Investor balabaqsha salyp berdi

Keńes odaǵy ydyrap, ekonomıkalyq baı­lanystar shirigen jipteı úzilgennen keıin-aq kezindegi áp-ásem tirligi bar Altyndy aýy­­lynyń kúıi taıyp júre berdi. Osyn­daǵy altyn kenishi jabylyp qaldy,  aýylda elektr jaryǵy bolmady, basqa da áleýmet­tik nysandardyń qyzmeti toqtady. Altyn­dylyqtar shaharly jerlerge údere kóshti. Osyndaı kúrdeli kezeńde altyn kenishin satyp alǵan «Iýbıleınyı» JShS qaraýsyz qal­ǵan kenish óndirisiniń boıyna qan júgir­týdi qolǵa aldy. Sóıtip, ajary taıǵan Al­tyndy aýylynyń ınfraqurylymyn qalpy­na keltirýdi, áleýmettik nysandaryna kóńil bólýdi de umytpady. Mundaı ıgilikti is jemisin berip, aýyldyń ajary kire bastady, altyndylyqtardyń erteńgi kúnge senimi artty. Jaqynda Altyndy aýylynyń turǵyn­dary taǵy bir qýanyshqa bólendi. «Iýbıleı­nyı» JShS aýyldyń qaq ortasynan sý jańa 75 oryndyq  «Balapan» balabaqshasyn salyp, paıdalanýǵa berdi. Bul balabaqsha tolyqtaı seriktestiktiń qarjysyna saly­nyp, jergilikti bıýdjetke tegin berilip otyr. Balabaqshanyń saltanatty ashylýyna  aýyl­­dyń taıly-taıaǵy qalmaı úlken-kishisi túgel jınaldy. Investorlar Altyndy aýylynyń bolashaǵymen tanystyrý úshin álemniń ondaǵan elderinen qarjy qurylymdarynyń ókilderin de erte kelipti. Merekelik saltanatta sóz alǵan Muǵaljar aýdanynyń ákimi Serik Shanǵutov altyndylyqtardy  qýa­nysh­ty sátpen quttyqtady. «Iýbıleınyı» JShS dırektorlar keńe­siniń tóraǵasy Borıs Lýzın mundaı jobany júzege asyra otyryp, bolashaqty qarjy­landyryp jatqandaryn tilge tıek etti. Búgingi búldirshinder eldiń erteńi, olar bolashaq ınjenerler, ekonomıster, bilikti mamandar. Bilikti mamandarsyz ekonomıka damymaıdy, óndiris órge baspaıdy. Iаǵnı, biz óz bolashaǵymyzdyń qamyn oılap otyr­myz, dedi ol. Qaıyńdy aýyldyq okrýginiń ákimi Ilııash Nııazova ınvestorlar kelgeli jasalǵan jaq­sylyqtardyń birqataryn tarqatyp aıt­ty. Onyń aıtýynsha, okrýgke qarasty Qaıyń­dy, Altyndy aýyldarynda  257 otba­sy turady, osy aýylǵa kóship kelýge tilek bildirýshiler kóp eken, aldaǵy kóktemde 47 otbasy tur­ǵyn úı salýǵa jer alyp otyrǵan kórinedi. Joǵaryda aıtylǵandardan basqa seriktes­tiktiń aýylǵa sý jetkizýge, mektepti jón­deýge, stýdentterdiń bir jyldyq oqý aqy­syn tóleýge kómekteskenin tilge tıek etti. Úsh balasy seriktestikte jumys isteıtin, nemeresi osy balabaqshaǵa baratyn   aýyl aǵasy Abaı Baımuhambetov bata berdi,  ájeler shashý shashty. «Iýbıleınyı» JShS dırektorlar keńesiniń tóraǵasy Borıs Lýzın balabaqshanyń sımvoldyq kiltin aýdan ákimi Serik Shanǵutovqa tapsyrdy. Saltanatty sátke jınalǵandar bala­baq­shanyń bólmelerin aralap kórip, sý jańa jıhazdaryna rıza bolǵan aýyl­dyqtar birin-biri quttyqtyp, máre-sáre boldy. Ata-ana­larymen, ata-ájelerimen ere kelgen, erteńgi kúni osy balabaq­shada tárbıe­lenetin búldirshinder­diń qýany­shynda da shek joq. Sábı kóńildiń áýestigimen jaryq ta taza ból­melerden shyqqylary joq, máz-meırem. Balabaq­shanyń ashy­lý saltanaty kóńil­di konsertke ulasty. Satybaldy SÁÝIRBAI. Aqtóbe oblysy, Muǵaljar aýdany.