Jıynǵa Ulttyq komıssııanyń turaqty músheleri, múddeli memlekettik organdardyń basshylary, bilim, ǵylym jáne mádenıet qaıratkerleri qatysty.
Sharanyń alǵysózin Mádenıet jáne sport mınıstri alyp, elimiz egemendikke qol jetkizgeli beri Elbasy basshylyǵymen Qazaqstannyń álem aldyndaǵy bedelin kóterý boıynsha júrgizgen jumystar týraly aıtty.
– Qysqa merzimniń ishinde Qazaqstan syrtqy saıasatyn belsendi júzege asyryp otyrǵan turaqty, serpindi damýshy memleketke aınalyp otyr. 25 jyl ishinde Qazaqstan IýNESKO-nyń Atqarýshy keńes, Búkilálemdik muralar komıteti, IýNESKO Halyqaralyq gıdrologııalyq baǵdarlamasy boıynsha Úkimetaralyq komıteti, sondaı-aq birqatar saılaý bólimderi sekildi jumys organdaryna belsendi qatysty. Uıymnyń bedeldi tizimderine elimizdiń materıaldyq emes mádenı mura elementeri, mádenı jáne tabıǵı mura obektileri, Qazaqstannyń bıosferalyq qorlary engizildi, – dedi Mádenıet jáne sport mınıstri.
Sonymen qatar, vedomstvo basshysy Ulttyq komıssııanyń qurylýyna atsalysqan ǵalym Murat Áýezovke, aqyn Oljas Súleımenovke, Qazaqstannyń Reseıdegi elshisi Imanǵalı Tasmaǵambetovke alǵys bildirdi.
Sharanyń saltanatty bóliginde Qazaqstannyń tórt jańa elementteri, ıaǵnı «Naýryz», «Ańshy qustarmen ań aýlaý», «Juqa nan daıyndaý dástúrleri: lavash, qatyrma, jupqa, ıýfka», «Qazaq kúresi» IýNESKO-nyń Materıaldyq emes mádenı mura Reprezentatıvtik tizimine engizilgeni jóninde sertıfıkattar tapsyryldy. Sonymen qatar, Ulttyq komıssııanyń ótken jylǵy jumysy qorytyndylanyp, 2017 jylǵy qyzmetiniń negizgi baǵyttary anyqtaldy.
Aıan ÁBDÝÁLI,
«Egemen Qazaqstan»
