Zańsyz ákelingen et ónimderi tárkilendi

Ústimizdegi jyldyń 2 tamy­zy­nan 9 tamyzyna deıin Aýyl sharýashylyǵy mınıstrliginiń qyzmetkerleri Keden odaǵy min­detteriniń aıasynda elimizdiń óńir­lerinde saýda oryndaryna keletin et ónimderiniń maldárigerlik-sanı­tarlyq qaýipsizdigin tekserý máselesi boıynsha reıd ótkizdi. Osy shara barysynda «Aqtaý-Port», «Morport», «Temir-Baba» JShS-larynyń jáne birqatar kásiporyndardyń ótkizý pýnktteri memlekettik maldárigerlik baqy­laý organdarynyń tártibine sáı­kes tekseristen ótti. – Aqtaý qalasyndaǵy «Kompanııa HAN» JShS-nyń qoıma­lary­nan tekseris kezinde 59 tonna iri qara mal eti tabyldy. Qujattarǵa sáıkes bul et bizdiń elimizge Avstralııadan ákelingen kórinedi, – deıdi mınıstrliktiń baspasóz qyz­meti. Tekseris barysynda bul et ónimderiniń eshqandaı maldári­ger­lik-sanıtarlyq talaptarǵa saı emes­tigi anyqtaldy. Sonymen bir­ge, «Kompanııa HAN»  JShS-nyń aýmaǵynda odan ári júr­gizilgen tekseris barysynda taǵy da et ónimderi toltyrylǵan úsh konteıner tabyldy. Bul konteınerlerde 113 tonna et saqta­lyp­ty. Qujat bo­ıynsha, bul ónim­der­d­i Avstra­lııa­dan «Iýnaıted Indastrıes» JShS ákelgen delingen. Biraq, sa­rap­shy­lar­dyń málim­deýin­she, is júzinde bul et ónimderi Avstralııadan emes, Ońtústik-Shyǵys Azııa elderinen jetkizilgen kórinedi. Al Keden odaǵy talaptary boıynsha bul  elderden bizdiń aýmaqqa et ónim­derin ákelýge tyıym salynǵan. Mine, osyndaı jan-jaqty júr­gizilgen tekseris qorytyndy­syn­da, Aýyl sharýashylyǵy mınıstrligi ákelingen jeri beımálim 200 tonna etti tárkiledi. Bul ónimderdiń jalpy quny 170 mıllıon teńge bolady. «Azyq-túlik ónimderiniń qaýipsizdigi týraly» Qazaqstan Respýblıkasynyń zańyna sáıkes tárkilengen ettiń bári joıyldy. Jaras SÁDÝAQASOV. Astana.