Bul maqalada zamanymyzdyń zańǵar jazýshysy Muhtar Áýezovtiń jas kezinde «Iаrysh» komandasynda oınaǵany týraly aıtylǵan. Osy maqala shyǵysymen Semeı óńiriniń ardager sportshylary, sportsúıer qaýym ókilderi telefon shalyp, jyly lebizderin bildiristi. Munyń da ózindik sebebi bar: bıyl uly jazýshy, «Abaı joly» roman-epopeıasynyń avtory Muhtar Áýezovtiń týǵanyna 120 jyl tolyp otyr. Maqalada jazýshyny taǵy bir qyrynan kórsetý – tulǵaǵa degen uly qurmet, desti aqsaqaldar qaýymy.
– Sońǵy kezderi «Egemen Qazaqstan» gazetiniń sport beti erekshe jandanyp, halyqtyń salamatty ómir saltyna degen qyzyǵýshylyǵyn arttyryp otyr, – dedi osy maqala týraly alǵash habarlasyp, óziniń oı-pikirimen bólisken Semeı qalalyq ishki saıasat bóliminiń bastyǵy Aıdar Sadyrbaev. – Ásirese, Almaty qalasyndaǵy tilshiler qosynynyń meńgerýshisi Talǵat Súıinbaıdyń jáne taǵy basqa da jýrnalısterdiń XXVIII Dúnıejúzilik qysqy Ýnıversıada kezindegi berilgen tikeleı reportajdary kóńilimizden shyqty. Al «Iаrysh – qazaq fýtbolynyń qarlyǵashy» atty maqalaǵa bizdiń qosarymyz: Semeı qalasynyń ákimdigi 2013 jyly «Qazaqstan fýtbolyna – 100 jyl» mereıtoılyq medal shyǵaryp, ony sport ardagerlerine, qazaqtan shyqqan, el namysyn qorǵaǵan, baıraqty básekelerde kók týymyzdy jelbiretken sportshylarymyzǵa tabys etken bolatyn. Barsha halyqty osyndaı ıgi isterimizdiń bar ekendigin el gazeti «Egemen Qazaqstan» arqyly habardar etkimiz keledi.
Aıta ketetin jaıt, «Iаrysh» fýtbol komandasynyń 100 jyl burynǵy tósbelgisi tarıhı jádiger retinde Semeı qalasyndaǵy tatar mádenı ortalyǵynyń murajaı buryshynda saqtaýly tur.
Raýshan Nuǵmanbekova,
jýrnalıst
SEMEI
