Qazaqstan Respýblıkasy Úkimetiniń qaýlysy №923

2011 jylǵy 13 tamyz,  Astana, Úkimet Úıi Qazaqstan Respýblıkasynda avtomobıl tasymaldarynyń ruqsat berý júıesin halyqaralyq qatynasta qoldaný qaǵıdasyn bekitý týraly «Avtomobıl kóligi týraly» Qazaqstan Respýblıkasynyń 2003 jylǵy 4 shildedegi Zańynyń 12-babynyń 13) tarmaqshasyna sáıkes Qazaqstan Respýblıkasynyń Úkimeti qaýly etedi: 1. Qosa berilip otyrǵan Qazaqstan Respýblıkasynda avtomobıl tasymaldarynyń ruqsat berý júıesin halyqaralyq qatynasta qoldaný qaǵıdasy bekitilsin. 2. Osy qaýly alǵashqy resmı jarııalanǵan kúninen bastap kúntizbelik on kún ótken soń qoldanysqa engiziledi. Qazaqstan Respýblıkasynyń Premer-Mınıstri K.MÁSIMOV. Qazaqstan Respýblıkasy Úkimetiniń  2011 jylǵy «13» tamyzdaǵy №923 qaýlysymen bekitilgen Qazaqstan Respýblıkasynda avtomobıl tasymaldarynyń  ruqsat berý júıesin halyqaralyq qatynasta qoldaný qaǵıdasy 1. Jalpy erejeler 1. Osy Qazaqstan Respýblıkasynda avtomobıl tasymaldarynyń ruqsat berý júıesin halyqaralyq qatynasta qoldaný qaǵıdasy (budan ári – Qaǵıda) «Avtomobıl kóligi týraly» Qazaqstan Respýblıkasynyń 2003 jylǵy 4 shildedegi Zańynyń 12-babynyń 13) tarmaqshasyna (budan ári – Zań) sáıkes ázirlendi. 2. Qazaqstan Respýblıkasynyń aýmaǵy arqyly avtokólik quraldarynyń júrip ótý tártibi «Qazaqstan Respýblıkasynyń aýmaǵy arqyly avtokólik qural­darynyń júrip ótýin reglamentteıtin keıbir máseleler» týraly Qazaqstan Respýblıkasy Úkimetiniń 2008 jylǵy 31 jeltoqsandaǵy №1345 qaýlysymen belgilenedi. 3. Qaǵıda qoldaný merzimi kúntizbelik bir jyldan asatyn turaqty jolaýshylar jáne bagaj tasymalyna beriletin sheteldik ruqsattardy qospaǵanda Qazaqstan Respýblıkasynda avtomobıl tasymaldarynyń ruqsat berý júıesin halyqaralyq qatynasta qoldaný jáne sheteldik ruqsattardy berý tártibin aıqyndaıdy. Qaǵıda menshik quqyǵymen nemese ózge de zańdy negizderde mynadaı avtokólik quraldaryna ıelik etetin dara kásipkerler men zańdy tulǵalarǵa qoldanylady. 1) avtobýstar, shaǵyn avtobýstar; 2) júk avtomobılderi (olardyń tirkemeni qosqanda ruqsat etiletin jalpy salmaǵy 6 tonnadan astam nemese tirkemeni qosqanda ruqsat etiletin paıdaly júktemesi 3,5 tonnadan astam); 3) mamandandyrylǵan avtomobılder (belgili bir júk túrin tasymaldaýǵa arnalǵan); 4) arnaıy avtomobılder (ártúrli kóbinese kóliktik emes jumystardy oryndaýǵa arnalǵan). 4. Osy Qaǵıdada mynadaı uǵymdar paıdalanylady: 1) avtokólik quraldaryna ruqsat berý kartochkasy – avtokólik quralyn júkterdiń halyqaralyq avtomobıl tasymaldarynda paıdalanýǵa ruqsat beretin qujat; 2) jolsapar – avtokólik quraldarynyń jóneltý pýnktinen mejeli pýnktine júrýi jáne jóneltý pýnktine keri oralýy; 3) júkterdiń halyqaralyq avtomobılmen tasymaldaryn júzege asyrýǵa ruqsat berý kýáligi – Qazaqstan Respýblıkasynyń avtomobıl tasymaldaý­shylaryna júkterdiń halyqaralyq avtomobılmen tasymaldaryn júzege asyrýǵa quqyq beretin qujat; 4) qosymsha ótinim – jyldyq ótinimge qatyspaǵan nemese jyldyq ótinimde sheteldik ruqsattardyń belgili bir túrin jáne qajetti sanyn kórsetpegen otandyq tasymaldaýshy bergen sheteldik ruqsattardy alýǵa ótinim; 5) otandyq ruqsat – ruqsat berý qujaty, onyń negizinde halyqaralyq qatynasta jolaýshylardy, bagajdy jáne júkterdi tasymaldaýdy, sondaı-aq úshinshi elderge (elderden) tasymaldaýdy júzege asyratyn sheteldik avtokólik quraldarynyń Qazaqstan Respýblıkasynyń aýmaǵyna (aýmaǵynan) kelýi (ketýi), Qazaqstan Respýblıkasynyń aýmaǵy arqyly tranzıti júzege asyrylady; 6) reıs – avtokólik quraldarynyń jóneltý pýnktinen mejeli pýnktine deıin júrip ótýi; 7) ruqsat berý qujaty – Qazaqstan Respýblıkasynyń aýmaǵy arqyly júrý quqyǵyn rastaıtyn qujat (otandyq nemese sheteldik ruqsat, úshinshi elderge (elderden) tasymaldy oryndaýǵa arnalǵan ruqsat, arnaıy ruqsat, tirkeý talony); 8) ruqsat blankilerimen almasý kvotasy (budan ári – almasý kvotasy) – shet memlekettermen almasý úshin