Qaýipti aımaqtar qatań baqylaýda

Osy oraıda oblystardaǵy tıisti mekemeler barlyq múmkindikterdi qarastyra otyryp, qaýipti aımaqtardy qatań baqylaýǵa alýda. Tasqynǵa qarsy kúreske qajetti materıaldar jetkilikti deńgeıde jınaqtalǵan. Eldi mekenderdi sý basqan jaǵdaıda turǵyndardy kóshirý, olardyń ózge de qajettilikterin óteý máseleleri de basty nazarda tur. Oblystardan kelip túsken aqparattarǵa qaraǵanda, barlyq uıymdastyrý jumystary qarapaıym turǵyndardyń qaýipsizdigin qamtamasyz etýge baǵyttalǵan. 

Petropavldan – О́mir Esqalı

Kún jylynǵan saıyn Qyzyljar óńirinde sý basý qaýpi kúsheıip keledi. Mamandardyń topshylaýynsha, Shal aqyn aý­danyna qarasty 8 eldi mekendi qyzyl sý basyp qa­lýy yqtımal. Olardyń arasynda Esil ózenine ta­qaý ornalasqan Mergen, Aqanbaraq, Krıvoshekovo, Se­mıpolka sııaqty aýyldar bar. Osyǵan oraı, jer­gi­likti jerlerde tótenshe jaǵdaı jarııalanyp, eldi me­kenderde aryqtar qazylyp, jaǵalaı bógetter tur­ǵyzylýda. Aýdan ákiminiń orynbasary Janat Ospanovtyń aıtýynsha, tasqynnyń aldyn alý sha­ralaryna 6,4 mıllıon teńge qarastyrylyp, mo­to­pom­palar men janar-jaǵarmaı alýǵa jumsalǵan. Inert­ti materıaldar jetkizilip, qosymsha 3,6 tonna dızel oty­ny bólingen. Qaýyrt maýsymǵa 45 tehnıka birligi men arnaıy jasaqtalǵan quramdar saqadaı-saı daıyn. Qa­ý­ipti aımaqtarda kezekshilik shtabtary qurylyp, mán-jaıdy tıisti oryndarǵa shuǵyl túrde habarlap oty­rady.

Mamlıýtka jáne M. Jumabaev aýdandary mańynda or­nalasqan kólderge 117 myń tekshe metr qar sýy aı­dalyp, jaqyn aýyldardy sý basý qaýpi birshama seıilgen.

Petropavl qalasy tóńireginde ahýal alań­da­tar­lyq. Onyń mańaıy dúleı sý alǵan «Venesııany» kóz­ge elestetedi. Áleýmettik jelilerge tolassyz tú­sip jatqan shaǵymdarǵa qaraǵanda, erigen qar sý­la­ry úlken-úlken kólshikterdi quraǵan. Esil ózeni ar­nasynan assa, aldymen 2 myńdaı turǵyny bar Byl­ǵary zaýyty shaǵyn aýdanyna qater tónedi. Osy yq­tı­maldylyqty eskergen bıliktegiler uzyndyǵy 900 metr­­deı nysanǵa jańǵyrtý jumystaryn júrgizgen. Bas­­ty dambany qalpyna keltirýge 600 mıllıon teńge ju­­m­salǵan. Jalpy syıymdylyǵy 24,5 mıllıon tek­she metr bolatyn Petropavl sý qoımasy da erekshe ba­­qylaýǵa alynǵan.

Tutastaı alǵanda, oblysta sý tasqynyna qarsy 827 ın­jenerlik jáne arnaıy tehnıka, 300 sý aıdaý teh­nı­ka­la­ry men motopompalar, 133 júzý quraldary, 38,5 myń tonna ınertti materıaldar, 40 myń dana ydys-qap, 14 je­del jaýap qaıtarý jasaǵy, 16 azamattyq qorǵanys qyz­meti tartylatyn bolady.

Kókshetaýdan – Asqar Turapbaıuly

Kóktem bastalmaı jatyp Aqmola ob­ly­sy­nyń or­talyǵy Kók­shetaý qa­la­syn­da sý arnalaryn tazartý ju­mystary der kezinde júrgizilgen-di. Alaıda qa­lany tolyq qardan arshyp alý da múmkin bolmaı otyr.

