«Eýrazııa-2011» kınofestıvali osy kúreń kúzde ótedi

Osydan úsh jyl buryn Astanaǵa aýysyp, odan keıin Almatyǵa qaıta oralǵan halyqaralyq «Eýrazııa» kınofestıvali bıyl jetinshi ret 19-24 qyrkúıek aralyǵynda ótpek. Bul festıvalǵa usynylatyn fılmder qazaq kınematografııasynyń sońǵy jetistikterin beınelemek. Elimizde tek bıylǵy jyly 27 fılm túsi­ril­gen bolsa, onyń 12-si osy baı­qaýǵa joldama alady dep kútilýde. Eki aıdan keıin ótkiziletin kıno-dýmannyń jaı-japsaryna oraı «Interfaks-Q­a­zaq­stan» agenttiginde «Eýrazııa» HKF-niń uıym­dastyrý komıteti arnaıy baspasóz máslıhatyn ótkizdi. О́ıtkeni, áne-mine degenshe kelip qalatyn qyrkúıek aıy da alys emes. Oǵan qosa kınofestıvalge daıyndyq jumystary búginde qyzý júrip jatqan kórinedi. Bul týraly BAQ ókilderine «Eýrazııa» HKF uıymdastyrý komıtetiniń tóraǵasy, Sh.Aımanov atyndaǵy «Qazaqfılm» kınostý­dııasy» AQ prezıdenti Ermek Amanshaev aıtty. – 19 qyrkúıek kúni Mádenıet mınıstrligi, Sh.Aımanov atyndaǵy «Qazaqfılm» AQ, Kınematografıster odaǵy jáne «Eýrazııa» HKF dıreksııa­synyń uıymdastyrýymen bolatyn kınofes­tı­valdiń ashylý saltanaty ótedi. Shara jyldaǵydaı – «Almaty towers» kesheninde bolady. Festıval sheńberinde júretin barlyq is-sharalar men kezdesýler sol ǵımarat pen ondaǵy bes kınozalda ótedi. Qazir negizgi uıymdastyrý jumystary aıaqtaldy. Baǵdarlama aýqymdy bolmaq. Shilde aıynyń sońynda festıval baıqaýyna qatysatyn negizgi kartınalar belgili bolady. Konkýrsqa 12 kartına qatysady, – dedi ol. Jáne «Eýrazııa-2011» kınofestıvaliniń halyq­ara­lyq qazylar alqasyn ataqty ońtústikkoreıalyq rejısser Kım Kıdýk basqaratyny belgili bolyp otyr. Onyń «Arırang» atty sońǵy kartınasy «Erekshe oqıǵa» baǵdarlamasy boıynsha kór­setilmek. – Qazylar alqasynyń quramyna sondaı-aq, áıgili japon rejısserleriniń biri Ioıchı Saı (2007 jyly onyń «Qan men súıek» fılmi «Eýrazııa» konkýrsyna qatysqan), Reseı halyq ártisi, rejısser Vladımır Hotınenko jáne áıgili fransýz akteri, rejısser jáne sazger Jıl Marshan bar, – dedi ulttyq stýdııa basshysy. Onyń aıtýynsha, kınofestıval barysynda halyqaralyq konkýrspen qatar, «Qarqyndy damyp kele jatqan qazaq kınosy – 2010 jyldyń sońy men 2011 jyly túsirilgen fılmder», «Halyq­aralyq kınofestıvalderdiń júldeger fılmderi», «Vırtýaldy Batys», «О́zgermeli Shyǵys», «AQSh elshiligi usynǵan derekti fılmder baǵdar­lamasy», «Venesııalyq kınofestıval jańǵy­ryǵy» baǵdarlamalary usynylatyn bolady. Eýrazııa kıno keńistiginde qulashyn jaıyp kele jatqan kıno-baıqaýdyń buljymaıtyn bir dástúri – álemge aty máshhúr kıno sańlaqtarymen kózbe kóz qaýyshtyrýy. Bıylǵy jyly da «Eýrazııa» kınofestıvaline álemdik kıno juldyzdary  keledi. Osy festıvaldiń negizgi qonaq­tary­nyń ara­syn­da «Oskar» syılyǵynyń júldegeri, fransýz aktrı­sasy Jıýlet Bınosh, amerıkandyq akter, prodıýser ári ssenarıst, «Shanhaıdaǵy tal­tús», «Shaqy­ryl­maǵan qonaqtar», «Ol, men jáne onyń dostary» fılmderiniń keıipkeri Oýen Ýılson da bar. Bir aıta ketetin jáıt, ótken jyly «Eýra­zııanyń» konkýrstyq baǵdarlamasyna usynylǵan 15-ke tarta otandyq fılmder ishinen iriktelgen A.Sataev­tyń«Adasqandar» men F.Sháripovtiń «Qyz­ǵylt qoıan týraly ańyz» fılmderi qatysyp, kınogerler tarapynan laıyqty baǵalanǵan bo­la­tyn. Al bıyl ekranǵa joldama alǵan fılmder ishi­nen R.Ábdirashevtiń «Balalyq shaǵymnyń aspa­ny», E.Konchalovskııdiń ekshn-fılm zańdary bo­ıynsha túsirilgen «A-ǵa qaıta oralý», A.Sa­taev­tyń «Lıkvıdator», S.Táýekelovtiń «Jeruıyq», E.Nur­mu­ham­betovtiń «Ańshy bala» jáne D.Sa­la­mat­tyń «Kishkentaı» fılmderin erekshe atap ótýge bolady. Al, G.Nasyrovtyń «Gákký», J.Po­sha­nov­tyń «Jel qyzy» jáne T.Baıtúkenov pen T.Qa­symjanovtyń «Sýperbaha» fılmderi aı­ryqsha kınematografııalyq ádisterimen erekshelenedi. Bul oraıda, atalmysh fılmderdiń halyqaralyq baı­qaýǵa qatysýy múmkindigi sóz boldy. Aınash ESALI, Almaty.