kelisilgen sheteldik ruqsattardyń sany; 9) tranzıttik júrip ótý (tranzıt) – jóneltý jáne mejeli pýnktteri osy memlekettiń aýmaǵynan tys ornalasqan memlekettiń aýmaǵy arqyly júkpen nemese júksiz avtokólik quraldarynyń júrip ótýi; 10) tirkeý talony – Qazaqstan Respýblıkasy ratıfıkasııalaǵan halyqara­lyq sharttarǵa sáıkes halyqaralyq avtomobıl tasymaldary salasynda tirkelý memleketimen ruqsat berýsiz júıe qoldanylatyn sheteldik avtokólik quraly­nyń Qazaqstan Respýblıkasynyń aýmaǵyna (aýmaǵynan) kelý (ketý), Qazaqstan Respýblıkasynyń aýmaǵy arqyly tranzıttik ótý quqyǵyn rastaıtyn qujat; 11) úshinshi elderge (elderden) tasymaldaý – avtokólik quralynyń tirkelý memleketi bolyp tabylmaıtyn eki memleket arasynda jolaýshylardy, bagajdy nemese júkterdi tasymaldaý; 12) sheteldik ruqsat – ruqsat berý qujaty, onyń negizinde halyqaralyq qatynasta jolaýshylardy, bagajdy jáne júkterdi tasymaldaýdy, sondaı-aq úshinshi elderge (den) tasymaldaýdy júzege asyratyn otandyq avtokólik quraldarynyń tıisti shet memlekettiń aýmaǵyna (aýmaǵynan) kirý (shyǵý), memlekettiń aýmaǵy arqyly tranzıti júzege asyrylady. 5. Qazaqstan Respýblıkasynyń aýmaǵy arqyly avtokólik quraldarynyń júrip ótýine ruqsat berý júıesi Zańda, Qazaqstan Respýblıkasy ratıfıkasııalaǵan Qazaqstan Respýblıkasy men shet memleketter arasyndaǵy halyqaralyq avtomobıl qatynasy týraly halyqaralyq sharttarda (budan ári – Kelisim) jáne osy Qaǵıdada aıqyndalady. 6. Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy halyqaralyq avtomobıl qatynasy týraly kelisimge sáıkes otandyq tasymaldaýshylar Qytaı Halyq Respýblıkasynyń aýmaǵyna avtomobıl tasymaldaryn júzege asyrý kezinde mynalar qajet: 1) jolaýshylar men bagajdy avtomobılmen turaqty tasymaldaýdy oryn­daǵan kezde, otandyq tasymaldaýshyǵa tasymaldy jóneltý pýnktinen mejeli pýnktke deıin kúntizbelik bir jyl qoldaný merzimimen «A» túriniń ruqsaty; 2) týra jáne keri bir reısti oryndaýǵa quqyǵy bar jolaýshylar men bagajdyń turaqty emes avtomobıl tasymalyn oryndaý kezinde «V» túriniń ruqsaty; 3) týra jáne keri bir reısti oryndaýǵa quqyǵy bar júk avtomobıl kóligimen tasymaldaý kezinde «S» túriniń ruqsaty. «A», «V», «S» túrindegi ruqsattar aǵymdaǵy jylǵy 31 jeltoqsanǵa deıin qoldanylady. 2. Sheteldik ruqsattardy aıyrbastaý kvotasyn anyqtaý jáne úlestirilý tártibi 7. Qazaqstan Respýblıkasy Kólik jáne kommýnıkasııa mınıstrligi Kóliktik baqylaý komıtetiniń kóliktik baqylaý aýmaqtyq organdary (budan ári – aýmaqtyq organdar) jyl saıyn 10 tamyzǵa deıingi merzimde buqaralyq aqparat quraldary men ınternet-resýrstar arqyly sheteldik ruqsattarǵa jyldyq ótinimderdi qabyldaýdyń bastalýy týraly otandyq tasymaldaýshylardy habarlandyrady. 8. Jyl saıyn 10 tamyzdan bastap 20 qyrkúıekke deıingi merzimde aýmaqtyq organdar otandyq tasymaldaýshylardan jyldyq ótinimderdi qabyldaıdy. Jyldyq ótinimde: 1) otandyq tasymaldaýshynyń ataýy; 2) qyzmettiń túri; 3) zańdy mekenjaıy; 4) usynylǵan avtokólik quraldaryna ruqsat berý kartochkasynyń №; 5) tasymaldyń túri; 6) elder jáne toqsan boıynsha, boljamdy jol júrý ýaqyty men jyljymaly quram boıynsha bóle otyryp, tasymaldardyń túrleri bólinisinde sheteldik ruqsattardy yqtımal paıdalanýdyń sany qamtylady. Jyldyq ótinimniń nysany Kóliktik baqylaý komıtetiniń ınternet-resýrsynda ornalastyrylady. 9. Otandyq tasymaldaýshylardan kelip túsken jyldyq ótinimderdiń qorytyndylary boıynsha aýmaqtyq organ jyl saıyn aǵymdaǵy jylǵy 10 qazanǵa deıingi merzimde Kóliktik baqylaý komıtetine usynylatyn jıyntyq jyldyq ótinimdi qalyptastyrady. 10. Jyl saıyn 10 qyrkúıekten bastap 31 qyrkúıekke deıingi merzimde Qazaqstan Respýblıkasy Kólik jáne kommýnıkasııa mınıstrligi Kóliktik baqy­laý komıteti (budan ári – Kóliktik baqylaý komıteti) otandyq tasymaldaý­shylardan kúntizbelik bir jyl qoldaný merzimimen jolaýshylardy jáne bagajdy turaqty tasymaldaýǵa arnalǵan sheteldik ruqsattardyń qajetti sany týraly jyldyq ótinimderdi qabyldaıdy. 