Raıymbek aýdanynyń Kegen aýyldyq aımaǵynda tabıǵat tosyn minez tanytty. Qystygúni ketken esesin endi qaıtarǵysy kelgen bolsa kerek, kúni keshe, ıaǵnı, maýsym aıynyń 6-synan 7-sine qaraǵan túni qar jaýa bastady. O basta tosyrqaǵandaı bolǵanmen, azdan keıin-aq boı úırete bastaǵan turǵyndar jazdyń qaryna tańyrqap emes, qyzyqtap qana qaraıdy. Birdi-ekili turǵyndarmen telefon arqyly tildeskenimizde jaz boıy taýdyń basynda jatatyn qardyń ara-tura etekke túsip, «qonaq» bolyp ketetini zańdy nárse sııaqty áser etkenin ańdadyq. Osydan bir apta buryn bastalǵan jaýyn-shashyn taýly aımaqtaǵy kún raıyn áldeqaıda sýytyp jibergen. Bir jeti jaýǵan jańbyrdyń sońy qarǵa aınalýy zańdy da, óıtkeni, etektegi aýylǵa jańbyr jaýsa, erteńine irgedegi taýdyń basynyń aǵaryp shyǵa kelgenine turǵyndar ábden úırengen.
Oblystyq «Qazgıdromet» ortalyǵy mamandarynyń aıtýynsha, taýly aımaqtarǵa jaz mezgilinde túsetin qardy aldyn ala boljaý qıyn. Sebebi, atmosferalyq fronttar men sıklondar sýyq jel arqyly ótedi. Jazdygúni jaýyn-shashynnyń qar túrinde túsýi, kóp jaǵdaıda, soltústik jel aǵysynyń áserinen bolady. Eger jerdegi jylý 15 gradýs bolsa, bult qabatyndaǵy temperatýra nólden tómen kórsetkishke túsedi de, jaýyn-shashyn qarǵa aınalady deıdi.
«Maldy aýyldar, jaılaýǵa endi qonǵan malshylar qandaı kúıde?» degen saýalymyzǵa: «Etektegi Kegende mynadaı jaǵdaı bolyp jatqanda, taý qoınaýyna suǵyna kirgen jaılaýlarda sóz joq qar bary anyq, bálkim, budan da qalyń bolýy. Bul óz kezeginde jańa týǵan tólge qıyndyq týǵyzatyny anyq. Degenmen, mal shyǵyny bar degen aqparat túsken joq. Onyń ústine, qardyń qalyńdyǵy 1-2 santımetrden aspaǵan», deıdi oblystyq tótenshe jaǵdaılar departamentiniń ókili Azamat Jurtbaev.
Jergilikti jurt úırenip qalǵan tabıǵattyń mundaı minezin «Basyna Labasynyń bult ilikse, Bar aımaq kúrk-kúrk jóteledi», deıtin Muqaǵalıdyń sózimen de túsindirýge bolady...
Almas NÚSIP,
«Egemen Qazaqstan»
Almaty oblysy
