Esimi óńirge keńinen tanymal el aǵasy, Oıyl aýdanynyń qurmetti azamaty Amanqos Orynǵalıulynyń aıtýynsha sáýirge deıin kúnniń kózi jylynbaı, aq qar, kók muzdyń siresip jatyp alýy buryn-sońdy kezdesken emes. Naýryz aıy týysymen aýada jyly lep sezilip, sáýirdiń 13-18-i aralyǵyna sáıkes keletin, halyq arasynda «besqonaq» dep atalyp ketken kúnderde ǵana kún sýytatyn edi. Tabıǵattyń bıylǵydaı tosyn qubylysyn kezdestirip kórmeppin deıdi ol.
Aldaǵy kúnderde aımaqta aýa raıy qandaı bolmaq? «Kazgıdromet» RMK Aqtóbe oblysy boıynsha fılıaly aýa raıyn boljaý bóliminiń bastyǵy Aıgúl Faımova aldaǵy kúnderde qar jaýyp, burqasyn kórinisteri jalǵasa beretinin aıtyp berdi. Sodan soń bult ashylyp, kúnniń kózi shyqqanymen, túnde on gradýstan asyp túsetin aıaz bolmaq. Tek besinshi sáýirden keıin ǵana aýa raıy kúndiz 0 gradýs tóńireginde bolmaq. Alaıda bul kezde de túndegi temperatýra keı jerlerde 5 gradýstan tómen bolady dep kútilýde, dedi ol.
Qystyń odan ári sozylyp, kóktemniń jaı kelýin oń qubylys dep qabyldaýǵa bola ma? О́ńirdegi kónekóz qarııalardyń tujyrymdaýynsha muny tek oń nyshan men jaǵymdy qubylys dep jorýǵa toqaılasady. Eger osy bastan jer keýip ketse, onyń aıaǵy qurǵaqshylyqqa ákelip soqtyrýy múmkin. Kerisinshe, keshigip kelgen kóktem keleshek yrys pen berekeniń basy bola alady dep oı túıedi olar.
Laıym, solaı bolǵaı.
Temir Qusaıyn,
«Egemen Qazaqstan»
Aqtóbe oblysy