11. Otandyq tasymaldaýshylar kúntizbelik bir jyl qoldaný merzimimen jolaýshylardy jáne bagajdy turaqty tasymaldaýǵa arnalǵan sheteldik ruqsattarǵa jyldyq ótinimderdi bergen kezde jeke papkaǵa resimdelgen mynadaı qujattardy usynady: 1) zańdy tulǵa úshin – salystyryp tekserý úshin túpnusqalardy usyna otyryp, zańdy tulǵa retinde memlekettik tirkeý týraly kýáliktiń kóshirmesi nemese notarıaldy túrde kýálandyrylǵan kóshirmesi, dara kásipker úshin – jeke basyn kýálandyratyn qujattyń jáne dara kásipker retinde tirkeý týraly kýáliktiń kóshirmesi. Túpnusqalar salystyryp tekserilgennen keıin ótinish berýshige qaıtarylady; 2) salystyryp tekserý úshin túpnusqalardy usyna otyryp, sheteldik tasymaldaýshymen birlesken qyzmet týraly sharttyń kóshermesi nemese notarıaldy túrde kýálandyrylǵan kóshirmesi. Túpnusqalar salystyryp tekserilgennen keıin ótinish berýshige qaıtarylady; 3) kólik quralyn memlekettik tirkeý týraly kýálikterdiń kóshirmelerin qosa bere otyryp, marshrýtta paıdalanýǵa kózdeletin jyljymaly quramnyń sany jáne úlgisi (klasy) týraly málimetterdi; 4) kórsetilgen avtobýstardyń, shaǵyn avtobýstardyń jolaýshylar men bagajdy avtomobılmen turaqty tasymaldaýdyń basqa marshrýttarynda iske tartylmaýy týraly otandyq tasymaldaýshy tirkelgen oblystyń jergilikti atqarýshy organdarynyń jazbasha rastaýy; 5) marshrýt boıynsha avtobýstardyń, shaǵyn avtobýstardyń jóneltilý, kelý jáne turý oryndary men ýaqyttaryn, sondaı-aq barlyq aıaldama pýnktteri men memleketterdiń shekaralary arqyly ótkizý pýnktteri boıynsha araqashyqtyqtar kórsetilgen qozǵalys kesteleri; 6) avtovokzaldardy, avtostansııalardy memlekettik shekara arqyly avtomobıl ótkizý pýnktterin, avtobýstar jáne shaǵyn avtobýstar qozǵalysynyń qaýipti ýchaskeleri men jyldamdyq rejımi kórsetilgen marshrýt shemalary; 7) avtobýstar jáne shaǵyn avtobýstar júrgizýshileriniń aýysym ýaqyty men ornyn kórsete otyryp, búkil turaqty marshrýt uzaqtyǵyndaǵy júrgizýshilerdiń eńbek jáne tynyǵý rejıminiń grafıgi. 12. Sheteldik ruqsattarǵa, sonyń ishinde kúntizbelik bir jyl qoldaný merzimimen jolaýshylardy jáne bagajdy turaqty tasymaldaýǵa arnalǵan sheteldik ruqsattaryna jıyntyq jyldyq ótinimderdiń qorytyndylary boıynsha Kóliktik baqylaý komıteti jalpy jıyntyq jyldyq ótinimdi qalyptastyrady. Qalyptastyrǵan jıyntyq jyldyq ótinimder Kóliktik baqylaý komıtetiniń Internet-resýrsyna ornalastyrylady. 13. Osy Qaǵıdanyń 11-tarmaǵynda kórsetilgen qujattar 5 jyl boıy Kóliktik baqylaý komıtetinde saqtalady. 14. Ruqsat blankilerimen almasý kvotasyn anyqtaý máselesi boıynsha tıisti memleketterdiń quzyretti organdarymen kelissózderdi júrgizýdi qamtamasyz etý úshin Kóliktik baqylaý komıteti aǵymdaǵy jylǵy 15 qazanǵa deıingi merzimde Qazaqstan Respýblıkasy Kólik jáne kommýnıkasııa mınıstrliginiń Kólik jáne qatynas joldary komıtetine (budan ári – Kólik jáne qatynas joldary komıteti) otandyq tasymaldaýshylardyń sheteldik ruqsattaryna degen qajettilik sany týraly jalpy jıyntyq jyldyq ótinimdi joldaıdy. 15. Kólik jáne qatynas joldary komıteti shet memleketterdiń quzyretti organdarymen ruqsat blankilerimen almasý kvotasyn kelisedi. 16. Kóliktik baqylaý komıteti shet memleketterdiń quzyretti organdaryna otandyq ruqsat blankilerin, onyń ishinde úshinshi elderge (elderden) tasymaldaýdy oryndaýǵa ruqsattar berýdi, otandyq tasymaldaýshylar úshin sheteldik ruqsattardy sheteldik quzyretti organdarmen júrgizilgen kelissóz hattamalarynda eskerilgen mólsherde alýdy júzege asyrady. 17. Otandyq tasymaldaýshylardyń qajettiligin qanaǵattandyratyn sheteldik ruqsattar almasý kvotasy Kóliktik baqylaý komıtetiniń rezervine belgilengen sheteldik ruqsattar men kúntizbelik bir jyl qoldaný merzimimen jolaý­shylardy jáne bagajdy turaqty tasymaldaýǵa arnalǵan sheteldik ruqsattardy qospaǵanda, jalpy jıyntyq jyldyq ótinim derekterine sáıkes otandyq tasymaldaýshylarǵa berý úshin aýmaqtyq organdarǵa tolyq bólýge jatady. 