Uly daladan Ońtústik Azııaǵa deıin...
Anyqtap aıtsaq, «AEROO» – mektep oqýshylaryna arnalǵan ınjenerlik bilim baǵdarlamalary men arnaıy jıyntyqtar ázirleıtin joba. Baǵdarlama aıasynda jasóspirimder jasandy ıntellekt, elektronıka, baǵdarlamalaý jáne ǵarysh tehnologııalaryn tájirıbe júzinde úırenedi. Sonymen birge oqýshylar mını-zymyrandar, spýtnık modelderi, drondar men roveler sekildi qurylǵylardy óz qolymen qurastyryp, naqty ınjenerlik tapsyrmalardy oryndaıdy. Bul ádis kúrdeli tehnologııalardy qarapaıym ári qyzyqty etip kórsetedi.
Joba jetekshisi Mıras Nýsýpovtyń aıtýynsha, «AEROO» baǵdarlamalarynyń ereksheligi, mektep oqýshylaryna magıstranttar deńgeıindegi jobalardy oryndaýǵa múmkindik beredi. «AEROO» startapyn qurýdyń negizgi maqsaty – mektep oqýshylaryna ınjenerııa, jasandy ıntellekt jáne ǵarysh tehnologııalaryn teorııa arqyly emes, naqty praktıkalyq tájirıbe arqyly úıretý. Joba jastardyń tehnologııany tek tutynýshy retinde paıdalanbaı, óz qolymen jasap kórýine múmkindik beretin bilim berý ortasyn qalyptastyrýdy kózdeıdi. Competition Driven Learning modeli arqyly oqýshylar naqty ınjenerlik tapsyrmalar men halyqaralyq jarystarǵa qatysa otyryp, kúrdeli tehnologııalardy túsinip, ınjenerlik oılaý qabiletin damytady. Uzaqmerzimdi maqsat – ǵylym men tehnologııa salasynda jańa býyn zertteýshilerin, ınjenerlerin jáne startap negizin qalaýshylaryn tárbıeleý», deıdi ol.
Zerdelep kórsek, jobanyń negizgi aýdıtorııasy – ınjenerııa nemese baǵdarlamalaý negizderin meńgergen 14-18 jas aralyǵyndaǵy jasóspirimder. Keıingi jyldary bul jastaǵy oqýshylardyń tehnıkalyq daıyndyq deńgeıi aıtarlyqtaı óskeni baıqalady. Kóptegen elde 17-18 jastaǵylardyń startap ashýy qalypty qubylysqa aınalyp otyr. Jobaǵa qatysqan mamandardyń aıtýynsha, jasandy ıntellekt quraldarynyń qoljetimdi bolýy men praktıkalyq bilim modelderiniń damýy aldaǵy jyldary ınjenerlik jobalarmen aınalysatyn balalardyń jasyn odan ári tómendetýi múmkin.
«AEROO» jobasynyń keńeıýine elimizdegi «Ǵylym álemin ashamyz» ulttyq ǵylymı jobasy úlken serpin bergen. Atalǵan kompanııa dástúrli naryqtyq zertteýlerge kóp qarajat jumsamaı, tikeleı jergilikti seriktestermen jumys isteý strategııasyn tańdaǵan. Iаǵnı ár elde ulttyq ınjenerlik jarystar uıymdastyratyn uıymdarmen áriptestik ornatyp, ónimderdi mektep baǵdarlamalaryna engizý arqyly aýqymdalý jolyn tańdady. Qazir «AEROO»-nyń seriktesteri Danııa, Vetnam, Indonezııa, Sıngapýr elderinde jumys isteıdi. Birqatar memlekette jobany bilim júıesine engizý boıynsha kelissózder jalǵasyp jatyr.
