Qazaq degen qasıetti halyqqa tán ulttyq úrdisti ulyqtaý qajettiligin Elbasy «Bolashaqqa baǵdar: rýhanı jańǵyrý» atty maqalasynda: «Eger jańǵyrý eldiń ulttyq-rýhanı tamyrynan nár almasa, ol adasýǵa bastaıdy», dep kóregendikpen dál aıta bilgen. Álemdik úrdisten oqshaý ómir súre almaıtyndyqtan, ózgerip jatqan dúnıege oraı, jan-jaqty bolý – ýaqyt talaby. Urpaqtarymyzdy dástúrli qundylyqtarmen sýsyndatyp, órkenıet kóshinen qaldyrmaı, búgingi básekeli kezeńniń qatań talaptaryna saı tárbıeleý úshin sananyń saralyǵy qajet.
El men ultqa, qoǵam men otbasyna tulǵa bolatyn qaıratkerlerdi qalyptastyrý – ulttyq jańashyl tárbıemen, izdenimpaz eńbekqorlyqpen, ólsheýsiz ter tógýmen keletin jeńis. Iisi qazaqtyń qazirgi basty mindeti – urpaqtaryn otbasynda ulttyq rýhta tárbıelep, quryshtaı shynyqtyrý. Sondyqtan jas urpaqqa bilim ǵana emes, sanaly tárbıe berýge den qoıyp, janqııarlyqpen kúresý – árbir esti azamattyń paryzy.
Elbasy: «Men qazaqstandyqtardyń eshqashan buljymaıtyn eki erejeni túsinip, baıybyna barǵanyn qalaımyn. Birinshisi – ulttyq kod, ulttyq mádenıet saqtalmasa, eshqandaı jańǵyrý bolmaıdy. Ekinshisi – alǵa basý úshin ulttyń damýyna kedergi bolatyn ótkenniń kertartpa tustarynan bas tartý kerek», dep ulttyq sanamyzdy qaıta jańǵyrtyp, qazaqtyń taǵdyryn aldyńǵy orynǵa shyǵaryp, kezek kúttirmeıtin ulttyq qundylyqtardy ulyqtaýǵa úndeıdi.
Kisilik nıet, adal yqylas bolsa, kúrmeýi qıyn, kúrdeli túıindi sheshýdiń de joly bar. Qazaq halqy – Uly Dalanyń ulyq muragerleri! Sondyqtan paıdasyz dańǵazalyqtan bas tartyp, urpaǵymyzdyń jarqyn keleshegi úshin ulaǵaty zor, nátıjesi mol isterdi yjdaǵattylyqpen júzege asyratyn kezeńde boıkúıezdik pen samarqaýlyqqa jol berýge bolmaıdy.
Ortaımaıtyn qazyna – ımandy, kórgendi urpaq. Dástúrge adal, paryz ben qaryzdyń salmaǵyn, qundylyqtardyń qunyn biletin jasampaz urpaq tárbıeleý – halqymyzdyń keleshegine qyzmet etý degen sóz. «...ózgelerdiń tájirıbesin alyp, eń ozyq jetistikterin boıǵa sińirý múmkindigi. Azııadaǵy eki uly derjava – Japonııa men Qytaıdyń búgingi kelbeti – osy múmkindikterdi tıimdi paıdalanýdyń naǵyz úlgisi», degen Elbasy ózgege kózsiz elikteýdi emes, «ózgelerdiń eń ozyq jetistikterin boıǵa sińirý» qajettiligin aıta otyryp, sanamyzdy jańǵyrtyp, ýaqyt kóshinen qalyp ketpeýdi meńzeıdi.
Endigi uly maqsat – ımandy da eńbekqor halqy bar, básekege qabiletti, ekonomıkasy damyǵan, tegeýrindi memleket qana eshkimge des bermeıtinin urpaq sanasyna quıyp, ulttyq qundylyqtarmen qunarlandyrý.
Adamı abzal qasıetter týraly ólmes oılar aıtqan uly Abaı: «Teginde, adam balasy adam balasynan aqyl, ǵylym, ar, minez degen nárselermen ozady» dese, Mustafa Shoqaı «ulttyq rýhsyz ult táýelsizdiginiń bolýy múmkin emes» degen qanatty qaǵıdalarymen asqaq rýhty urpaq qana el kelesheginiń kepili bola alatynyn meńzeıdi.
Qaısar babalarymyzdyń ǵasyrlar boıǵy kúresimen kelgen elimizdiń basty qundylyǵy táýelsizdikti baıandy etý, urpaǵymyzdyń sanasyna rýhanı qundylyqtardyń baǵa jetpes qasıetin sińirý – elimizdegi árbir azamattyń parasatty paryzy.
Elbasynyń «Men halqymnyń taǵylymy mol tarıhy men yqylym zamannan arqaýy úzilmegen ulttyq salt-dástúrlerin aldaǵy órkendeýdiń berik dińi ete otyryp, árbir qadamyn nyq basýyn, bolashaqqa senimmen bet alýyn qalaımyn», degen rııasyz yqylasyn jastarǵa túsindirip, óskeleń urpaqtyń sanasyna ulttyq qundylyqtardy tereń sińirýge árqaısymyz atsalysýymyz kerek.
Baqytjan Ertaev,
Parlament Májilisiniń depýtaty