18. Otandyq tasymaldaýshylardyń qajettiligin qanaǵattandyrmaǵan sheteldik ruqsattar, almasý kvotasy otandyq tasymaldaýshylardan tıisti qujattardy qosa bere otyryp, sheteldik ruqsattyń blankilerin alýǵa ótinishter túsýine oraı bólýge jatady. 19. Eger halyqaralyq avtomobıl tasymaldaryn oryndaýdyń ruqsat etý júıesi qoldanylatyn elderge qatysty ruqsattarǵa suranys otandyq tasymaldaýshylarǵa beriletin sheteldik ruqsattar sanynan acca, onda sheteldik ruqsattar birinshi kezekte: 1) gýmanıtarlyq júkterdi avtomobılmen tasymaldaýǵa; 2) Qazaqstan Respýblıkasynda óndiriletin júkterdi avtomobılmen eksporttyq tasymaldaýǵa; 3) kóliktiń basqa túrleriniń tasymaldaýshylarymen birlesip oryndalatyn avtomobıl tasymaldaryna; 4) tez búlinetin ónimderdi avtomobılmen tasymaldaýǵa beriledi. 20. Osy Qaǵıdanyń 19-tarmaǵynda kórsetilgen júkterdi avtomobılmen tasymaldaýdy otandyq tasymaldaýshylar tasymal shartymen rastaıdy. 21. Kóliktik baqylaý komıteti shet memleketterdiń quzyretti organdarymen kelisilgen, belgilengen marshrýttar men osy marshrýttar boıynsha júrý kestesin eskere otyryp, kúntizbelik bir jyl qoldaný merzimimen jolaýshylardy jáne bagajdy turaqty tasymaldaýǵa arnalǵan sheteldik ruqsattardy úlestiredi. 22. Aýmaqtyq organdardyń bólinisinde bólingen sheteldik ruqsattardyń sany týraly málimetter Kóliktik baqylaý komıtetiniń ınternet-resýrsynda ornalastyrylady. 23. Sheteldik ruqsattar blankilerin alýǵa qosymsha ótinimderdi bergen otandyq tasymaldaýshylar Kóliktik baqylaý komıtetiniń rezervinen sheteldik ruqsattarmen jáne bir toqsan ishinde talap etilmegen sheteldik ruqsat blankilerimen qamtamasyz etiledi. 3. Otandyq tasymaldaýshylarǵa sheteldik ruqsattardy berý tártibi 24. Otandyq tasymaldaýshylarǵa kúntizbelik bir jyl qoldanylý merzimimen jolaýshylardy jáne bagajdy turaqty tasymaldaýǵa arnalǵan sheteldik ruqsattardy qospaǵanda, sheteldik ruqsattardy resimdeýdi jáne berýdi aýmaqtyq organdar júzege asyrady. 25. Bir kúntizbelik jyl qoldaný merzimimen jolaýshylardy jáne bagajdy turaqty tasymaldaýǵa arnalǵan sheteldik ruqsattardy resimdeýdi jáne berýdi Kóliktik baqylaý komıteti júzege asyrady. 26. Sheteldik ruqsattardy, onyń ishinde kúntizbelik bir jyl qoldaný merzimimen jolaýshylardy jáne bagajdy turaqty tasymaldaýǵa arnalǵan sheteldik ruqsattardy alýǵa ótinish túsken kúnnen bastap úsh jumys kún ishinde qaralady. 27. Aýmaqtyq organdar otandyq tasymaldaýshylarǵa sheteldik ruqsattardy júkterdiń halyqaralyq avtomobıl tasymaldaryn júzege asyrýǵa ruqsat berý kýáligi, ruqsat berý kartochkasy jáne usynylǵan avtokólik quraldaryna halyqaralyq tehnıkalyq tekserý sertıfıkaty bar bolǵanda beredi. 28. Kóliktik baqylaý komıteti otandyq tasymaldaýshylarǵa kúntizbelik bir jyl qoldanylý merzimimen jolaýshylardy jáne bagajdy turaqty tasymal­daýǵa arnalǵan sheteldik ruqsattardy halyqaralyq jáne qalaaralyq qatynas­tarda jolaýshylardy jáne bagajdy avtobýstarmen, shaǵyn avtobýstarmen tasymaldaýǵa arnalǵan lısenzııalary, lısenzııaǵa qosymsha men eseptik qujattary jáne usynylǵan avtobýstarǵa jáne (nemese) shaǵyn avtobýstarǵa halyq­aralyq tehnıkalyq tekserý sertıfıkaty bar bolǵanda beredi. 29. Kúntizbelik bir jyl qoldaný merzimimen jolaýshylardy jáne bagajdy turaqty tasymaldaýǵa arnalǵan sheteldik ruqsattardy qospaǵanda, sheteldik ruqsattardy alýǵa ótinish zańdy tulǵanyń ornalasqan orny nemese jeke kásipker retinde bolyp tirkelgen jeke tulǵanyń turǵylyqty orny boıynsha aýmaqtyq organǵa beriledi. 30. Otandyq tasymaldaýshylar sheteldik ruqsattardy alýǵa ótinishti elektrondy túrde www.epz.kz mekenjaıy boıynsha elektrondyq ótinimdi berý portaly arqyly berýi múmkin. 