Mas bolǵanyń jas bolǵanyń emes, qaıta ózińe qas bolǵanyń

Osydan birneshe jyl buryn kó­shelerde júrseńiz, ár metr sa­ıyn temeki men araq-sharaptyń qyzyldy-jasyldy jarnama­la­ryn kezdestiretin edik. Ol azdaı, buqarany tárbıeleıtin, olarǵa oń men teristi kórsetetin teleekran­ǵa da shyǵaryp, talaıǵa deıin saı­randattyq. Biraq, ol kúnder de óz dáýrenin aıaqtady. Osyndaı jar­na­malarǵa tyıym salynǵannan ke­ıin, jarnama agenttikteri men telearnalar biraz kók qaǵazdardan qaǵylǵany belgili. Olardyń qal­talaryn paıdasynan góri zııany áldeqaıda basym dúnıeler­men toltyrýǵa, árıne, halyq mindetti emes. Baıqap qarasańyzdar, ondaı jarnamalardyń ornyn búgingi tań­da salamatty ómir saltyn na­sı­hattaıtyn, temeki shegý adam aǵ­za­syna zııan ekeni jónindegi jarnamalar basqan. Degenmen de qansha jerden jarnamaǵa tyıym salyp, áı deıtin áje, qoı deıtin qoja bardyń keıpin tanytsaq ta, qoǵamymyz áli de bolsa araq-sharap pen temekige óz táýeldi­likterinen arylar emes. Búginde eshbir toı-tomalaq araqsyz ótpeıdi. Eger bir kisi ıman keltirip, jasaǵan toıynda dastarqanǵa ishimdik qoımasa, onda asta-tók aýqaty men as-sýynyń quny kók tıyn. Jurttyń kóbi osyny eskerip, sózge qalmaý úshin de dastarqanynyń da, toıynyń da «sánin» keltirip jatady. Bar jıǵan, tergenin araq-sharaptyń «joǵary sortyna» jumsaıtyndar da joq emes. Sol baıaǵy maqtan úshin. «Túgensheniń toıyndaǵy araq-sharap bálenshenikinen myq­ty shyqty. Toı degendi osylaı jasaý kerek qoı!» – deıtin bir aýyz maqtan men qolpash úshin. Jurt bar jamandyqtyń, ba­qyt­syzdyqtyń bastaýy osy araq-sharap ekenin bilmeıdi emes, biledi. Bile tura ishimdikke jaqyn júretinder kóp. Bul – ashy bolsa da shyndyq. Mynandaı bir oqıǵaǵa tap bolǵanym bar. Qoǵamdyq kólik­tiń ishi. Bir aıaldamadan eki jas jigit otyrdy. О́zimizdiń qarakóz­der. Kirgenderi sol-aq eken, spırtti ishimdiktiń ıisi burq ete qaldy. Jolaýshylar jıirkengendeı, qa­baq­taryn tyrjıtty. Al analar bolsa, kólik ishinde tynyshtyq saqtamaýlary óz al­dyna, aýyz­daryna kelgenderin syrtqa shy­ǵaryp jatty. Iship alǵan adamdarda mádenıet degen qaıdan bolsyn. О́stip turǵanda, ári-beri teń­se­lip shatqaıaqtaǵan bireýi baıqaý­syz­da bir sary shashty qyzdyń aıaǵyn qaǵyp ketti. «Keshirińiz» dep aıtyp úlgermegen jigitti sary shashty jerden alyp, jerge saldy. Qyzý aıtys bastaldy. Jigit te ózine qatysty shekten tys aıtylyp jatqan ǵaıbat sózderge oraı, jaýap qaıtarýǵa kiristi. Bi­raq, shynymen de, álgi sary shash­tynyń sózderi súıekten óterlik­teı edi. Ultymyzǵa da taıaqtyń bir ushy tıip jatty. Mundaı jaǵdaıda júreginde ultyna degen oty bar kez kelgen adamnyń jaıbaraqat otyra almaıtyny tú­sinikti-tin. Qysqasy, kólik ishin­degiler sary shashty qyzdy «jep» qoıa jazdady. Bizdiń ózgege kórseter úlgimiz osy ma? Araı ÚIRENIShBEKQYZY.