asyrý aıasynda ótkiziletin bul sharanyń maqsaty qyzmetshilerdiń kásibı daıyndyq deńgeıi men laýazymdaryna sáıkestigin anyqtaý ǵana emes, ol laýazymdy tulǵalardyń jalpy halyqpen qarym-qatynas jasaýyna kerek qasıetteri men quzyretterin aıqyndaý bolyp tabylady. Basqasha aıtqanda, halyqqa qyzmet kórsetýdiń sapasyn arttyrý, júzden júırikterdi mansaptyq jolmen joǵarylatý. Shyny kerek, «Máńgilik El» ıdeıa­syn el sanasyna qalyptastyratyn da, ilgeri aparatyn da memlekettik qyzmetkerler emes pe? 100 qadamnyń, kásibı apparat qurýdyń 15 qadamy da azamattardy memlekettik qyzmetke alǵash qabyldaý rásiminen bastap, olardy keshendi attestattaýǵa deıingi aralyqty qamtıdy. Meniń óz basym ómirlik eńbek jolymdy ýnıversıtette alǵan bilimimdi sol salada biraz ýaqyt atqaryp, memlekettik qyzmettiń alǵashqy satysynan bas­tap, ıaǵnı aýdandyq, oblystyq, barlyq baspaldaqtarynan ótkenimdi jáne osy kezeńderde úlken tájirıbe jınaqtaǵanymdy árkez maqtanyshpen eske alamyn. Memlekettik qyzmettiń qıyndyqtary, tapsyrmalar men synaqtar, ár baspaldaq saıyn kez­desetin kedergiler, óz jumysyna beıjaı qaraýshylardyń qaǵaz bastylyǵy men ýaqyt óltirýshiligi – osynyń bári meniń de basymnan ótti, kókeıimde saırap tur. Árbir memlekettik qyzmetshi «Elime qyzmet etkenim, ol halyq úshin ǵana emes, ózimniń otbasym úshin de paıdasy zor» degen ustanymda jumys atqarý kerek dep oılaımyn. Osyǵan oraı, Elbasymyz árbir memlekettik qyzmetshiniń boıynda bolýy tıis negizgi qasıetterdi aıqyndap berdi. Atap aıtsaq: «Ol bılik jáne óz quzyretin basqara bilip, sonymen birge shynshyl bolýy kerek», «Memlekettik qyzmette óz paıdasy úshin emes, memleket úshin jumys istep, memlekettik qarajatty óz qaltasymen aýystyrmaý kerek», «Sheneýnik «Nemen kún kórip otyrsyń?» degen suraqtan qoryqpaı ómir súrýi kerek, óıtkeni, onyń vıllalaryn, ony qorshaǵan bıik qaqpanyń jáne qymbat avtomobılderdiń sýretiniń paıda bolýyna negiz bolmaý kerek», «Zań talaptarymen tolyq kelisimde ómir súrý kerek», «Kez kelgen jerde, kez kelgen qyzmette qandaı da bolmasyn jaǵdaıda halyqtyń, óz eliniń azamattarynyń senimin joǵaltpaý kerek», «Qazaqstandyq memlekettik qyzmetker ádilettilik pen sypaıylyqtyń úlgisi bolyp, adamdar arasynda ózin-ózi ustaı bilýi kerek», «Ujymdy basqarmas buryn, ol ózi baǵyna, jumysshylarǵa bergen jumysty ózi atqara bilýi kerek» jáne «Eger memleket múddesine zııan keltirilip jatqanyn nemese sybaılas jemqorlyqtyń daıyndalyp jatqanyn kórse, mindetti túrde aralasyp, tıisti shara qoldaný kerek». Bul qasıetterdiń túpki máni – joǵary moraldyq jaýapkershilik, kásibı bilim, ony tájirıbede qoldana bilý, ádildik, adaldyq, belsendi ómirlik ustanym kerek. Kásibı memlekettik apparatty, búgingi Qazaqstannyń bolashaqta tuǵyry myǵym, eńsesi bıik «Máńgilik Elge» aınalýdyń kepili retinde qarastyrýy beker emes. Jahandyq syn-qaterlerge qaramastan elimizdiń damýyna kerekti jaǵdaılardy jasaıtyn, almaǵaıyp zamanda tyǵyryqtan shyǵatyn ońtaıly joldar taýyp, damýdyń dańǵyl jolyna jeteleıtin memlekettik bılik apparatynyń enshisinde bolsa, jekeleı kelgende árbir memlekettik qyzmetshiniń kási­bı­l­­igi men qabilettiligine baılanysty ekeni aıdan anyq. Sol sebepti, Elbasynyń Jar­ly­ǵy­men memlekettik qyz­met­shilerdi attestattaýdan ótkizý týraly sheshimi der kezinde qabyldanǵan shara dep bilemin. Elbasymyzdyń bul ustanymy onyń tarıhı taǵylymnan ajyramaǵan ulttyq ári el kóshin bastaǵan elshil kemeńger ekendigin aıǵaqtaıdy. Keshendi attestattaýdan ótkizýdiń maq­saty da mańdaı terińmen jınaǵan bilimdi, bilimsizdermen teńespeý úshin arnaıy zańdardy qarastyryp, sy­naqtan ótkizý emes, kəsibı, bilimdi, tek halyqtyń ıgiligi úshin eńbek etip, elimizdiń damýyna óz úlesin qosatyn mamandardy anyqtaý dep bilýimiz qajet. Memlekettik qyzmet atqarý – qoǵam tarapynan erekshe senim bildirý bolyp tabylatyndyqtan bul saıası is-sharanyń memleketimizge tıgizer paıdasy óte zor. Sondyqtan da, elimizdiń jarqyn bolashaǵy jolynda aıanbaı qyzmet atqaryp otyrǵan memlekettik qyzmetshilerge sáttilik tileımin. Jandar KÁRIBAIULY, Jambyl oblystyq qoǵamdyq keńestiń tóraǵasy, qoǵam qaıratkeri