Qazaq halqy úshin atadan balaǵa jalǵasqan urpaqtar sabaqtastyǵy qashanda aıryqsha mánge ıe. Sebebi, kez kelgen adam aldyńǵy aǵa býynnan kórgenin kókeıge túıip ósedi. Abylaıhan Qalyquldyń da quqyq salasyna degen qyzyǵýshylyǵy ádilettiń aq týyn kótergen ata jolynan bastaý alady. Teginde, quqyq salasynyń kásibı mamany bolý degen aqjoltaı armannyń kirpishi sol otbasyndaǵy tálimdi tárbıeden qalandy. Atasy О́mirtaı kóp jyldar boıy burynǵy Keles aýdandyq sotynyń tóraǵasy retinde zańnyń ústemdik qurýyna qyzmet etse, ákesi Altaı búginde Ordabasy aýdandyq sotynyń sýdıasy. Osyndaı zańgerler áýletiniń tálimin alǵan ol búginde Ordabasy aýdany ákimdigi apparatynyń zań bóliminiń bas mamany retinde qyzmet etip keledi.
Ol Ordabasy aýdanynyń ortalyǵy Temirlan aýylynda jalpy orta mektepti bitirgen soń, Shymkent qalasyndaǵy M.Áýezov atyndaǵy Ońtústik Qazaqstan memlekettik ýnıversıtetine oqýǵa túsip, ony 2012 jyly quqyqtaný mamandyǵy boıynsha bitirip shyǵady.
Ata-babalarymyz «Jas kelse – iske» dep, óskeleń urpaǵynyń aldaǵy muratyna aqjol tilesken. Onyń da osy murat jolyndaǵy alǵashqy baspaldaǵy «Jastar praktıkasy» baǵdarlamasy arqyly bastaldy. Elbasynyń elimizdegi jastarǵa degen qamqorlyǵy talaı jastyń qanatyn qataıtyp, ómirge degen qulshynysyn arttyrdy. Eliniń erteńi úshin eńbek etsem degen talapty jastyń talaıyna atalǵan baıandy baǵdarlamanyń sharapaty tıdi. Bul baǵdarlama birinshiden, tórt jyl teorııalyq bilimge qanyqqan jasty tájirıbelik turǵyda shynyqtyrsa, ekinshiden, jumys tappaı sendelgen óndirdeı jastardyń senimin nyǵaıtyp, keleshegine jol ashty.
A.Qalyqul 2012 jyly osy «Jastar praktıkasynyń» joldamasymen Ordabasy aýdandyq máslıhat apparatynda eńbek jolyn bastady. Sóıtip, eńbek jolynyń alǵashqy paraqtary ashyldy. Al 2013 jyldyń qazan aıyna deıin osy mekemede aýdarmashy qyzmetin atqardy. Sol jyldyń qazan aıynda memlekettik synaqta oń nátıje kórsetip, aýdan ákimi apparatynyń zań bólimine bas maman retinde jumysqa qabyldandy.
Memlekettik qyzmetshi – halyqtyń qyzmetshisi. Alǵash qyzmetke kiriskennen bastap, osy ǵıbratty sanasyna berik ornatýǵa tyrysty. Sonyń nátıjesinde ol memlekettik qyzmetshige júktelgen mindetterdiń mańyzdylyǵyn uǵyna tústi.
Elbasynyń «100 naqty qadam» Ult josparynyń bereri mol. Ondaǵy basym baǵyttardyń biri elimizde kásibı memlekettik apparatty qalyptastyrýǵa arnalǵan. Sanasy sergek, oıy ozyq kásibı mamandar – memlekettik qyzmettiń lokomotıvi ispetti. Buqara men bılik arasynyń dánekeri sanalatyn memlekettik qyzmetshilerdiń bul baǵyttaǵy jumysy eren deýge bolady. Reforma bastalǵaly ıini qanbaǵan talaı isterdiń kóbesi sógilip, ilgeridegi sarytap kózqarastar jańa zamanǵa beıimdelý ústinde. Qazir kez kelgen memlekettik qyzmetshiniń bilimi men biligine saı ósýine, qyzmette joǵarylaýyna jaǵdaı qarastyrylǵan. Oqımyn degen talapty qyzmetshilerge elimizben qatar, sheteldiń aldyńǵy qatarly joǵary oqý oryndarynda bilimin jetildirýine bolady. Ol úshin memleket barlyq múmkindik qarastyrýda. Abylaıhan Qalyqul da osy talapqa saı bolý úshin bilim men biliktilikti ushtastyryp, halyqtyń údesinen shyǵýdy aldyńǵy orynǵa qoıyp otyr.
Bizdiń keıipkerimiz Ońtústik Qazaqstan oblysy kóleminde ótkiziletin túrli sharalarǵa belsene qatysyp, tájirıbesin arttyra túsýde. Osynyń arqasynda ol «Qazaqstan-Shymkent» telearnasynyń «Aıtarym bar» habaryna qatysyp, memlekettik qyzmetshilerdi attestattaý jónindegi ózekti máseleler týraly utymdy oılaryn bildirdi. Mundaı erkin suhbattar árbir memleketik qyzmetshiniń tynysyn ashyp, kásibine degen qushtarlyǵyn arttyra túseri sózsiz.
Saıyp kelgende, elge qyzmet – keleli mindet. Osyǵan saı bolý árbir memlekettik qyzmetshiniń paryzy bolmaq. Osy oraıda «Úzdik memlekettik qyzmetshi» konkýrsynyń mańyzy aıryqsha. Atalǵan konkýrstyń «Memlekettik organdardyń quqyqtyq jáne kadr qyzmetin qamtamasyz etýin basqarý» nomınasııasyn jeńip alǵan Abylaıhan Qalyqul aldaǵy ýaqytta da osy baǵytynan taımaı, ózine júktelgen mindetti abyroımen oryndaı beretinine senimdi.
Qoryta aıtqanda, Elbasy memlekettik qyzmetshilerge erekshe senim artyp otyr. Sol senimdi aqtaý – Abylaıhan sekildi jas mamandarǵa aıryqsha amanat júkteıdi.
Baqtııar TAIJAN,
«Egemen Qazaqstan»
Ońtústik Qazaqstan oblysy