31. Sheteldik ruqsattardy, onyń ishinde kúntizbelik bir jyl qoldaný merzimimen jolaýshylardy jáne bagajdy turaqty tasymaldaýǵa arnalǵan sheteldik ruqsattardy berý Qazaqstan Respýblıkasynyń Salyq kodeksinde belgilengen stavkalar boıynsha Qazaqstan Respýblıkasynyń aýmaǵy boıynsha avtokólik quraldarynyń júrip ótkeni úshin alym somasyn tólegeni týraly túbirtek usynylǵannan keıin bir jumys kúni ishinde júrgiziledi. 32. Otandyq tasymaldaýshy alǵan sheteldik ruqsattardy osy otandyq tasymaldaýshynyń ruqsat kartochkasynda kórsetilgen avtokólik quralyna, sondaı-aq qaıta alynǵan jáne Qazaqstan Respýblıkasynyń aýmaǵyna aıdap ákelingen avtokólik quralyna qoldanady. 33. Kúntizbelik bir jyl qoldaný merzimimen jolaýshylardy jáne bagajdy turaqty tasymaldaýǵa arnalǵan sheteldik ruqsattardy qospaǵanda, otandyq tasymaldaýshy paıdalanǵan sheteldik ruqsattar jol júrý aıaqtalǵannan keıin bir aı ishinde, al paıdalanylmaǵany – olardyń qoldanylý merzimderi aıaqtalǵan kúnnen bastap kúntizbelik jıyrma kúnnen keshiktirmeı olar berilgen jer boıynsha aýmaqtyq organǵa qaıtarýǵa jatady. Kúntizbelik bir jyl qoldaný merzimimen jolaýshylardy jáne bagajdy turaqty tasymaldaýǵa arnalǵan sheteldik ruqsattar olardyń qoldaný merzimderi aıaqtalǵan kúnnen bastap kúntizbelik jıyrma kúnnen keshiktirmeı Kóliktik baqylaý komıtetine qaıtarýǵa jatady. Otandyq tasymaldaýshylar sheteldik ruqsattardy osy ruqsattardy qosa bere otyryp, mindetti túrde qaıtarý kúni, sheteldik ruqsattardyń nómiri kórsetilgen, erkin nysanda jasalǵan ilespeli hatpen qaıtarady. Sheteldik ruqsattar joǵalǵan jaǵdaıda otandyq tasymaldaýshylar jazbasha nysanda kórsetilgen ruqsattardyń joǵalǵany jáne jaramsyzdyǵy týraly ishki ister organdarynda tirkelgen ótinishterdiń nemese buqaralyq aqparat quraldarynda habarlamanyń ornalastyrylǵanyn rastaıtyn qujattardyń kóshirmelerin qosa bere otyryp, joǵalǵany týraly Kóliktik baqylaý komıtetine nemese aýmaqtyq organdarǵa habarlaıdy. Kóliktik baqylaý komıtetine nemese aýmaqtyq organǵa joǵalǵany týraly habarlamany usyný merzimi ótinish ishki ister organdarynda tirkelgen nemese habarlama buqaralyq aqparat quraldarynda ornalastyrylǵan kúnnen bastap on jumys kúninen aspaýy tıis. 34. Qaıtarylǵan sheteldik ruqsattar Kóliktik baqylaý komıtetinde jáne onyń aýmaqtyq organdarynda Qazaqstan Respýblıkasynyń zańnamasynda belgilengen tártippen bes jyl boıy saqtalady. 35. Aýmaqtyq organdar aı saıyn 5 kúnge deıin Kóliktik baqylaý komıtetine otandyq tasymaldaýshylar qaıtarǵan sheteldik ruqsattardyń sany týraly aqparatty usynady. 36. Kóliktik baqylaý komıteti jáne aýmaqtyq organdar qaıtarylǵan sheteldik ruqsattardyń esebin elder bólinisinde júrgizedi. Sheteldik ruqsattardyń esebi elder bólinisinde berilgen jáne qaıtarylǵan sheteldik ruqsattardyń esep jýrnalyn qaǵaz jáne elektrondy túrde júrgizý arqyly júzege asyrylady. Jýrnalda mynadaı málimetter kórsetiledi: 1) salyq tóleýshiniń tirkeý nómiri nemese bıznes sáıkestendirý nómiri, jeke sáıkestendirý nómiri; 2) otandyq tasymaldaýshynyń ataýy; 3) tasymaldaýshynyń ornalasqan (turǵylyqty) orny; 4) jóneltý eli; 5) barý eli; 6) qatynaý marshrýty; 7) ruqsat túri; 8) ruqsattyń qoldanys merzimi; 9) ruqsattyń berilgen kúni jáne nómiri (serııasy); 10) ruqsatty alý kúni (ruqsat berilgen kezde); 11) Qazaqstan Respýblıkasynyń aýmaǵy boıynsha avtokólik quraldarynyń júrip ótkeni úshin alymdy tólegenin rastaıtyn qujattyń nómiri (bar bolsa) jáne kúni, alym somasy (ruqsat berilgen kezde); 12) ruqsat qujatyn alý týraly tasymaldaýshynyń qoly (qaǵaz túrinde ruqsat berilgen kezde). 37. Aýmaqtyq organdar otandyq tasymaldaýshylardan ótinimder men ótinishterdiń túsýine qaraı sheteldik ruqsattarǵa arnalǵan ótinimderde jáne sheteldik ruqsattardy alýǵa arnalǵan ótinishterde kórcetilgen, sondaı-aq berilgen jáne qoldanylmaǵan sheteldik ruqsattar týraly derekterdi Kóliktik baqylaý komıtetiniń kólik derekqorynyń aqparattyq taldamalyq júıesine (budan ári – KDA TJ) engizýdi qamtamasyz etedi. 