Elordalyq Qazanat ıppodromynyń aýmaǵynda biregeı etnoaýyl óz qushaǵyn ashty. Qala turǵyndary men Halyqaralyq EKSPO kórmesiniń qonaqtary jan-jaqty buqaralyq-mádenı is-sharalady tamashalaı alady. Ol EKSPO-2017 kórmesindegi mádenı-týrıstik biregeı joba. Keshen kelýshilerin qazaq halqynyń salt-dástúri, óneri men baı mádenı murasymen tanystyrady.
Meımandar ótkenge saıahat jasap, kóshpendiler órkenıetimen tanysyp, batyr, sheber nemese búrkitshiniń obrazyna ene alady. Astanadaǵy etnoaýyl 10 maýsym men 10 qyrkúıek aralyǵynda jumys isteıdi. Osy úsh aı ishinde shamamen 700-ge jýyq shara ótkizý kózdelip otyr.
«Qazaq áýenderi» AQ vıse prezıdenti Sáken Shakeevtiń málimetinshe, sheteldik qonaqtar úshin kúndelikti konserttik sharalar ótkizý josparlanǵan. Maqsaty – EKSPO qonaqtary men kelýshilerin tek nano tehnologııalarmen ǵana emes, sonymen birge qazaq halqynyń baı tarıhy men zor mádenı murasymen keńinen tanystyrý.
Improvızasııalanǵan aýyl «Qazanat» ıppodromy aýmaǵyna 2500 sharshy metr aýmaqqa tigilgen 30 kıiz úıden turady. Sondaı-aq, oıyn-saýyqqa da arnaıy baǵdarlama bar. «Saıys», «Qyz qýý», «Kúmis alý, «Altybaqan» oıyndary da óz kórermenderin tabady dep kútilýde.
Aýyl aýmaǵynda qazaqtyń ulttyq mýzykalyq jáne teatr óneri men atbegilik jáne ulttyq sport túrlerinen arnaıy baǵdarlamalary da ázirlendi. «Dástúrli ańshylyq túrleri» sektorynda ulttyq ańshylyq óneri tanystyrylady. Mergender men saıatshylar kelýshilerge bekzada ónerdiń qyr-syryn tanystrady.
Ulttyq keshenniń taǵy bir ereksheligi qolóner sheberleri bolmaq. Úsh aı boıy meımandar ulttyq qolóner týyndylaryn tamashalap qana qoımaı, olardyń daıyndalý barysyna atsalysa alady.
