«Qazhrom» transulttyq kompanııasy» aksıonerlik qoǵamynyń quramyna kiretin Aqtóbe ferroqorytpa zaýytynyń ujymy jańa Konstıtýsııanyń mánine toqtalyp, azamattardy daýys berýge belsendi qatysýǵa shaqyrdy. Kásiporyn qyzmetkerleriniń pikirinshe, referendým memlekettiń aldaǵy damý baǵytyn aıqyndaıtyn mańyzdy qadam bolmaq.
Jańa Konstıtýsııa jobasyn «Petropavl elektrotehnıkalyq zaýyty» JShS qyzmetkerleri de qoldady. Olardyń aıtýynsha, jańartylǵan konstıtýsııalyq normalar quqyqtyq memleketti nyǵaıtýǵa, bılik ınstıtýttarynyń rólin arttyrýǵa jáne azamattardyń quqyqtary men bostandyqtarynyń kepildikterin kúsheıtýge baǵyttalǵan.
Sondaı-aq Abaı oblysyndaǵy aýyl sharýashylyǵy tehnıkasyn óndiretin jetekshi kásiporyndardyń biri – «SemAZ» JShS-da konstıtýsııalyq reformany qoldaıtynyn málimdedi. 400-den astam maman eńbek etetin ujym jańa Konstıtýsııa quqyqtyq kepildikterdi nyǵaıtyp, turaqtylyq pen damý múmkindikterin keńeıtetinin, óńir men el ekonomıkasynyń ósýine serpin beretinin atap ótti.
Úsh kásiporyn da referendýmǵa qatysýdy azamattyq jaýapkershiliktiń kórinisi retinde baǵalaıdy. Olar jańartylǵan Konstıtýsııa Qazaqstannyń turaqty ári progressıvti damýyna berik negiz qalaıdy degen senim bildirdi.
Kásiporyn qyzmetkerleri turaqty jáne ashyq quqyqtyq ortany qalyptastyrý óndiristi damytýǵa, ınvestısııa tartýǵa jáne eldiń áleýmettik-ekonomıkalyq ósimin qamtamasyz etýge múmkindik beretinin erekshe atap ótti.
Ujymdar referendýmǵa qatysýdy Qazaqstannyń bolashaǵyn qalyptastyrýǵa qosylǵan naqty úles dep sanaıdy.
