Foto: Erlan OMAR/ Egemen.kz
«Halyqaralyq balalardy qorǵaý kúni – ár balanyń baqyty, amandyǵy men qaýipsizdigi qoǵam úshin eń qasterli qundylyq ekenin aıqyndaıtyn erekshe mereke. Árbir bala súıispenshilik pen meıirimge bólenip, qadir-qasıeti qurmetteletin ortada ósip, óz qabileti men darynyn erkin damytýǵa múmkindik alýǵa tıis. Memleket basshysynyń bastamasymen elimizde balalardyń quqyqtaryn qorǵaý júıesi dáıekti túrde jetildirilip keledi. Búginde bala qaýipsizdigi memlekettik saıasattyń negizgi basymdyqtarynyń birine aınaldy. Qazaqstan Respýblıkasynyń jańa Konstıtýsııasynda balalyq shaqty, ana men ákeni, otbasy ınstıtýtyn qorǵaý kepildikteri kúsheıtildi», dedi mınıstr.
Balalardy qorǵaý kúni: Prezıdent tapsyrmalary qalaı júzege asyrylyp jatyr?
Mınıstrdiń aıtýynsha, sonymen qatar Ata zańda ata-ananyń bala aldyndaǵy jaýapkershiligi «Balaǵa qamqorlyq jasaý jáne tárbıe berý – ata-ananyń etene quqyǵy ári mindeti» dep aıqyn bekitilgen. Bul qaǵıda balanyń quqyǵy men múddesin qorǵaý memleket pen otbasynyń ortaq paryzy ekenin aıqyndaıdy.
«Osy baǵyttaǵy júıeli jumystyń jalǵasy retinde bıyl 2026-2030 jyldarǵa arnalǵan «Qazaqstan balalary» tujyrymdamasy qabyldandy. Bul mańyzdy qujat balalardyń qaýipsizdigin qamtamasyz etýge, sapaly bilim men medısınalyq qyzmettiń qoljetimdiligin arttyrýǵa, áleýmettik qoldaý tetikterin kúsheıtýge jáne otbasy ınstıtýtyn nyǵaıtýǵa baǵyttalǵan keshendi sharalardy qamtıdy. Sonymen qatar «Ulttyq qor – balalarǵa» baǵdarlamasy tabysty júzege asyrylyp keledi. Búginde shamamen 7 mıllıon jas osy baǵdarlama arqyly óz bolashaǵyna arnalǵan qosymsha qoldaýǵa ıe bolyp otyr. Baǵdarlama iske qosylǵan alǵashqy jyly ár balaǵa 100,52 dollar eseptelse, 2026 jyly bul soma 130,71 dollarǵa deıin ósti. Bul qarajat bala kámelet jasyna tolǵannan keıin qoljetimdi bolyp, ony bilim alýǵa nemese turǵyn úı jaǵdaıyn jaqsartýǵa paıdalanýǵa múmkindik beriledi», dedi Aıda Balaeva.
Mınıstrdiń sózinshe, elimizde balalyq shaqty qorǵaýdyń ınstıtýsıonaldyq negizi de nyǵaıyp keledi. 2025 jyldan bastap jergilikti atqarýshy organdardyń qurylymynda balalardyń quqyqtaryn qorǵaý jónindegi arnaıy basqarmalar quryla bastady.
Osy saladaǵy mańyzdy jańashyldyqtardyń biri – kásibı qabyldaýshy otbasylar ınstıtýtynyń engizilýi. Endi qıyn ómirlik jaǵdaıǵa tap bolǵan balalar ýaqytsha negizde arnaıy daıarlyqtan ótken, jaýapkershiligi joǵary otbasylardyń qamqorlyǵynda tárbıelene alady.
«Bala quqyqtaryn qorǵaý, býllıng pen zorlyq-zombylyqtyń aldyn alý, psıhologııalyq qoldaý júıesin damytý, qorǵanshylyq pen qamqorshylyq tetikterin jetildirý, sondaı-aq jetim balalardy qoldaý máselelerine erekshe kóńil bólinip otyr. Balaly otbasylarǵa kórsetiletin áleýmettik kómek aıasy keńeıip, balalar densaýlyǵyn saqtaý júıesi jańǵyrtylyp, ár balanyń bilim alýyna, jan-jaqty damýyna jáne ózin tanytýyna jańa múmkindikter jasalyp jatyr.
Búginde biz balalardyń múddesi árdaıym birinshi orynda turatyn, árbir bala ózin qaýipsiz sezinetin, armanyn erkin júzege asyra alatyn Qazaqstandy birge qalyptastyryp kelemiz», dep túıindedi mınıstr Aıda Balaeva.