Osyǵan oraı qala ákimi Ermek Marjyqbaev qar erise sýdyń astynda qalatyn problemaly Kenesary, Ýálıhanov jáne Aqan seri kósheleri boıyn­daǵy jaǵdaımen arnaıy baryp tanysty. Qa­zir árbir problemaly ýchaskelerde kommýnaldyq qyz­met jáne tótenshe jaǵdaılar jónindegi qyzmeti bir­lese áreketke kóshken. Turǵyn úılerdi sý basyp qalýdyń aldyn alý úshin atalǵan qyzmetter kún­diz-túni jumys rejimine kóshken. Kún saıyn tur­ǵyndardan erigen qardyń sýyn soryp alý nemese qardan tazartý jumystaryn júrgizý úshin 35-44 ótinimniń túsýi jaǵdaıdyń áli de qıyn ekendigin kórsetedi. «Kókshetaý jáne onyń aınalasyn qarǵyn sý basýy múmkin. Sondyqtan turǵyndardyń árbir ótinishi boıynsha jedel is-qımylǵa kóshý kerek. Aýa raıy arnaıy tehnıkalardyń úzilissiz jumys is­teýine múmkindik berip otyr. Eń bastysy – ózara tú­sinistik pen kómek», dedi qala ákimi jaǵdaıǵa tú­si­nik bere kele.

Búgingi tańda «Kókshe Járdem» kásipornynyń kú­shi­men oblys ortalyǵynan 260428 tekshe metr qar syrtqa shyǵaryldy. Táýlik saıyn 48 tehnıka men 101 jumysshy qarǵyn sý boldyrmaýdyń ama­lyn jasaýda. «Kókshetaý Sý Arnasynyń» brı­gadasy qala kóshelerin qar men muzdan jáne qa­r­ǵyn sýdan tazartýǵa baryn salýda. Dıspetcherlik qyzmet kúni-túni qala turǵyndarynyń ótinishterin qabyldaýda. Eń bastysy, eger tótenshe jaǵdaılar oryn ala qalsa, onda arnaıy tehnıkalar da saqadaı-saı turǵanyn aıta ketý kerek.

Almaty qalasynan – Arman Oktıabr

Almatyda qarǵyn sý­ǵa qarsy saqtyq sharalary qar­qyn­dy júrip jatyr. Kún­­niń kúrt jylýy taýdaǵy qar­dy eritse, ózender arnasynan asyp ketýi ǵajap emes. Erı­tin sý kólemin anyqtaý, tó­ten­she jaǵ­daı­lardyń aldyn alý, aryq­tar men qubyrlardyń arna­laryn ba­qylaýda ustaý bas­ty nazarda.

Bıylǵy jyldyń sáýir aı­ynda ózenderge jaqyn or­na­­lasqan aýmaqtarda sel júrý qaýpiniń aldyn alý sharalary júrgizilýde deıdi mamandar. Arnaıy tehnıkalar men Tótenshe jaǵdaılar qyz­metiniń jeke quramynyń ázir­ligi barynsha pysyqtalýda. Qa­la tur­ǵyndary arasynda aý­maqty qardan tazartyp, arnalar­dy keńeıtý máseleleri boıyn­sha túsindirý jumystary júr­gizilip jatyr. Qardyń erýi men kóktemgi jaýyn shashynnan soń arnasynan asý qaýpi bar Esentaı, Úlken Almaty, Kishi Almaty jáne Qarǵaly ózenderiniń jaǵalaýlary be­rik­tendirilýde. Qala aýma­ǵy­nyń turǵyndaryna arnaıy ja­dy­namalar taratylyp, uıa­ly baılanys operatorlary ar­qy­ly habarlamalar jolda­nýda. Qaý­ipsizdikti qam­ta­ma­syz etý boı­ynsha qoı­yl­ǵan mindetterdi iske asy­­rý­da Al­maty qala­sy­nyń Tó­­ten­she jaǵ­daılar de­par­ta­menti ákim­dikpen jáne múd­­d­e­li mem­le­­kettik organdarmen bir­le­se oty­­ryp, tótenshe jaǵ­­daı­lar­dyń aldyn alý já­ne olar­dy joıý júıesiniń ın­fra­qu­ry­ly­myn jetildirý boıynsha ju­mystar júrgizýde.

