Dástúrli sharanyń basty maqsaty – eýropalyq klassıkter týyndylarynyń úzdik úlgilerin nasıhattaý. Jıylǵan qaýym aldymen Eýroodaq qarjylandyratyn jasyl ekonomıka, adam quqyqtary, týrızm men bilim berý syndy jobalardyń jetistikteri men nátıjelerin kórsetetin jármeńkemen tanysty.
...Erekshe sáýletimen kóz tartar teatr búginde ónersúıer qaýymnyń at basyn jıi buratyn ornyna aınalǵan. Ásirese, sheteldik qonaqtar munda jıi keledi. Búgin de teatrǵa aǵylyp jatqan qaýym arasynda qazaq ta, basqa ult ta, sheteldikter de kóp. Tili bólek, túri basqa bolǵanmen, óner degen sıqyrly kúsh jınaǵan jandar XVII-XIX ǵasyrlarda qalyptasqan Batys Eýropanyń klassıkalyq mýzykasymen sýsyndamaq.
Sahna tórinde Eýropalyq Odaq pen Qazaqstan Respýblıkasynyń Ánurandary qalyqtap, Qazaqstandaǵy Eýroodaq ókildiginiń basshysy Traıan Hrıstea men Syrtqy ister mınıstriniń orynbasary Roman Vasılenko kópshilikti Eýropa kúnimen quttyqtady.
...Sahnada – Astana qalasy Memlekettik akademııalyq fılarmonııasynyń sımfonııalyq orkestri. Dırıjerdiń buıryǵyn baǵyp otyr. Zal siltideı tynǵan... Konserttiń shymyldyǵy grek kompozıtory Nıkos Skalkotastyń mýzykalyq týyndysymen túrildi. Zal ishinde shybynnyń yzyńy estiletindeı tynyshtyq, myń túrli sazdy ún áýezi jandy baýraǵan ǵajap mýzyka qudiretine eltigen kópshilik álem mádenıetiniń klassıkalyq týyndylaryn birinen soń birin tyńdap, eki saǵat ýaqyttyń qalaı óte shyqqanyn ańdamaǵandaı. Tula boıdy shymyrlatyp, alpys eki tamyryńdy ıdiretin klassıkalyq kompozıtorlardyń shyǵarmalary birinen soń biri qalyqtady. Pıt Heın, Pancho Vladıgerov, Ferens Lısttiń rapsodııalarymen elitken orkestr Emıls Darzınsh, Sebastıan Bah, Sezar Frank, Iogann Shtraýstyń kórkem týyndylary qazaq astanasynda qalyqtady.
Konsert sońyn Aıtqalı Jaıymovtyń «Ereýil atqa er salmaı» týyndysymen aıaqtaǵan ónerpazdarǵa kórermen tik turyp qoshemet kórsetti...
Jansaıa Shyńǵyshanqyzy
