Mektep kıimi ár shákirtke jarasady

Aqtóbe oblysynda bilim basqarmasy oqýshylardyń barlyǵyna birdeı mektep formasyn kııýdi mindettep otyr. Bul jóninde qoıylatyn talap­­­ty kúsheıte túsý týraly mektep basshylaryna tapsyrma berilgen. Soǵan baılanysty, keıbir mektepterdiń jarǵylaryna ózgerister engizilipti. Erejege sáıkes, endi oqýshylar ǵana emes, muǵalimder de birkelki kıim kııýi tıis. Sonymen qatar kolledj oqýshylary da bilim berý mekemeleriniń ishki tártip erejelerine saı kıinýge kóship jatyr. Qazir kolledj ben mektepke hıdjab kıip keletin oqýshylardyń sany kúrt kemigen. Biz osy jáne mektep formasyna qatysty qolǵa alynyp jatqan basqa da sharalar týraly oblystyq bilim basqarmasynyń bastyǵy Aıgúl ARYNǴAZIEVAMEN tildesken edik. – Oqýshylarǵa mektep formasyn kııýdi mindetteý, olardyń hıdjab kııýlerine tyı­­ym salý emes. Osyny ata-analar durys túsingeni jón. Jas­­tardyń ımandylyqqa bet burǵandary, árıne, du­rys. Biraq mektep – meshit emes, bilim shańyraǵy. Sondyqtan, oqýshy mektepte ishki tártipke ba­ǵynýy tıis. Búgin «musylmanbyz» dep keıbir qyz balalar hıdjab kıse, al erteń ózge dindegiler óz senimderi boıynsha kıinip kelýleri múm­­­kin. Sonda mektep ár túrli dinderdiń orta­­­lyǵyna aınala ma? Mine, sondyqtan, mek­­teptiń jarǵysymen bekitilgen erejelerdi oqýshy da, muǵalim de, ata-ana da oryndaýǵa mindetti, – deıdi Aıgúl Aman­ǵa­zy­qyzy. Ol mundaı talaptyń muǵalimderge de qo­ıylyp otyrǵandyǵyn aıtady. Olar da birkelki kıinedi eken. Sondaı-aq bul talap kolledj oqý­shylaryna da qoıylyp otyrǵan kórinedi. Oblys mektepterinde dinı ahýaldy jaq­sar­tý jóninde jańa oqý jylyna jumys jos­pary jasa­­lypty. Soǵan baılanysty birqa­tar is-sharalar uıymdastyrylǵan bolsa, so­nyń bir parasy – ata-analar jına­ly­s­tary. Onda «Otbasyndaǵy rýhanı izgilendirý tár­bıesi», «Zııandy zattardan erteń emes, búgin qutylǵan jón» taqyryptarynda baıandamalar tyńdalǵan. Sondaı-aq, mektepterde «Din jáne mektep», «Dinı fanatızm» taqyry­byn­da dóń­gelek ústel, «Dinniń adam­ǵa yqpaly» taqy­ryb­ynda tárbıe saǵattary ótkizilýde. Sonymen qatar, ob­lys­taǵy bar­lyq mektepter men kolledjderde dás­túrli emes dinı aǵ­ym­dardyń arty nege soqty­ra­tynyn jas­tar­ǵa túsindirý maqsatynda «Adasqan­dar» de­rek­ti fılmi kórsetilip jatyr eken. Fılm­de «Terrorızm» baby boıynsha isti bol­ǵan aqtó­belik Erkin Dosqalıev týraly baıandal­ǵan. Gúljan BAZYLQYZY. Aqtóbe.