38. Aýmaqtyq organdar aı saıyn 5 kúnge deıingi merzimde sheteldik ruqsattarǵa ótinimder bergen otandyq tasymaldaýshylar týraly málimetterdi kedendik baqylaýdyń aýmaqtyq organdaryna usynady. 39. Kóliktik baqylaý komıteti jyl saıyn 15 qazanǵa deıingi merzimde Qa­zaqstan Respýblıkasy Qarjy mınıstrliginiń Kedendik baqylaý komıtetine (bu­dan ári – Kedendik baqylaý komıteti) kúntizbelik bir jyl qoldaný merzimimen jolaýshylardy jáne bagajdy turaqty tasymaldaýǵa arnalǵan sheteldik ruq­sat­tar­ǵa ótinimderdi bergen otandyq tasymaldaýshylar týraly málimetterdi usynady. 40. Mynadaı jaǵdaılarda otandyq tasymaldaýshylarǵa sheteldik ruqsattardy berýden bas tartylady: 1) júkterdiń halyqaralyq avtomobıl tasymaldaryn júzege asyrýǵa otandyq tasymaldaýshynyń ruqsat berý kýáliginiń jáne usynylǵan avtokólik quraldaryna ruqsat kartochkalarynyń bolmaýy; 2) halyqaralyq jáne qalaaralyq qatynastarda jolaýshylardy jáne bagajdy avtobýspen jáne shaǵyn avtobýspen tasymaldaýǵa arnalǵan lısenzııalardyń, lısenzııalarǵa qosymshalar men eseptik qujattardyń bolmaýy; 3) bir avtokólik quralyna eki jáne/nemese odan da kóp qoldanystaǵy ruqsat kartochkasynyń anyqtalýy; 4) Qazaqstan Respýblıkasynyń aýmaǵy boıynsha avtokólik quraldarynyń júrip ótkeni úshin alym somasy tóleminiń bolmaýy; 5) sheteldik ruqsattardyń aýmaqtyq organda jáne Kóliktik baqylaý komıtetiniń rezervinde bolmaýy; 6) osy Qaǵıdanyń 11-tarmaqtarynda kózdelgen qujattardy usynbaýy; 7) osy Qaǵıdanyń 33-tarmaǵynda belgilengen talaptardy oryndamaýy; 8) avtomobıl kóligi jáne keden isi salasyndaǵy Qazaqstan Respýblıkasynyń qoldanystaǵy zańnamasynyń talaptaryn birneshe ret buzýy. 41. Otandyq tasymaldaýshyǵa sheteldik ruqsat berilgen kezde blankiniń tıisti baǵandaryna mindetti túrde tasymaldaýshynyń ataýy, zańdy mekenjaıy ja­zylady jáne mór (mórtaban) basylyp, ruqsat bergen tulǵanyń qoly qoıylady. Kúntizbelik bir jyl qoldaný merzimimen jolaýshylardy jáne bagajdy turaqty tasymaldaýǵa arnalǵan sheteldik ruqsat berilgen kezde blanktiń tıisti baǵandaryna mindetti túrde tasymaldaýshynyń ataýy, zańdy mekenjaıy, avtokólik quralynyń markasy men memlekettik nómiri, júrý marshrýty jazylady jáne mór (shtamp) basylyp, ruqsat bergen adamnyń qoly qoıylady. Sheteldik ruqsattarda túzetýlerge jol berilmeıdi. 4. Sheteldik tasymaldaýshylarǵa otandyq ruqsattardy berý tártibi 42. Otandyq ruqsattardy jáne úshinshi elderge (elderden) tasymaldaýdy oryndaýǵa arnalǵan otandyq ruqsattardy sheteldik tasymaldaýshylarǵa tıisti jylǵa aıyrbastalǵan ruqsattar esebinen olardyń memleketteriniń quzyretti organdary beredi. Otandyq ruqsattar, eger halyqaralyq sharttarda ózgeshe eskerilmegen bolsa, kelesi jyldyń 31 qańtaryna deıin jaramdy bolady. 43. Otandyq ruqsat jáne úshinshi elderge (elderden) tasymaldaýdy oryn­daýǵa arnalǵan otandyq ruqsat, onyń ishinde birinshi reıstiń tasymaly júzege asyrylǵan memlekettiń aýmaǵyna Qazaqstan Respýblıkasynyń aýmaǵynan keri baǵytta jolshybaı júk artý jaǵdaılarynda bir jolsapar úshin jaramdy bolady. «A» túrindegi otandyq ruqsat jóneltý pýnktinen mejeli pýnktke deıin jaramdy, «V» men «S» túrindegi otandyq ruqsat Qazaqstan Respýblıkasynyń memlekettik shekarasynda 75 km sheginde ornalasqan shekara mańy termınaldaryna deıin jaramdy. 44. Qazaqstan Respýblıkasynyń aýmaǵy arqyly tranzıttik reısten keri baǵytta bara jatqan sheteldik avtokólik quralyna Qazaqstan Respýblıkasynyń aýmaǵynda jolshybaı júk artylǵan jaǵdaıda, qosymsha otandyq ruqsat bolýy qajet, onyń negizinde Qazaqstan Respýblıkasynyń aýmaǵynan shyǵý, ne eger úshinshi elderge (elderden) tasymaldaý josparlanyp otyrǵan jaǵdaıda, úshinshi elderge (elderden) tasymaldaýdy oryndaýǵa arnalǵan ruqsat júzege asyrylatyn bolady. 45. Qazaqstan Respýblıkasynyń aýmaǵynan avtokólik quralynyń tirkelý memleketi bolyp tabylmaıtyn úshinshi memlekettiń aýmaǵyna keri baǵytta bara jatqan sheteldik avtokólik quralyna jolshybaı júk artylǵan jaǵdaıda, úshinshi elderge (elderden) tasymaldaýdy oryndaýǵa arnalǵan qosymsha otandyq ruqsat bolýy qajet. 