Úsh aýyldy asyraǵan...

Tabıǵaty tamyljyǵan Zyrıan aýdanynda Nıkolaı Shaporev degen isker azamat bar. Semeı maldá­rigerlik ınstıtýtyn zootehnık mamandyǵy boıyn­sha bitirgen ol «Solovev» keńsharynda bas zootehnık qyzmetin atqaryp, osydan 14 jyl buryn sharýa qojalyǵyn quryp aldy. Ákesi Nıkolaı Shaporev Úlken Naryn aýdanynyń týmasy, kórshi aýdanda jáne Zyrıan óńirine erekshe eńbegi sińgen ol osydan birneshe jyl buryn dúnıeden ozdy. «Áke kórgen oq jonar» degendeı, balasy onyń baı tájirıbesi men úlgili isin izdenimpazdyq tanytyp jalǵastyrýda. Jaqynda N.Shaporevtiń jumysymen tanysý úshin Lenın aýylyna bet aldyq. Janymyzda oblys­tyq aýyl sharýashylyǵy basqarmasynyń bastyǵy Dúısembaı Selıhanov, Zyrıan aýdany ákiminiń oryn­basary Nurjan Toqseıitov bar. Bıik taýlar áli qar qursaýynda jatyr. Birer kúnnen beri aýa raıy kúrt jylyǵannan soń taý betkeıindegi qar tez erip, tómen qaraı sarqyrap aǵyp jatyr. Tipti jolǵa deıin jaqyndap, jer mıbatpaqqa aınalǵan. Nıkolaı Nıkolaevıch úshin joldyń buzylǵany qıynshylyq tý­ǵyz­baıtyn syńaıly, astyndaǵy «djıpin» urshyq­taı ıirip, zýlap keledi. – О́zim Solovev aýylynda turamyn. Biraq myna joldaǵy Podorlenok jáne Lenın bólimshelerindegi turǵyndardyń barlyǵy meniń qojalyǵymda eńbek etedi. Jumys tabylmaǵan soń turǵyndardyń kópshi­ligi basqa jaqqa kóship ketti, al qalǵandary mehanızator, malshy bolyp eńbek etedi, jalaqylary jaman emes, 30-40 myń teńge alady, al egin oraǵy kezinde kombaınshylar júz myń teńgeni erkin qaratady, – dedi jol ústinde qojalyq tóraǵasy. Jıyrma shaqyrym jerdegi Lenın aýylyna keldik. Qatar-qatar ornalasqan qoralar iri qara, jyl­qyǵa toly. Qojalyq tóraǵasynyń pysyq, jumysqa ebi bar ekenin baıqaǵanbyz, sonyń dálelindeı ja­byq qoralar mańyndaǵy taýdaı bolyp úıilip jatqan on shaqty maıa shópti kórdik. Jem-shóbimiz erkin jetti, tipti kórshilerge de qarastyq. Qar erip, jerge kók shyqqannan keıin jylqy, iri qarany óriske shyǵa­ramyz, dedi N.Shaporev emen-jarqyn. Jem-shóp mol, kúnine rasıon boıynsha birneshe kılo jem jegen maldyń qońy jaqsy. Qazir qoja­lyqta 8 myń gektar jaıylymdyq, onyń ishinde 3,2 myń gektary egistik, úsh júzge tarta iri qara, tórt júzdeı jylqy bar. Qazaqtyń aqbas sıyry etti mol beredi, sondyqtan N.Shaporevtiń qojalyǵy et ónim­derimen aýdan jáne qala turǵyndaryn qamtamasyz etip turady eken. – Átteń jer kólemi az, sondyqtan mal basyn kóbeıtýge múmkindik joq, – deıdi qojalyq tór­aǵa­sy. – Qosymsha jer bólý jaǵyn oılastyryp kó­reı­ik, – dedi aýdan ákiminiń orynbasary N.Toqseıitov. Sońǵy jyldary qojalyq tóraǵasy «Qazagro­qar­jy» arqyly birneshe jańa tehnıkany satyp alyp­ty. Bankten nesıe almaı tóte jolmen tehnıkalaryn ja­ńartyp jatqan azamattyń bul isi maqtaýǵa tu­rarlyq. – Bankter qandy tespeı sorady, sondyqtan elimizdegi birneshe qarjylyq qurylymdar arqyly qarjy alyp, jaǵdaılaryn rettegender utady. Osy joly aýdanǵa jeti birdeı qurylym basshylaryn ertip keldik. Mine, solardyń kómegi bizdi tuıyqtan alyp shyǵady, – dep áńgimege oblystyq aýyl sharýashylyǵy basqarmasynyń bastyǵy Dúısembaı Selıhanov aralasty. – Biraz ýaqyt buryn úsh «Vektor» , úsh «Enıseı», birneshe «Nıva» kombaındaryn lızıngige aldyq. Qazir tehnıkaǵa qaryzymyz joq, onyń ústine 12 shynjyr tabandy, birneshe «Belarýs» traktory, K-700 traktorymyz bar. Jumysshylardy óz avtobýsymyzben ashanaǵa aparyp, tegin tamaq beremiz, Solovevtegi orta mektepke demeýshilik jasap turamyz, basqa da sport sharalaryna kómegimizdi beremiz, – deıdi qojalyq tóraǵasy. Sport dese Nıkolaı Shaporev eleńdeı qalady. Ol qazir birneshe júırik sáıgúlikterdi baptaýda. «Donchak-2», «Krasavchık», basqa da sáıgúlikter aý­dandyq, qalalyq jáne oblystyq jarystarda únemi top jarady. Asyl tuqymdy jylqylary óz aldyna bir tóbe. Byltyr N.Shaporevtiń qojalyǵy egistiktiń ár gektarynan 22,4 sentnerden ónim alypty, bıyl da sol mejeden túspeımiz dep otyr. – Nıkolaı Shaporev sııaqty isker, bilimdi de bilikti azamat aýdanymyzdyń maqtanyshy. Ol úsh aýyldyń turǵyndaryn jumyspen qamtamasyz etýde. Olarǵa eliktegen jastar da aýyl sharýashylyǵyna betbura bastady, – dedi Zyrıan aýdanynyń ákimi Ermak Sálimov. Ońdasyn ELÝBAI. Shyǵys Qazaqstan oblysy,  Zyrıan aýdany. –––––––––––– Sýrette: N.Shaporev júırik atymen.