– Varshavada oqyǵan qazaq jastarynyń basy men emes qoı, – dep jymııady Arystanbek. – XX ǵasyrdyń basynda bilim alýǵa umtylǵandar kóbine Oral, Semeı, Vernyı jáne Tashkent sııaqty qalalardaǵy gımnazııalarda oqyǵan. Keıin alys-jaqyn iri qalalardaǵy ınstıtýttarda bilimin jalǵastyrǵan. 1910-1920 jyldary Varshavada oqyǵan zııalylardyń arasynda Qanaı Boranbaev, Ábilmájin Kúshikov te bolǵan. Qanaı Boranbaev keıinnen QazSSR-iniń Ádilet halyq komıssary-respýblıka prokýrory laýazymynda bolyp, sot, prokýratýra organdarynyń qalyptasýyna, kadrlardy tárbıeleýde ózindik qoltańbasyn qaldyrdy. Al Ábilmájin Kúshikovke kelsek, aýyl sharýashylyǵy salasyna zor úles qosqan, – deıdi Arystanbek.
Arystanbek Orynbasarov Varshavanyń «Vistula» ýnıversıtetinde oqyp, «halyqaralyq ekonomıka» bakalavry dárejesin aldy. 2015 jyly Eýropa men Azııany Qazaqstan arqyly qosýǵa baǵyttalǵan «Zamanaýı Jibek joly jobasy» degen taqyrypta dıplomdyq jumysyn jazypty.
– Dıplomdyq jumysym «Qazaqstannyń kózimen: Jańa Jibek joly bastamalary» («The New Silk Road Initiatives From Kazakhstan`s Perspective») dep atalady. Onda Uly Jibek jolynyń zamanyndaǵy mańyzdylyǵyn aıqyndaı kelip, qazirgi tańdaǵy Qytaıdyń, AQSh-tyń, Eýropa odaǵynyń jáne Reseıdiń Azııa men Eýropany Ortalyq Azııa arqyly) jaqyndastyra túsetin jobalarynyń Qazaqstan úshin mańyzdylyǵy sıpattalady.
Qazaqstandaǵy «Nurly jol» ekonomıkalyq saıasatynyń negizgi maqsattarynyń biri – atap ótken bastamalardy bir jerge toptastyryp, elimizde shıkizatqa táýeldi emes jańa bir damý baǵytyn ashý ekeni sóz bolady. Dıssertasııamdy Garvard ýnıversıtetiniń túlegi, Jibek joly salasynda 40 jylǵa taıaý tájirıbe jınaqtaǵan polıak professory Voıcheh Hıýbnerdiń baǵyt-baǵdarymen jazyp shyqtym. Adamgershiligi mol, bilimi men biliktiligi asa joǵary, polıglot Hıýbnerden dıssertasııa jazǵan 6 aı ishinde ekonomıkalyq bilim ǵana emes, sabyrlylyq pen kishipeıildilik sekildi adamı qasıetterge baýlý kýrsynan ótkendeımin, – deıdi Arystanbek.
Bakalavrıatty támamdaǵan kezde keıipkerimizge Vıstýla ýnıversıtetinen jáne halyqaralyq 5-6 kompanııadan jumysqa shaqyrǵan usynys túsken. Arystanbek bilimin jalǵastyrýdy qalady. Búginde ol Leon Kozmınskı atyndaǵy ýnıversıtettiń magıstratýrasynda oqıdy. Buıyrsa, qarjy salasyn tereń ıgerip, ınvestısııalar boıynsha maman bolyp shyqpaq.
– Tańdaý arasynda Nazarbaev Ýnıversıtet, Varshava ýnıversıteti jáne Germanııanyń birneshe aldyńǵy qatarly ýnıversıtetteri boldy. Kóńilimnen shyqqany Leon Kozmınskı atyndaǵy Varshava ýnıversıteti bolyp tur. Bul oqý ornynda Polshanyń ǵana emes, basqa da elderdiń eń úzdik professorlary dáris oqıdy ári magıstratýramen qosa, bul joǵary oqý orny ekonomıka salasynda qyzmet etýge múmkindik beredi, – deıdi keıipkerimiz.
Magıstratýrada oqýmen qatar búginde Arystanbek ınstıtýsııalyq ınvestorlarǵa qyzmet kórsetetin Eýropadaǵy eń iri bank Varshavadaǵy bólimshesinde eńbek etip júr.
Jyl saıyn úzdik stýdentterdi oqıtyn salasyna qaraı túrli mekemeler men kompanııalarǵa, konferensııalarǵa, tájirıbege ári qyzmetke de shaqyryp jatady. Sońǵy qatysqan konferensııam – ótken jyldyń 19-28 shilde aralyǵynda Aýstrııanyń Zalsbýrg qalasynda Eýropa odaǵynyń bastamasymen júzege asqan «GLOPOLINT Salzburg» edi. Konferensııada basty talqylanǵan máseleler demokratııa, jahandaný, adam quqyqtary ári saıası júıeleri tóńireginde órbidi. Aýstrııa, Germanııa sekildi Eýropanyń ozyq memleketteriniń mamandarymen tájirıbe almasýdyń áseri mol. Onyń erteń elge oralyp qyzmet etkende paıdaly bolatynyna nyq senimdimin, – deıdi Arystanbek.
Kezinde Alash arystary oqyǵan shaharda bilim alýymen qatar Arystanbek solardyń izin jalǵastyryp, Qazaqstannyń ekonomıkasy, órkenıeti damyǵan ozyq elderdiń qataryna qosylýǵa óz úlesin qospaqshy. Alǵan bilim-biligin, tájirıbesin týǵan eliniń qajetine jaratqannan artyq maqtanysh bar ma?!
Qazbek QUTTYMURATULY,
«Egemen Qazaqstan»