46. Úshinshi elderge (elderden) júk tasymaldaýy júktiń jóneltý nemese mejeli pýnkti bolyp tabylmaıtyn eldiń aýmaǵyna júkti asqyn júkteýmen (tıeý/túsirý) úshinshi elderge (elderden) tasymaldy oryndaýǵa arnalǵan ruqsat bolǵan jaǵdaıda júzege asyrylady. 47. Tirkeý jáne erekshe belgileri joq jáne basqa memleket aýmaǵyna paıdalanýǵa arnalǵan Qazaqstan Respýblıkasynyń aýmaǵy boıynsha jáne Qazaqstan Respýblıkasynan aýmaǵynan júgi bar nemese júgi joq avtokólik quraldarynyń tranzıttik júrýi ruqsat berý qujattarynyń (otandyq ruqsat, arnaıy ruqsat) negizinde júzege asyrylady. Qazaqstan Respýblıkasynyń aýmaǵynda paıdalanýǵa arnalǵan, onyń ishinde júgi bar avtokólik quraldaryn aıdap ótý kezinde iri kólemdi jáne (nemese) aýyr salmaqty avtokólik quraldarynyń júrip ótýine arnaıy ruqsattardy qospaǵanda, ruqsat berý qujattary talap etilmeıdi. 48. Qazaqstan Respýblıkasynyń aýmaǵy arqyly tranzıttik tasymaldardy júzege asyratyn sheteldik tasymaldaýshyda otandyq ruqsat bolmaǵan jaǵdaıda, ol kóliktik baqylaý fýnksııalaryn júzege asyratyn quzyretti organdardan tıisti ruqsatqa suraý salady, ruqsat oǵan Keden Odaǵynyń kedendik shekarasy arqyly avtokólik quraldaryn ótkizý pýnktterinde nemese Qazaqstan Respýblıkasynyń aýmaǵyndaǵy kóliktik baqylaý posttarynda Qazaqstan Respýblıkasynyń Salyq Kodeksinde belgilengen stavkalar boıynsha Qazaqstan Respýblıkasynyń aýmaǵy arqyly avtokólik quraldarynyń júrip ótýi úshin alym somasy tólengennen keıin beriledi. Aýmaqtyq organdar jáne kedendik baqylaýdyń aýmaqtyq organdary berilgen jáne paıdalanylǵan sheteldik ruqsattar týraly derekterdi KDA TJ kún saıyn engizýdi qamtamasyz etedi. 49. Tirkeý talondaryn Qazaqstan Respýblıkasy ratıfıkasııalaǵan halyq­aralyq sharttarǵa sáıkes memleketterinde halyqaralyq avtomobıl tasymaly salasynda ruqsat berýsiz júıe qoldanylatyn sheteldik tasymaldaýshylarǵa Keden Odaǵynyń kedendik shekarasy arqyly avtokólik quraldaryn ótkizý pýnktterinde kedendik baqylaýdyń aýmaqtyq organdary nemese Qazaqstan Respýb­lıkasy aýmaǵyndaǵy kóliktik baqylaý posttarynda aýmaqtyq organdar beredi. 50. Qazaqstan Respýblıkasynyń aýmaǵy arqyly júrip ótý quqyǵyn rastaıtyn otandyq ruqsat berý qujattarynda Qazaqstan Respýblıkasynyń memlekettik shekarasy arqyly ótkizý pýnktterinde kedendik baqylaýdyń aýmaqtyq organdary nemese Qazaqstan Respýblıkasynyń aýmaǵyndaǵy kóliktik baqylaý posttarynda aýmaqtyq organdar: Qazaqstan Respýblıkasynyń aýmaǵynan avtokólik quralynyń kúntizbelik 30 kúnnen aspaıtyn shyǵý merzimin; tasymaldaýshynyń ataýyn; avtokólik quralynyń nómirin; avtokólik quralynyń tirkelgen memleketin; Qazaqstan Respýblıkasynyń aýmaǵy arqyly júrip ótý marshrýtyn kórsetedi. Sheteldik avtokólik quraldarynyń tranzıttik júrip ótýi kezinde Qazaqstan Respýblıkasynyń aýmaǵyna kelý jáne aýmaǵynan ketý merzimderi týra da, keri de baǵytta júrip ótý kezindegi Qazaqstan Respýblıkasynyń aýmaǵynda naqty bolý ýaqytymen aıqyndalady. 51. Bos sheteldik avtokólik quraldarynyń Qazaqstan Respýblıkasynyń aýmaǵy boıynsha júrip ótýi jolaýshylar men júktiń halyqaralyq tasymaldary úshin Kelisimderde kózdelgen tártippen júzege asyrylady. 52. Eger Kelisimderde ózgeshe kózdelmegen bolsa, Qazaqstan Respýblıka­synyń aýmaǵy arqyly júrip ótý quqyǵyn rastaıtyn ruqsat berý qujattary Qazaqstan Respýblıkasynyń aýmaǵynda ornalasqan eki pýnkt arasynda sheteldik avtokólik quraldarynyń jolaýshylardy, bagajdy jáne júkterdi tasymaldaýdy júzege asyrýyna quqyq bermeıdi. Qazaqstan Respýblıkasynyń aýmaǵyna (aýmaǵynan) kirýdi (shyǵýdy), halyqaralyq qatynastaǵy jolaýshylar, bagaj jáne júk tasymalyn júzege asyratyn shetel avtokólik quraldarynyń Qazaqstan Respýblıkasynyń aýmaǵy boıynsha tranzıtin, sondaı-aq úshinshi elderge/elderden tasymaldy, tirkeý talondaryn jáne otandyq ruqsat berý qujattaryn berýdi tirkeý qaǵaz jáne