Tótenshe jaǵdaılar de­pa­r­ta­mentiniń baspasóz qyzmetiniń má­limdeýi boıynsha, naq osy kez­de Almaty aýmaǵy men Al­maty oblysyna qosylǵan 65 ýchas­ke jiti baqylaýda.

О́skemennen – Azamat Qasym

Sońǵy ap­ta­da óńir­de kún kú­rt jy­lynyp, ara­­syn­­da jań­byr jaýyp, qa­lyń qar­dyń kóp bóligi erip te úl­ger­di. Kúnniń kúrt jy­ly­n­ý­y­­­nan sý deńgeıi kó­terilip, 31 naýryz kúni «Semeı – Qaı­nar» baǵytyndaǵy tas jol­da­ǵy Muqyr ózeni ústinen sa­­­lynǵan kópirdi sý shaıyp, jol qozǵalysy shektelgen bo­latyn. Qazirgi ýaqytta kó­lik­ter «Semeı – Qaraýyl – Sar­jal» baǵyty arqyly qa­ty­nap ja­tyr. Qarǵyn sýdyń qar­qy­ny­na tótep bere almaǵan kó­pir 1959 jyly salynǵan eken. «QazAvtoJol» UK» AQ-tyń ob­­­lystyq fılıaly kópirge kúr­­deli jóndeý júrgizý úshin sme­­talyq-jobalyq qujattardy ázi­r­lep, «Memsaraptama» me­ke­­mesine jiberipti. Jóndeý ju­­mystaryna qarjy res­pýb­lı­ka­lyq bıýdjetten bólinedi dep jo­s­parlanyp otyr.  

Erigen qar sýy senbi-jek­­­­­senbi kúnderi de qutqa­­­­rý­­­­­­­­shylarǵa tynym tap­ty­r­­­­­­­­­­­ǵan joq. Tótenshe jaǵ­daı­­­­­­lar de­­­­partamentiniń qyz­met­­­­­­ker­le­ri óńir­diń eki birdeı aý­­­­danyn­­da qar sýynyń qa­maý­­­yn­da qal­ǵan adam­darǵa kó­mek kór­setti. Eri­gen qar sýy Se­meı qala­syn­­daǵy birneshe jer úıdiń aýlalary men jertólelerin basyp ketkendigi tý­ra­ly da habar taraǵan bo­la­tyn. Oblystyq Tó­­ten­she jaǵdaılar de­­par­­­tamentiniń bas­pa­sóz qyzmeti jaǵ­daılar­dyń baqylaýǵa alyn­ǵa­nyn, qalanyń órt són­di­rý­shileri jergilikti at­­qa­rý­shy organdarmen bir­le­se oty­r­yp, sýdy sorý ju­my­s­­ta­ryn júr­gi­zip jat­qan­dy­ǵyn ha­bar­lady. Ba­s­­pa­sóz qyz­me­ti­niń ta­rat­qan má­li­metterine súıe­n­sek, barlyǵy 40000 tekshe me­tr sý sorylyp alynypty.    

О́ńirdiń qarǵyn sýǵa qarsy daı­yndyǵyna kelsek, oblys áki­miniń orynbasary Serik Aqtanov basshylyq etetin arnaıy komıssııa tasqynǵa qarsy is-sharalar josparyn be­kitip, sý tasý qaýpi bar jer­ler­diń barlyǵy baqylaýǵa alyn­ǵan. О́ńirdegi gıdro ny­san­dardyń barlyǵynda ke­zek­­shilik uıymdastyrylǵan. Ish­ki ister mınıstrliginiń qol­daý­ymen jáne qarjy bó­lý­i­men jeke quramnyń 960 adamy, 268 tehnıka, 24 sýda jú­zý qu­ryl­ǵylary, 90 myń qap qum, 382 tonna janar-jaǵarmaı tas­qynǵa tosqyn jasaýǵa ázir tur. Sý basý qaýpi týǵan kez­de turǵyndardy ýaqytsha or­na­­lastyratyn oryndar da oı­lastyrylyp, 259 beket daı­yndalypty.

