Ázirlenip jatqan basseındik josparlar byltyr qabyldanǵan Sý kodeksin iske asyrýdyń negizgi tetikteriniń biri sanalady. Ár basseınge arnalǵan qujattar keıin Sý resýrstaryn keshendi basqarýdyń bas josparyn daıyndaýǵa negiz bolady. Mınıstrliktiń málimetinshe, barlyq basseındik jospardy jyl sońyna deıin aıaqtaý kózdelip otyr, al bas jospar 2027 jyldyń sońyna qaraı daıyn bolady. Bul qujattar memlekettik josparlaýdyń mańyzdy elementine aınalady.
Biz aıtyp otyrǵan «basseın» uǵymy turmystaǵy júzý basseıni emes, sý sharýashylyǵyna qatysty ǵylymı termın. Sý sharýashylyǵy basseıni dep belgili bir ózenge, kólge nemese sý júıesine quıatyn barlyq sý kózderi qamtylǵan tabıǵı aýmaq atalady. Iаǵnı, bul – sýdyń qaıdan kelip, qaıda baǵyttalatynyn tutas qarastyratyn keńistik. Sý resýrstaryn basqarýda dál osy basseındik qaǵıda qoldanylady, óıtkeni sý ákimshilik shekaramen emes, tabıǵı arnamen aǵady. Sondyqtan sýdy qorǵaý men paıdalanýdy oblys nemese aýdan boıynsha emes, tutas sý júıesi deńgeıinde josparlaý áldeqaıda tıimdi sanalady.
Sý resýrstary jáne ırrıgasııa mınıstri Nurjan Nurjigitov bul jóninde Parlament Senatynyń qoldaýymen uıymdastyrylǵan «Taldaý mektebi» qoǵamdyq jobasynyń qatysýshylarymen ótken kezdesýde aıtty. Onyń sózinshe, jańa josparlar Memleket basshysynyń sý-energetıka kartasyn ázirleý jónindegi tapsyrmasyn oryndaýǵa tikeleı qyzmet etedi.
«Memleket basshysy Qazaqstannyń sý-energetıka kartasyn jasaýdy tapsyrdy. Basseındik jáne bas josparlar bul kartany ázirleýge negiz bolady. Biz sý nysandarynda elektr energııasyn óndirý úshin qansha kólemde sý paıdalanýǵa bolatynyn naqty anyqtaı alamyz. Bul másele Sý kodeksin ázirleý kezinde de eskerilgen», dedi mınıstr.
Kezdesý barysynda mınıstrlik mamandary men vedomstvoǵa qarasty uıymdardyń basshylary qatysýshylarǵa Sý kodeksindegi jańashyldyqtar, sý sharýashylyǵy sektoryn sıfrlandyrý barysy jáne iske asyrylyp jatqan ınfraqurylymdyq jobalar týraly keńinen málimet berdi. Baıandamadan keıin tyńdaýshylar salanyń kadr áleýetin kúsheıtý, qoldanylyp júrgen sıfrlyq sheshimderdiń tıimdiligi jáne qoǵamda sýǵa uqypty qaraý mádenıetin qalyptastyrý máseleleri boıynsha suraqtaryn joldady.
Aıta keteıik, «Taldaý mektebi» jobasy 2021 jyly Senat janyndaǵy Jas sarapshylar klýbynyń bastamasymen iske qosylǵan. Baǵdarlama aıasynda qatysýshylar segiz apta boıy derekterdi jınaý men taldaý ádisterin meńgerip, analıtıkalyq materıal ázirleý daǵdylaryn jetildiredi. Oqý qorytyndysynda jas analıtıkter óz usynystaryn memlekettik organdarǵa, sonyń ishinde mınıstrlikke joldaıdy.
