Memleket basshysy «Keleshekte muǵalim mamandyǵy erekshe suranysqa ıe bolyp, eńbekaqysy joǵary bolmaq» dese, bıyl sol sóz oryndaldy deýge negiz bar. Ústimizdegi jylǵy shildede muǵalimderdiń eńbekaqysy 30 paıyzǵa ósse, 1 qyrkúıekten joǵary kategorııalary bar muǵalimder úshin laýazymdyq jalaqysyna 100 paıyz kóleminde ústeme qosyldy. Oǵan 5,3 mıllıard teńge bólingeni málim. Osy jylǵy jańa oqý jylynda mektep tabaldyryǵyn 2,5 mıllıonnan astam oqýshy attasa, olarǵa qazir 279 400 muǵalim sabaq beredi. Olardyń 120 myńy bıyl qaıta daıyndyqtan ótken. Ult rýhanııatynyń janashyry, tolqyn-tolqyn urpaqqa bilim berip, tárbıe úıretip júrgen ustazdarymyzdy aıtýly merekesimen quttyqtap, búgin olar týraly toptama maqalalardy usynyp otyrmyz.
----------------------------------------------
Jaqsylyq
ÚShKEMPIROV,
Olımpıada chempıony:
– Kele jatqan ustazdar kúni bárimizge ortaq. Bárimiz ulaǵatty ustazdarymyz arqyly azamat boldyq, alty alashtyń atyn búkil dúnıe júzine tanyttyq.
Asanáli
ÁShIMOV,
Qazaqstannyń
halyq ártisi:
– Men 1944 jyly 1-synypqa bardym. Alash degen apaıym boldy. Tamasha kisi edi... Al mektep basshysynyń temirdeı tártibi bizdi salmaqtylyqqa, tártip pen ádepke úıretti. Mine, sol eki adamǵa ómirbaqı qaryzdarmyn.
Ermahan YbyraıYMOV,
Olımpıada chempıony:
– Biz balalyq shaǵymyzdan ustazdardyń tárbıesinde boldyq. Men mektep-ınternatta óstim, sondyqtan, ustaz – men úshin birinshiden, tárbıeshim, ómirlik jolǵa baǵyttaǵan adam. Meni boksqa eń alǵash alyp kelgen de ustazym edi.
__________________________
KÁSIBI MEREKENIŃ MEREIIN О́SIRDI
«Bolashaqtyń basshysyn da, danasyn da, ǵalymyn da ustaz ósiredi. О́mirge urpaq bergen analardy qalaı ardaqtasaq, sol urpaqty tárbıeleıtin ustazdardy da solaı ardaqtaýǵa mindettimiz”, degen Baýyrjan Momyshulynyń qanatty sózi muǵalim mereıin ósirip, abyroıyn arttyrary anyq. Sol abzal jandardyń bıylǵy merekesine arnalǵan alqaly jıyn elordada ótti. Oǵan elimizdiń barlyq aımaǵynan 300-den asa ustaz qatysty. Onda Bilim jáne ǵylym mınıstri Baqytjan Jumaǵulov Elbasy Nursultan Nazarbaevtyń arnaıy quttyqtaýyn oqyp berdi. Onda «Qazirgi zamanda bilim deńgeıi joǵary ult qana jahandaný talaptaryna jaýap bere alady. Sondyqtan bilim salasy – eldiń erteńin aıqyndaıtyn, onyń básekelestik qabiletine yqpal etetin asa mańyzy sala. Bıyl elimiz óz Táýelsizdiginiń 20 jyldyǵyn atap ótedi. Biz osy jyldarda zaman talabyna saı bilim berýdiń jańa júıesin qurdyq» delingen. Al mınıstr bul shyn máninde barsha halyqqa ortaq mereke ekenin aıtyp, Táýelsizdiktiń 20 jyldyǵynda ustaz eńbegin erekshe baǵalap, atap ótýdi zańdylyq dep bilemin. Egemendiktiń alǵashqy jyldary óte qıyn kezeń bolatyn. Ult kóshbasshysy – Tuńǵysh Prezıdentimiz N.Á.Nazarbaevtyń basshylyǵymen elimiz aıaǵynan tik turyp, qarqyndy damý jolyna tústi, deı kelip, Elbasynyń «Kez kelgen aýylda muǵalim eń qurmetti, eń zııaly adam bolǵan. Biz ustazdyń osy mártebesin kóteretin bolamyz. Men muǵalimderimizdiń laıyqty ómir súrgenin qalaımyn» degen sózin dáıekke keltirdi. Sonymen birge, muǵalim ótken men búgindi jalǵaıtyn altyn arqaý, keleshekke jón silteıtin shamshyraq ekenin tilge tıek etip, olardyń alańsyz shyǵarmashylyqpen aınalysýyna, eńbek etýine memleket barlyq jaǵdaıdy jasap otyrǵanyn alǵa tartty. Bilim berýdi damytýdyń jańa memlekettik baǵdarlamasynda pedagog mártebesin kóterýge arnalǵan arnaıy bólimniń bar ekenin nazarǵa saldy. Jıyn sońynda bilim-biligimen kózge túsken, urpaq tárbıesindegi eńbegi eskerilgen bir top ustazdarǵa «Qazaqstan Respýblıkasynyń bilim berý isiniń qurmetti qyzmetkeri», «Y.Altynsarın» tósbelgileri jáne mınıstrliktiń Qurmet gramotalary tapsyryldy. Olardyń qatarynda Qyzylorda oblysynan kelgen L.Mıkeeva, Shyǵys Qazaqstan oblysynan B.Nurıeva, Almaty oblysynan B.Ádilov, almatylyq Iý.Dovgal, Pavlodar oblysynan D.Taıgýlın, Aqmola oblysynan Á.Táketov jáne taǵy basqalar bar. Olar sońǵy bir jyl ishinde pán muǵalimderiniń, ustazdardyń basqosýlary jıi ótip jatqanyn, bul ózderine jasalǵan zor qamqorlyq ekenin aıtyp, dán rızalyqtaryn bildirip tarasty. Súleımen MÁMET.