Tarazdan – Hamıt Esaman

Oblystyq ta­bı­ǵı resýrstar já­­ne tabıǵat paı­da­la­nýdy retteý bas­qarmasy jyl saı­yn sý qoımalaryn jóndeý jumystaryn qar­jy­landyrý artyp keletindigin, sondyqtan da qar sýynan bolatyn eshqandaı qaýiptiń joq­tyǵyn aıtady. Biraq jýyrda ǵana ta­bı­ǵattyń tosyn minezinen qos birdeı aý­danda sý qoımalaryna baılanysty jaǵ­daı­dyń oryn alǵany belgili.

Jýaly aýdanynyń qysy qatty, jazy salqyn bolyp keledi. Bıyl da aýdannyń taýly aımaqtarynda qalyń qar túsip, tipti, qaıǵyly qar kóshkininiń oryn alǵany da el esinde. Endi naýryz aıynyń sońyn ala bere qys boıy siresip jatqan qalyń qar bir kúnde erip, qar sýy «Teris-Ashybulaq» sý qoımasyndaǵy sýdyń shamadan tys kó­beıýine ákelip soqqan bolatyn. Qoıma res­pýb­lıkalyq menshikte bolǵanymen, Jýaly aý­maǵynda ornalasqan. Biraq irgesinde tórt myń­nan asa halyq turatyn Nurlykent aýylyna eshqandaı qaýip tónip turǵan joq eken. Bul máseleniń mán-jaıyn aýdan ákimi­niń orynbasary Narbaı Ergebekov bizge by­laı túsindirdi.

– Nurlykent aýylynyń ákiminen kún saıyn habar alyp otyramyz. Aýyl ishindegi aryqtarmen artyq sýdyń bári aǵyp ketedi. Onyń ústine, munda sýsorǵy beketi bar. Tek kún kúrt jylynyp, qar erip, onyń sońy jań­­byrǵa ulasqan soń el biraz ábigerge tústi. Qazirgi jaǵdaı turaqty. Búginde «Teris – Ashybulaq» sý qoımasynda 144 mıllıon 711 myń tekshe metr sý bar. Al qoımanyń syı­ymdylyǵy 145 mıllıon tekshe metr. Odan keıin sekýndyna 65 tekshe metr sý Asa ózenine jiberilýde. Sondyqtan da dál qa­zir qar sýynan keletin qaýip joq, – deıdi Narbaı Ábilqasymuly.

Sondaı-aq, kúnniń kúrt jylynýy sal­darynan Jambyl aýdanynyń irgesindegi Asa ózeni de asaý minez tanytty. О́zen óz arnasymen aǵyp jatqanymen, sýdyń ekpini jaǵalaýyndaǵy tospalardan jasalǵan bó­getterdi buzyp jibergen. Sonymen qa­tar, oblystyq tótenshe jaǵdaılar de­par­ta­mentiniń málimetinshe, saıajaı alabyna ba­rar joldy da sý basqan.   Al Jambyl aý­dany ákiminiń orynbasary Erlan Qy­dyráliulynyń aıtýynsha, mundaı to­syn jaǵdaı sońǵy jyldary múlde bol­ma­ǵan. Oqıǵa oryn alǵan kúni aýdan ákimi­niń oryn­ba­sary «Jýalydaǵy «Teris – Ashy­bulaq» sý qoımasynan Asa ózenine se­kýndyna 40-60 tekshe metr sý kelýi kerek bol­sa, bú­ginde kúnniń kúrt jylynýy sal­da­rynan 105 tekshe metr sý beri jiberilip otyr» de­gen bolatyn. Tipti, bul jaǵdaı aýdannyń aı­nal­ma jolyndaǵy «Batys Eýropa – Batys Qytaı» kólik dálizine de qaýip tóndiretin kó­rinedi. Biraq búginde Asa ózenindegi to­s­palardan jasalǵan bógetterdi kúsheıtý maq­satynda oblystan 60 tehnıka jáne 200-ge tarta jumys kúshi jumyldyrylǵan. Sondyqtan da Jambyl aýdanynda búginde jaǵ­­daı turaqty. Jeksenbi kúni jaýǵan jaý­yn, onyń sońyn ala bere túsken qar da ózen ja­ǵalaýyndaǵy jumys qarqynyn odan ári arttyrýda.

