Saltanatty sharada Prezıdent janyndaǵy Ulttyq ǵylym akademııasynyń prezıdenti Aqylbek Kúrishbaev kremnıı salasyn damytý elimizdiń joǵary tehnologııaly ónerkásibin qalyptastyrýdyń, energetıkalyq ótpeli kezeńdi qamtamasyz etýdiń jáne eldiń tehnologııalyq egemendigin nyǵaıtýdyń strategııalyq negizi ekenin atap ótti.
«Memleket basshysy Q.Toqaev halyqqa Joldaýynda belgilegen ekonomıkany ártaraptandyrý, jańartylatyn energııa kózderin damytý jáne taý-ken metallýrgııa kesheni aıasynda joǵary tehnologııaly óndiristerdi iske qosý jónindegi tapsyrmalarǵa tolyq sáıkes keletinin atap ótti. Elimizde jartylaı ótkizgishtik kremnıı óndirýge arnalǵan negizgi shıkizat – kvarstyń 40 mıllıon tonnadan astam qory bar. Bul elimizde shıkizatty óndirýden bastap monokrıstaldyq kremnıı quımalaryn, jartylaı ótkizgish plastınalardy jáne kún modýlderin shyǵarýǵa deıingi tolyq tehnologııalyq tizbekti qalyptastyrýǵa biregeı múmkindik beredi. «Krıtıkalyq materıaldar óndirisi» jobasy aıasynda monokrıstaldyq kremnıı quımalary men jartylaı ótkizgish fotoelektrlik plastınalar shyǵaratyn zaýyt salý, sondaı-aq krıstall ósirý jáne jartylaı ótkizgishtik ınjınırıng zerthanasyn qurý kózdelgen», dep atap ótti A.Kúrishbaev.
Premer-mınıstr Oljas Bektenovtyń tóraǵalyǵymen etken Keńeste kremnıı salasyn damytý máselelerine erekshe nazar aýdaryldy. Onyń barysynda Ulttyq kremnıı klasteri jobasy Memleket basshysynyń tapsyrmalary aıasynda júzege asyp jatqandyǵy, ýákiletti memlekettik organdarmen kelisilgendigi aıtyldy. Maqsaty – krıtıkalyq materıaldar ımportyna táýeldilikti tómendetý, kún energetıkasyn, mıkroelektronıkany jáne fotonıkany damytý, jańa jumys oryndaryn qurý, eldiń eksporttyq áleýetin arttyrý sııaqty mindetterdi sheshý. Osy oraıda Ulttyq ǵylym akademııasynyń basym ǵylymı-tehnologııalyq jobalardy iske asyrýdaǵy, nátıjesin ekonomıkanyń naqty sektoryna engizýdegi róli týraly aıtyldy.
Kremnıı klasterin damytýda Ulttyq ǵylym akademııasy ǵylymı qoldaý sharalaryn, ozyq tehnologııalardy engizý, irgeli jáne qoldanbaly zertteýler júrgizýdi, joǵary bilikti kadrlar daıarlaýdy, R&D-ınfraqurylymdy damytýdy, patentter alýmen qatar halyqaralyq ǵylymı basylymdarda nátıjelerdi jarııalaýdy qamtamasyz etetin bolady.
Qazirgi kezde ǵylym, memleket jáne bıznes arasyndaǵy uzaq merzimdi ındýstrııalyq jáne ınnovasııalyq nátıjege baǵyttalǵan keshendi ózara is-qımyl modeli qalyptasyp jatyr. Ulttyq kremnıı klasteri elimizdiń ónerkásiptik jáne ǵylymı-tehnologııalyq damýynyń negizgi draıveriniń birine aınalady. Al zerthananyń ashylýy men óndiristiń iske qosylýy elimizdiń tehnologııalyq táýelsizdigine, ornyqty damýyna jáne bolashaǵyna salynǵan strategııalyq ınvestısııa bolyp tabylady.