Memlekettik sektorǵa baǵyttalǵan startap
Kóptegen tehnologııalyq startap venchýrlyq ınvestısııa izdeıtini anyq. Al «AEROO» syrtqy ınvestısııa tartýdan sanaly túrde bas tartqan. Buǵan jobanyń B2G, ıaǵnı memlekettik sektorǵa baǵyttalǵandyǵy sebep. Mundaı kelisimder ádette uzaq ýaqytty talap etedi, keıde alty aıdan bir jylǵa deıin sozylady. Sonymen qatar jobanyń apparattyq quramdas bóliginiń bolýy venchýrlyq qorlardyń táýekel deńgeıin arttyrady. Komanda úshin basty maqsat – qarjylyq kórsetkishterden buryn jastar arasynda ǵylym men ınjenerııaǵa degen qyzyǵýshylyq qalyptastyrý.
Joba jetekshisiniń buǵan deıingi tájirıbesi az emes ekenin bildik. «Men Almaty qalasyndaǵy Nazarbaev zııatkerlik mektebiniń hımııa-bıologııa baǵytynda bilim aldym. Keıin Astana IT University ýnıversıtetinde aqparattyq tehnologııalar salasy boıynsha oqýymdy jalǵastyrdym. Eńbek jolymnyń bastapqy kezeńinde bilim berý jáne STEM baǵytyndaǵy jobalarda jumys istedim. Jobalyq menedjer retinde mektepterdegi oqý kabınetterin zamanaýı STEM jabdyqtarymen qamtamasyz etý jobalaryn júzege asyrýmen aınalystym. Sonymen qatar mektepterde ınjenerlik, robottehnıka jáne tehnologııalyq zerthanalardy engizý, bilim uıymdarymen jumys júrgizý, oqýshylarǵa arnalǵan tehnologııalyq ınfraqurylymdy damytý jobalaryn úılestirdim. Bul tájirıbe maǵan mektepterde praktıkalyq ınjenerlik bilim berýdi damytý, oqýshylarǵa zamanaýı tehnologııalardy úırenýge múmkindik jasaý, bilim júıesinde jańa tehnologııalardy engizý baǵytynda jumys isteýge múmkindik berdi», deıdi Mıras Nýsýpov.
Jastardyń múmkindigi qandaı?
«AEROO» ázirlegen ónimniń biri – «AI CubeSat Kit». Bul jıyntyq arqyly oqýshylar jumys isteıtin spýtnık prototıpin qurastyryp, sensorlar ornatyp, ushý baǵdarlamalyq jasaqtamasyn jazyp, qurylǵyny naqty synaqtarǵa daıyndaıdy. Baǵdarlamanyń fınaldyq kezeńi – ASLC halyqaralyq jarysy. Onda 20 fınalıst komandalar óz spýtnıkterin 20 myń metr bıiktikke deıin, ıaǵnı stratosferaǵa ushyrady. Mundaı tehnıkalyq deńgeıdegi tapsyrmalar ádette joǵary oqý oryndarynyń magıstranttaryna ǵana qoljetimdi bolsa, «AEROO» ony mektep oqýshylary úshin de júzege asyryp otyr.
Kompanııa qazir bastaýysh deńgeıdegi sıfrlyq saýattylyǵy bar balalarǵa arnalǵan jańa ónimder jelisin ázirleıdi. Osy arqyly ınjenerlik bilimdi barynsha qoljetimdi etý. Sonymen qatar elimizde aerokosmostyq tehnologııalarǵa arnalǵan iri halyqaralyq jarystar uıymdastyrý jospary bar. Eldiń ǵaryshtyq tarıhy men keń geografııalyq múmkindikteri mundaı jobalardy damytýǵa úlken serpin beredi.
«AEROO» jobasynyń basty qundylyǵy – ınjenerlik oılaý mádenıetin qalyptastyrý. Jasóspirimder teorııalyq bilimmen shektelmeı, naqty qurylǵylardy jasap, tájirıbe jasap, qatelikter arqyly úırenedi. Mundaı tájirıbe bolashaqta joǵary tehnologııalyq salalarda jumys isteı alatyn, óz startaptaryn qurýǵa qabiletti, jahandyq deńgeıde básekege túse alatyn jańa býyn mamandaryn tárbıeleýge negiz bolady. Elimiz jastary «AEROO» arqyly ǵarysh pen jasandy ıntellekt salasynda tek tutynýshy emes, ónim jasaýshy ultqa aınalý jolynda naqty qadam jasap otyr.
