Jıynǵa oblys ákimi Janseıit Túımebaev, Ál-Farabı atyndaǵy Qazaq Ulttyq ýnıversıtetiniń rektory Ǵalymqaıyr Mutanov pen atalǵan ýnıversıtet janyndaǵy 10 ǵylym ınstıtýtynyń ǵalymdary, óńirdegi joǵarǵy oqý oryndarynyń ǵalymdary men ónerkásip salasynyń mamandary qatysty.
Prezıdenttiń bıylǵy Joldaýynda «óndiriske ınnovasııalar engizý» tapsyrmasy men keshegi «Bolashaqqa baǵdar: rýhanı jańǵyrý» maqalasynda aıtylǵan ıdeıalardy júzege asyrýda Ońtústikte Qazaq Ulttyq ýnıversıteti ǵalymdary 40-qa jýyq jobasy usynylǵan ınnovasııalar kórmesi men búgingi dóńgelek ústel osy tapsyrmany júzege asyrýdaǵy bastama bolyp otyr.
Árbir memlekette ǵylym men bilimniń óndirispen baılanysy jaqsy bolǵan jerde sol eldiń ekonomıkasy damıtynyn aıtqan aımaq basshysy Qazaq Ulttyq ýnıversıtetimen baılanysty nyǵaıtý qajettigin atap ótti.
«Ál-Farabı ýnıversıtetimen biz eki jaǵynan tyǵyz baılanysa alamyz. Birinshisi qazaq bilimi men ǵylymynyń elimizdegi qara shańyraǵy bolsa, ekinshi jaǵynan Ál-Farabıdiń týǵan jeri Ońtústik Qazaqstan oblysy. Osy jaǵynan biz birlesip jumys atqaryp elimizdiń ekonomıkasynyń damýyna súbeli úles qosýymyz qajet. Búgin osy maqsatta ýnıversıtetpen yntymaqtastyq týraly memorandýmǵa otyramyz. Osynyń aıasynda Ál-Farabıdiń týǵan jeri Otyrar aýdanynda jáne Túrkistan qalasynda arheologııalyq qazba jumystaryn birlese otyryp ary qaraı damytý. Jáne oblysta kóptegen jańa qalashyqtar tabylyp jatyr, solardyń biri Shymkentegi Abylaı hannyń ordasy bolǵan «Han qorǵan» degen jer bar, odan keıin Ábý nasyr Ál-Farabıdiń ósken jeri Otyrar bolsa, týǵan jeri «Oqsyz» qalashyǵynda eshqandaı qazba jumystary júrgizilmegen. Osy arheologııalyq qazba jumystardy sizderdegi mamandarmen birlese otyryp jasaýǵa daıynbyz», - dedi ákim.