elektrondy túrde Qazaqstan Respýblıkasynyń aýmaǵyna (aýmaǵynan) kirýdi (shyǵýdy), shetel avtokólik quraldarynyń Qazaqstan Respýblıkasynyń aýmaǵy boıynsha tranzıtin, tirkeý talondaryn jáne otandyq ruqsat berý qujattaryn berýdi tirkeý jýrnalynda júzege asyrylady. Jýrnalda mynadaı málimetter kórsetiledi: 1) shetel tasymaldaýshysynyń ataýy; 2) tasymaldaýshynyń eli; 3) tasymaldaýshynyń ornalasqan (turǵylyqty) orny; 4) jóneltý eli; 5) barý eli; 6) qatynaý marshrýty; 7) avtokólik quralynyń úlgisi, markasy; 8) avtokólik quralynyń jáne tirkemesiniń nómiri; 9) ruqsat túri; 10) ruqsatty qoldaný merzimi; 11) ruqsattyń berilgen kúni jáne nómiri (serııasy); 12) ruqsatty alǵan kúni (ruqsat berilgen kezde); 13) Qazaqstan Respýblıkasynyń aýmaǵy boıynsha avtokólik quraldarynyń júrip ótkeni úshin alymdy tólegenin rastaıtyn qujattyń nómiri (bar bolsa) jáne kúni, alym somasy (ruqsatty berilgen kezde); 14) ruqsat qujatyn alý týraly tasymaldaýshynyń qoly (qaǵaz túrinde ruqsat berilgen kezde). 5. Ruqsat berý qujattaryn daıyndaý jáne esepke alý 53. Otandyq ruqsat, úshinshi elderge (elderden) tasymaldaýdy oryndaýǵa arnalǵan ruqsat blankileriniń nysandaryn Kóliktik baqylaý komıteti ázirleıdi jáne bekitedi, olar baspahanalyq tásilmen daıyndalady, rettik nómiri jáne keminde úsh qorǵaný dárejesi bolady. Tirkeý talondary blankileriniń nysandaryn Kedendik baqylaý komıteti ázirleıdi jáne bekitedi, olar baspahanalyq tásilmen daıyndalady jáne rettik nómiri bolady. 54. Jalpy qabyldanǵan halyqaralyq normalar men standarttarǵa sáıkes otandyq ruqsat blankisinde mynadaı derektemeler bolady: 1) tasymaldaýdy júzege asyrý quqyǵyn ruqsat berý qujaty rastaıtyn tasymaldaý túri; 2) serııasy men nómiri; 3) qoldanylý merzimi; 4) tasymaldaýshynyń derektemeleri; 5) berilgen orny jáne kúni; 6) quzyretti organnyń qoly men móri; 7) qozǵalys marshrýty; 8) avtokólik quralynyń markasy men memlekettik nómiri; 9) júktiń ataýy; 10) avtokólik quralynyń júksiz jabdyqtalǵan salmaǵy; 11) júrý jolyndaǵy baqylaýshy organdardyń belgileri men mórine arnalǵan oryn; 12) blankini paıdalaný boıynsha negizgi nusqaýlar. 55. Otandyq tasymaldaýshylarǵa sheteldik ruqsat blankilerin berý senimhat bolǵan jaǵdaıda júkqujattar boıynsha (derekti serııasynyń jáne sheteldik ruqsat nómirin kórsete otyryp) júzege asyrylady. 56. Esepti kezeńnen keıin aı saıyn besinshi kúnge deıin aýmaqtyq organdar Kóliktik baqylaý komıtetine túrleri jáne elderi boıynsha berilgen ruqsat­tar­dyń sany týraly aqparatty, sondaı-aq Qazaqstan Respýblıkasynyń aýmaǵy arqyly avtokólik quraldarynyń júrip ótkeni úshin alymnyń respýblıkalyq bıýdjetke aýdarylǵan somasy týraly salystyrý aktisiniń kóshirmesin usynady. Aýmaqtyq salyq organdarymen Qazaqstan Respýblıkasynyń aýmaǵy arqyly avtokólik quraldarynyń júrip ótkeni úshin alymnyń respýlıkalyq bıýdjetke aýdarylǵan somasy týraly salystyrý aktisi aýmaqtyq organnyń jazbasha ótinishi negizinde júrgiziledi. 57. Jyl saıyn 5 qańtarǵa deıingi merzimde kedendik baqylaýdyń aýmaqtyq organdary paıdalanylmaǵan otandyq ruqsattardy alynǵan oryn boıynsha aýmaqtyq organǵa qaıtarýdy júzege asyrady. 58. Kedendik baqylaýdyń aýmaqtyq organdary aı saıyn úshinshi kúnnen keshiktirmeı aýmaqtyq organdarǵa Qazaqstan Respýblıkasynyń aýmaǵy arqyly shetel avtokólik quraldarynyń júrip ótkeni boıynsha esepti jáne shetel avtokólik quraldarynyń Qazaqstan Respýblıkasynyń aýmaǵy arqyly avtokólik quraldarynyń júrip ótkeni úshin alymdy tólegeni týraly túbirtekteri bar júkqujattardyń kóshirmelerin usynady. 59. Aýmaqtyq organdar aı saıyn esepti aıdan keıingi aıdyń 20 kúninen keshiktirmeı ózderiniń ornalasqan orny boıynsha salyq organdaryna Qazaqstan Respýblıkasy Qarjy mınıstrligi belgilegen nysan boıynsha Qazaqstan Respýblıkasynyń aýmaǵy arqyly avtokólik quraldarynyń júrip ótkeni úshin alym tóleýshiler jáne salyq salynǵan obektiler týraly aqparatty usynady.