 Aýylsharýashylyǵy mınıstrligi Sý resýrstary komıtetiniń sý resýrstaryn paıdalanýdy retteý jáne qorǵaý jónindegi Shý – Talas basseındik ınspeksııasynyń basshysy Jumabek Muhatov kúnniń kúrt jylynýy saldarynan Jýaly jáne Jambyl aýdandarynda sý kóbeıip ketý oqıǵasy oryn alǵanymen, naqty qar sýynan keletin qaýiptiń joqtyǵyn aıtyp otyr. Sondaı-aq, oblystyq tótenshe jaǵdaılar departamentiniń málimetinshe de qazirgi tańda qar sýynan keletin qaýiptiń aldyn alý barysynda tıisti jumystar júrgizilip jatyr eken.

Qaraǵandydan – Mıras Asan

Qarqaralynyń qyzyl sýy qara jamyldyryp jatyr...

Kesheli beri qutqarýshylar sý tasyp jatqan Nurken aýy­lyn­da iz-túzsiz joǵalyp ket­ken aǵaıyndy eki jigitti izdestirý ústinde. Buǵan deı­in 31 naýryz kúni  Besoba aýyly­nan 13 shaqyrym jerde «ÝAZ» kó­ligi qar sýyna batyp, 3 adam qa­za tapqan edi...

– 1977 jáne 1980 jyl­­­­dary týǵan Nurken aýyly­nyń turǵyndary Qo­pa ózeni­nen ótý kezinde jo­ǵa­lyp ket­kendigi týraly ha­bar 2 sáý­ir­de, keshki saǵat je­ti­niń kezinde kelip tústi. Oqı­ǵa Nurken aýylynan 500 metr jerde oryn alǵan. Oqı­ǵa ornyna oblys ákimi Er­lan Qoshanov bastaǵan qut­qarý­shylar tikushaqpen attan­dy. Jergilikti tur­ǵyn­dar da kó­­mektesip jatyr, – deıdi ob­lystyq TJD bas­shysynyń oryn­basary M.Qatpanov.

Habarsyz ketken aǵaıyn­dy­­­lardyń biri aýyldas jigit­pen mal izdeýge shyqqan. Olar kópir arqyly kúndiz ózen­­niń arǵy betine ótken, al qaıtarda atqa minip, ózen arqyly ótpek bolǵan. Alaıda attylardyń birin ózen­­niń qatty aǵysy aǵyzyp áket­ken. Ekinshisi jaǵaǵa shy­ǵyp, kómekke jergilikti tur­ǵyn­dardy shaqyrǵan.Onyń ishin­de joǵalǵannyń aǵasy da kelgen. Baýyryn izdeý ú­s­tinde ony da aǵys alyp ket­ken...

Tótenshe jaǵdaılar de­par­­tamenti eki oqıǵany da tas­qynǵa qatysty demeıdi. Se­b­ebi, aýyl turǵyndaryna qatań eskertýler jasalyp, al­dyn ala saqtandyrý sha­ra­lary júrgizilgendigin al­ǵa tartady. – «Qarashoqy – Bes­oba» jergilikti mańyzdaǵy tas­jolynda bolǵan qaı­ǵy­ly oqı­ǵa kóktemgi sý tas­­qynymen baı­lanysty emes. Aýmaqta ta­syǵan sý­dyń bı­iktigi nebári 10 san­tı­metr­­di qu­rady, – de­di Qa­ra­ǵan­­dy ob­lystyq tótenshe jaǵdaılar de­par­ta­me­nti­niń bas­pa­sóz hat­shy­sy Qýanysh Mú­tál­lapov.

