Ulttyq Bank basshysy Qazaqstan bankteriniń birigýine qatysty pikir bildirdi

QR Ulttyq Bank tóraǵasy Danııar Aqyshev eki bankti biriktirý máselesi týraly oıyn aıtty, dep habarlady «QazAqparat». Ulttyq bank basshysy bank sektoryn shoǵyrlandyrý úderisi týraly jıi aıtylǵanyn atap ótti. «Bank sektoryndaǵy shyǵystar men shyǵyndardy ońtaılandyrý — sharasyz úderis. Bank aksıonerleri qarjy ınstıtýttardy kapıtaldandyrý boıynsha aldaǵy mindettemeler turǵysynan olardyń bıznesiniń tabystylyǵyn qamtamasyz etýge qanshalyqty qabiletti ekenin baǵalaýy tıis. Iаǵnı, osy bankterde bar mindettemeler boıynsha ýaqtyly eseptesýi kerek. Eldegi ekonomıkalyq belsendilik baıaýlaǵan jaǵdaıda, kóptegen qarjy ınstıtýttary úshin shoǵyrlandyrý úrdisi tıimdi sheshim. Sonda bir ınstıtýttyń kúshti jaqtaryn biriktirý esebinen basqa ınstıtýttyń álsiz jaqtary joıylyp, saý teńgerimdi qarjy ınstıtýty qalyptasýy múmkin», — dedi Aqyshev. «Bankter birigý nıeti týraly memorandýmǵa qol qoıǵanda, naryqta basqa bankter týraly áńgimeler júrip jatqanyn bilemin. Bul úderis jalǵasa beredi jáne bıznestiń ekonomıkalyq baǵalaýyna negizdeledi. Biz retteýshi retinde elde turaqty qarjylyq júıe qalyptasýyna múddelimiz. Eger biriktirýdi durys dep boljasaq, naryqta oıynshylardy kooperasııalaý nemese shoǵyrlandyrý qarjy júıesiniń ornyqtylyǵyn jaqsartýǵa alyp keledi. Biz muny quptaımyz. Keshe eki bank óz pikirlerin aıtyp, bank aksıonerleri Ulttyq bank basshylyǵymen kezdesti. Qaı úlgi boıynsha alǵa jyljıtynyn kórsetti. Olar qaı jaqqa jyljý qajettigin túsinedi dep oılaımyn», — dedi Ulttyq bank basshysy. Budan buryn habarlanǵandaı, «Tengri Bank» AQ «Capital Bank Kazakhstan» AQ-pen birigý nıetteri týraly memorandýmǵa qol qoıdy. Sondaı-aq Ulttyq bank Qazkommersbank aksııalarynyń baqylaý paketin satyp alý nıeti týraly aıtty. Budan basqa «Sesnabanktiń» «Bank SentrKredıt» bankimen birigý múmkindigi talqylanyp jatqany belgili.