Al endi  Qarqaraly aý­da­nynyń prokýratýrasy ol jaı­tqa qatysty «Qazaqparat» til­shisine «Bul jol-kólik oqı­ǵa­sy emes, sondyqtan «jolda jú­­rý qaǵıdalaryn buzý»  ba­by boıynsha qylmystyq is qoz­ǵamadyq, oǵan esh negiz joq» dep habarlaıdy.

Besoba aýylynda sýǵa ket­ken 13 jasar Erasyl Dar­hanulyn, 19 jastaǵy Jan­bo­lat Májıtovti jáne 56 jas­ta­ǵy Bolat Ábildınovti keshe jerledi.

Taldyqorǵannan  – Nurbol Áldibaev

Jetisýdyń qalalary men aýyldaryn aınala or­na­lasqan Alataý men Jetisý (Jo­ńǵar) Alataýynyń basy jyldaǵydaı aq qar bolyp jatyr. Ázirge qar sýynan qaýip joq. Talǵar, Qaskeleń, Aqsý, Sarqan ózen­deriniń arnalary tol­ǵa­nymen saıabyrsı aǵýda. Endi shildeniń ortasynda taý basyndaǵy muzdaqtar erip, sý deńgeıi kóterilýi múm­kin. Eger kún kúrt ysyp ket­se, taý qoınaýyndaǵy kól­derdiń betindegi muzdar bu­zylyp, taý tasy men topy­ra­ǵyn qopara qozǵalýy bek múm­kin. Muny tótenshe jaǵ­daı­lar komıtetine qarasty Qa­zSeldenQorǵaý mem­­le­kettik mekemesiniń ma­man­da­ry baqylap otyr. Tıisti oryn­d­arǵa sorǵylar men qu­byrlar ornalastyrylǵan. Osy quraldar kómegimen qar sýynyń qaýpi joı­y­la­tyn­dyǵyna mamandar senim artýda.

Pavlodardan – Farıda Byqaı

Buǵan de­ı­in óńirdegi res­pýb­­lıkalyq ma­ńy­zy bar Lenın – Aq­sý – Úlken Aq­jar jo­lynda, Ba­ıan­aý­yl­dyń Ýl­ıa­nov­skıı – Ker­neı – Qalqaman jol­d­arynda tasqyn sýdyń júrip ótkeni anyqtaldy. Biraq, tótenshe jaǵdaılar departamenti, oblys aýyldaryna kólikpen jetý múmkindigi bar dep otyr. Sý jol deńgeıinen asqan aýyldarǵa qosymsha kúsh pen tehnıka jumyldyryldy. Qut­qa­rý­shylar aýyldardy sý basý qaýpi joq, al, sý bolsa bul aýyldardan qardyń der kezinde shy­ǵarylmaýyna baılanysty deıdi.

Oblys ortalyǵyna qarasty Kenjekól aýylynda tasqynnyń aldyn alý úshin jedel top jumys jasaýda. Aýyl ishinen 35 tekshe metr qar, 645 tekshe metr sý shyǵaryldy. Aýyl mańyna uzyndyǵy 1,2 shaqyrym, bıiktigi 2 metr bolatyn bir damba salynsa, qazir uzyndyǵy 700 metrlik taǵy bir sý bógetiniń jumysy júrip jatyr. Biraq, endi bári de jaqsy, sý qaýpi joq dep jasyryp- jaba berýge de bolmas, jyldaǵydaı Kenjekól, Baıanaýyldyń Teńdik, Qaraashy, Kókdombaq, Jańajol, Jýantóbe, Aqshı, Lebıaji aýdanynyń ortalyǵy, Jambyl, Keńshilik aýyldary, Pavlodar aýdanynyń Mıchýrın, Aqtoǵaı aýdanynda Sholaqsor aýyldaryna sý tasqyny kelý qaýpi bar.

Oblystyq tótenshe jaǵdaılar bas­qar­masy eger tasqyn kelý qaýpi kúsheıse, Shyǵys Qazaqstan, Qaraǵandy oblystarynan qosymsha kúsh kelýi múmkin. Qazirgi kúni 2923 tonna janar-jaǵarmaı, 8 000 tonna ınertti materıal men 60 000-ǵa jýyq qum toly qap, 140-qa jýyq tehnıka men 400-den asa maman daıyn. Departament ókilderi osy ýaqytqa deıin tasqynnyń aldyn alý boıynsha óńirdegi 200-ge jýyq úılerdi aralap, 5 myńnan astam qala, aýyl turǵyndaryna túsindirý jumystary júrgizilipti.

Jalpy, tasqynǵa qarsy jumys sharalary qardyń tolyq erý kezinde, ekinshisi, óńirdegi sý qoımalaryndaǵy sý mólsheriniń artýy kezinde qolǵa alynady. Mysaly, Qaraǵandy oblysyndaǵy Qaratoqa bógeti aýmaǵynan aǵatyn qar sýy Baıanaýyldyń Teńdik, al Aqmola oblysyndaǵy Sileti sý qoımasynan keletin sý Aqtoǵaı aý­da­nynyń Sholaqsor aýyldaryna qaýip tón­diredi. Osynyń aldynda ǵana Lenın kenti – Aqsý – Aqjar aýyly baǵytyndaǵy respýblıkalyq mańyzdaǵy avtokólik jolyn tasqyn sý basyp ketken-di. Tipti, qara joldy qoıyp, tasqyn sý óńirdegi Aqsý, Maı aýdany – Degeleń baǵytyndaǵy Pavlodar – Almaty poıyzy jolyna da qaýip tóndirdi. Sondyqtan, «Qazaqstan temir joly» AQ jolaýshylardyń qaýipsizdigin saqtaý maqsatynda poıyzdardyń baǵytyn ózgertýge májbúr boldy. Oblystyq tótenshe jaǵdaılar departamentiniń baspasóz qyzmeti habarlaǵandaı, 30 naýryz kúni keshki saǵat 20:13-te Aqsý – Maı – Degeleń baǵytyndaǵy temir jol jol boıyn sý basyp ketkeni týraly aqparat kelip túsken. Tasqyn saldarynan №31 «Almaty-1 – Pavlodar», №376 «Astana – Lenınogorsk», №67 «Zashıta – Astana», №68 «Astana – Zashıta» poıyzdary Reseıdiń Qulyndy men Lokot stansalaryn aınalýlaryna týra kelgen.

Senbi kúni oblys ákimi Bolat Baqaýov Baıanaýyl aýdanyna baryp, kóktemgi sý tasqynyna baılanysty jaǵdaıdy óz kózimen kórip, joǵaryda biz jazǵan sý basý qaýpi bar birneshe aýyldy aralap, aǵyn sý ótip jatqan joldardy qarap shyǵypty. Sondyqtan Jańajol aýylynda aýyl men Eskeldi shatqaly arasyndaǵy shaıyla bastaǵan tóspeli joldyń janynda qutqarýshylar táýlik boıy kúzet júrgizetin beket qurýdy tapsyrdy. Kókdombaq aýylyna aparatyn qıyrshyq tas tóselgen joldyń birneshe jerin aǵyn sý shaıyp ketken. Teńdik, Qaraashy aýyldarynda tasqyn sýdy basqa arnaǵa burý úshin arnaıy aryqtar qazylǵan. Iаǵnı, tasqynnyń alǵashqy tolqyny ótti. Endigi tosqyn Qaraǵandy oblysyndaǵy sý qoımalarynan jiberiletin sýǵa ázir bolý kerek.

– Barlyq aýyldarda táýlik boıy ke­zek­shi­lik júrgizilsin. Aýdanda arnaıy tehnıka men qorǵanys kúshteri bar. Kóktemgi sý tasqyny kezinde birde-bir aýyldyń sý ótinde qalýyna jol bermeýimiz kerek, – dedi B.Baqaýov.

Ekinshiden, Maı aýdanyndaǵy Maı – Degeleń temir jolynyń boıynda bolǵan sý tasqynynyń zardaptary qazirgi kezde joıyldy. Biraq, «Qazaqstan temir joly» AQ úshin temir jol boıyn sý alyp ketý qaýpi aldaǵy jyldarǵa úlken sabaq boldy, qazir poıyzdardyń qatynasy qalpyna keltirildi, sý basý qaýpi joq.